മക്ക: വിശ്വമഹാസംഗമത്തിനൊരുങ്ങി അറഫ മൈതാനം. ശനിയാഴ്‌ച (ജൂണ്‍ 15) ഉച്ചയോടെ ആരംഭിക്കുന്ന അറഫ പ്രഭാഷണത്തോടെ ചടങ്ങുകള്‍ക്ക് തുടക്കമാകും. പ്രവാചകന്‍ മുഹമ്മദ് നബി ഹജ്ജ് ദിനത്തില്‍ നടത്തിയ പ്രഭാഷണത്തെ അനുസ്‌മരിച്ച് മസ്‌ജിദുനമിറയിലാണ് പ്രഭാഷണം നടക്കുക. 20 ലക്ഷത്തിലേറെ ഹാജിമാരാണ് ഇത്തവണ അറഫയില്‍ സംഗമിക്കുക.
മധ്യാഹനം മുതല്‍ സൂര്യാസ്‌തമയം വരെയാണ് തീര്‍ഥാടകര്‍ അറഫയില്‍ സംഗമിക്കുക. ഹറം ഇമാം ഡോ. മാഹിര്‍ ബിന്‍ ഹമദ് അല്‍മുഹൈഖ്‌ലിയാണ് ഇത്തവണ അറഫ പ്രഭാഷണത്തിനെത്തുക. അറബിയില്‍ നടത്തുന്ന പ്രഭാഷണം മലയാളം ഉള്‍പ്പെടെ 50 ഭാഷകളില്‍ വിവര്‍ത്തനം ചെയ്യപ്പെടും. പ്രഭാഷണത്തിനിടെ ളുഹ്‌ര്‍ നമസ്‌കാരവും അതിന് ശേഷമുള്ള അസറും ഹറമില്‍ തീര്‍ഥാടകര്‍ ഒരുമിച്ച് നിര്‍വഹിക്കും. തുടര്‍ന്ന് ഒന്നിച്ചിരുന്ന് പ്രാര്‍ഥനകളില്‍ മുഴുകും.