കൊല്‍ക്കത്ത : സംസ്ഥാനത്തെ മാല്‍ഡ, മുര്‍ഷിദാബാദ്, നാദിയ ജില്ലകളിലായി കിടക്കുന്ന നാല് മണ്ഡലങ്ങളിലാണ് മൂന്നാം ഘട്ടമായ ഇന്ന് പശ്ചിമബംഗാളില്‍ പോളിങ്ങ് നടക്കുന്നത്. എന്നാല്‍ മിക്കവരും സംസ്ഥാനത്തെ ഒരു മണ്ഡലത്തിലേക്കാണ് ഉറ്റുനോക്കുന്നത്. മറ്റെങ്ങുമല്ല മുര്‍ഷിദാബാദിലേക്ക്.
എന്താ കാര്യമെന്നല്ലേ? തൃണമൂല്‍ കോണ്‍ഗ്രസ് - ബിജെപി രാഷ്‌ട്രീയ ദ്വന്ദ്വങ്ങള്‍ തകര്‍ത്തെറിയാന്‍ തുടക്കമിട്ട മണ്ഡലമെന്ന നിലയിലാണ് മുര്‍ഷിദാബാദ് രാഷ്‌ട്രീയ ശ്രദ്ധാകേന്ദ്രമായത്. മുര്‍ഷിദാബാദില്‍ ഇക്കുറി ത്രികോണ മത്സരമാണ് അരങ്ങേറുന്നത്. തൃണമൂലിന്‍റെ അബു തഹെര്‍ ഖാന്, ബിജെപിയുടെ ഗൗരിശങ്കര്‍ ഘോഷ്, സിപിഎം പശ്ചിമബംഗാള്‍ സംസ്ഥാന സെക്രട്ടറിയും പാര്‍ട്ടി പൊളിറ്റ് ബ്യൂറോ അംഗവുമായ മുഹമ്മദ് സലിം എന്നിവരാണ് അങ്കത്തട്ടിലുള്ളത്.
ഇവിടെയാണ് ആദ്യമായി കോണ്‍ഗ്രസ്-ഇടതു സഖ്യത്തിന്‍റെ സീറ്റ് പങ്കിടല്‍ ധാരണകള്‍ക്ക് ആദ്യമായി കൃത്യമായ രൂപം ഉണ്ടായത്. ഇടതിന്‍റെ ചാരത്തില്‍ നിന്ന് സലീമിന് ഉയര്‍ത്തെഴുന്നേല്‍ക്കാനാകുമോ എന്ന ചോദ്യമാണ് റാണിനഗര്‍, ദോംകല്‍, ഭഗബനഗോല, മുര്‍ഷിദാബാദിലെ ഹരിഹര്‍പര നാദിയ ജില്ലയിലെ കരിംപൂര്‍ എന്നിവിടങ്ങളില്‍ എല്ലാം ഉയരുന്നത്. ഇടതിന്‍റെ ചാരത്തില്‍ നിന്ന് സലീമിന് ഉയര്‍ത്തെഴുന്നേല്‍ക്കാനാകുമോ എന്നാണ് എല്ലാവരും ഉറ്റുനോക്കുന്നത്. ബംഗാളില്‍ സലിം പാര്‍ട്ടിയുടെ ഫീനിക്‌സ് ആകുമോ എന്ന ചോദ്യവും ഉയരുന്നു.
കോണ്‍ഗ്രസ് സംസ്ഥാന അധ്യക്ഷനും ബഹര്‍പൂരിലെ പാര്‍ട്ടി സ്ഥാനാര്‍ഥിയുമായ അധിര്‍ രഞ്ജന്‍ ചൗധരി വ്യക്തിപരമായി സലിമിന് വേണ്ടി പ്രചാരണം നടത്തുന്നു. ഒരിക്കല്‍ കടുത്ത എതിരാളികളായിരുന്നവര്‍ ഒന്നിച്ചെത്തുകയും പരസ്‌പരം ഹസ്‌തദാനം നടത്തുകയും ചെയ്യുന്ന അത്യപൂര്‍വ പിന്തുണയുടെ കാഴ്‌ചയാണ് നമുക്കിവിടെ കാണാനാകുക. അധിര്‍ ഒരുപടി കൂടി കടന്ന് അരിവാളും ചുറ്റികയും പതിച്ച ഒരു സ്‌കാര്‍ഫും കഴുത്തിലണിഞ്ഞാണ് തന്‍റെ സലിമിനുള്ള തന്‍റെ ഐക്യദാര്‍ഢ്യം പ്രകടിപ്പിക്കുന്നത്.
തൃണമൂല്‍ കോണ്‍ഗ്രസിന്‍റെയും ബിജെപിയുടെയും വോട്ടില്‍ വിള്ളല്‍ വീഴ്‌ത്താന്‍ സലിമിന് കഴിയുമോ? 2019ലെ തെരഞ്ഞെടുപ്പിലൂടെ ഒന്ന് കണ്ണോടിച്ചാല്‍ ഇല്ലെന്ന ഉത്തരമാകും കിട്ടുക. കഴിഞ്ഞ ലോക്‌സഭ തെരഞ്ഞെടുപ്പില്‍ കോണ്‍ഗ്രസും ഇടതു പാര്‍ട്ടികളും തമ്മില്‍ യാതൊരു സഖ്യവും ഉണ്ടായിരുന്നില്ല. അത് കൊണ്ട് തന്നെ ആ തെരഞ്ഞെടുപ്പില്‍ ചതുഷ്‌കോണ മത്സരമാണ് അരങ്ങേറിയത്. ഫലം എന്താകുമെന്നത് പ്രവചിക്കാനും ആകുമായിരുന്നു.
തൃണമൂലിന്‍റെ അബു താഹെര്‍ വോട്ടുകളുടെ സിംഹഭാഗവും സ്വന്തം കൈപ്പിടിയിലൊതുക്കി. 6,04,346 വോട്ടുകള്‍ നേടി അദ്ദേഹം വിജയിച്ചു. ബിജെപിയുടെ ഹുമയൂണ്‍ കബീറിന് 2,47,809 വോട്ടുകളേ നേടാനായുള്ളൂ. കോണ്‍ഗ്രസിന്‍റെ അബു ഹെനയ്ക്ക് 3,77,929 വോട്ടുകളാണ് സ്വന്തമാക്കാനായത്. സിപിഎമ്മിന്‍റെ ബദ്റുദോസ ഖാന് കേവലം 1,80,793 വോട്ടുകളേ നേടാനായുള്ളൂ.