ബുല്‍ദാന:യുവതിയുടെ ഗര്‍ഭവസ്ഥ ശിശുവിന്‍റെ വയറ്റില്‍ ഭ്രൂണം കണ്ടെത്തി. മഹാരാഷ്‌ട്രയിലെ ബുൽദാനയിലെ ഗര്‍ഭസ്ഥ ശിശുവിലാണ് അപൂര്‍വ്വങ്ങളില്‍ അപൂര്‍വ്വമായ മെഡിക്കല്‍ പ്രതിഭാസം ഉണ്ടായത്. രണ്ട് ദിവസം മുമ്പ് ഒരു സർക്കാർ ആശുപത്രിയിൽ 35 വയസുള്ള ഒരു സ്‌ത്രീക്ക് സോണോഗ്രാഫി നടത്തിയപ്പോഴാണ് ഈ അത്ഭുത സംഭവം കണ്ടെത്തിയത്.
ആഗോളതലത്തില്‍ തന്നെ അപൂര്‍വ്വമായാണ് ഇത്തരം ജന്മനാ ഉണ്ടാകുന്ന അപാകതകള്‍ റിപ്പോര്‍ട്ട് ചെയ്യുന്നത്. ലോകത്ത് തന്നെ ആകെ 200 കേസുകളിലും ഇന്ത്യയില്‍ 15-20 പേരിലുമാണ് ഗര്‍ഭസ്ഥ ശിശുവിന്‍റെ വയറ്റില്‍ ഭ്രൂണം കണ്ടെത്തിയിട്ടുള്ളത്. യുവതിയെ പരിശോധിച്ചപ്പോള്‍ താൻ അത്ഭുതപ്പെട്ടെന്ന് ബുല്‍ദാന ആശുപത്രിയിലെ ഗൈനക്കോളജിസ്റ്റ് ഡോ. പ്രസാദ് അഗർവാൾ പറഞ്ഞു.
"യുവതി 9 മാസം ഗര്‍ഭിണിയായിരുന്നു. മുമ്പ് നടത്തിയ പരിശോധനയില്‍ ഇത്തരത്തിലൊന്നും കണ്ടെത്താനായില്ല. സോണോഗ്രാഫി നടത്തിയപ്പോഴാണ് ഗര്‍ഭസ്ഥ ശിശുവിന്‍റെ വയറ്റില്‍ മറ്റൊരു കുഞ്ഞ് ഉണ്ടാകുന്നതായി (ഭ്രൂണം) കണ്ടെത്തിയത്. തുടക്കത്തിൽ ഞാൻ അത്ഭുതപ്പെട്ടു, പിന്നീട് ഗര്‍ഭസ്ഥ ശിശുവിന്‍റെ ചിത്രങ്ങൾ ശ്രദ്ധാപൂർവ്വം വീണ്ടും പരിശോധിച്ചു," എന്ന് ഡോ. പ്രസാദ് അഗർവാൾ വ്യക്തമാക്കി.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക.