ഡൽഹി :സമൂഹമാധ്യമത്തിൽ ആക്ഷേപകരമായ പ്രസ്‌താവന പോസ്റ്റ് ചെയ്‌തതിന്കോൺഗ്രസ് നേതാവ് മണിശങ്കർ അയ്യരുടെ (Mani Shankar Aiyar) മകൾ സുരണ്യ അയ്യർക്കെരിരെ പരാതി. ബിജെപി നേതാവും സുപ്രീം കോടതി അഭിഭാഷകനുമായ അജയ് അഗർവാളാണ് സുരണ്യ അയ്യർക്കെരിരെ (Suranya Aiyar) പരാതി നൽകിയത്. ഡൽഹി ക്രൈം പൊലീസിലാണ് പരാതി നൽകിയത്.
ജനുവരി 20 നും മറ്റ് തീയതികളിലും സുരണ്യ അയ്യർ അയോധ്യയിലെ ബാബറി മസ്‌ജിദ് (Babri Masjid) പൊളിച്ചതിനെതിരെയും, രാമ ക്ഷേത്രത്തിലെ പ്രാണപ്രതിഷ്‌ഠയെ (Ayodhya Ram Mandir) അപകീർത്തിപ്പെടുത്തുന്ന തരത്തിലുമുള്ള ആക്ഷേപകരമായ പരാമർശങ്ങൾ വിവിധ സോഷ്യൽ മീഡിയ പ്ലാറ്റ്‌ഫോമുകളിൽ നടത്തിയെന്ന് ആരോപിച്ചാണ് പരാതി. പരാതിയോടൊപ്പം സുരണ്യ ജനുവരി 20 ന് പോസ്റ്റ് ചെയ്‌ത വീഡിയോയുടെ ലിങ്കും അദ്ദേഹം നൽകിയിട്ടുണ്ട്. യൂട്യൂബിലും ഫേസ്‌ബുക്കിലും സുരണ്യ അയ്യർ പോസ്റ്റ് ചെയ്‌ത 36 മിനിറ്റ് ദൈർഘ്യമുള്ള വീഡിയോ വിശദമായി പരിശോധിച്ച് അവർക്കതിരെ സെക്ഷൻ 153-എ (മതത്തിൻ്റെ പേരിൽ വിവിധ വിഭാഗങ്ങൾക്കിടയിൽ ശത്രുത വളർത്തിയതിന്) പ്രകാരവും ഐ പി സിയുടെ മറ്റ് വകുപ്പുികൾ പ്രകാരവും കർശന നടപടി എടുക്കണമെന്ന് അജയ് അഗർവാൾ ആവശ്യപ്പെട്ടു.
ഹിന്ദു മതത്തിന്‍റെയും ദേശീയതയുടെയും പേര് പറഞ്ഞ് നടത്തുന്ന അതിക്രമങ്ങൾക്കെതിരെ പ്രതിഷേധിച്ച് സുരണ്യ അയ്യര്‍ മൂന്ന് ദിവസം നീണ്ട ഉപവാസം അനുഷ്‌ഠിച്ചിരുന്നു. ജനുവരി 20 മുതൽ 23 വരെ നടത്തിയ ഉപവാസത്തിന്‍റെ വിവരം സുരണ്യ സോഷ്യൽ മീഡിയയിൽ പങ്കുവക്കുകയും ചെയ്‌തു. ഇതോടൊപ്പമാണ് സുരണ്യ രാമക്ഷേത്രത്തിനെതിരെ പ്രതികരിച്ചത്.