ന്യൂഡൽഹി:മഹാത്മാ ഗാന്ധി, ബി ആർ അംബേദ്‌ക്കര്‍, ഛത്രപതി ശിവജി തുടങ്ങിയവരുടെ പ്രതിമകൾ പാർലമെന്‍റ് വളപ്പിനുള്ളിൽ മാറ്റി സ്ഥാപിച്ചു. ലാൻഡ്‌സ്‌കേപ്പിങ്ങിന്‍റെ ഭാഗമായി, പാർലമെന്‍റ് ഹൗസിന് മുന്നിലുള്ള പ്രാധാന്യമുള്ള സ്ഥലങ്ങളിൽ നിന്നാണ് പ്രതിമകള്‍ നീക്കം ചെയ്‌തത്. കോൺഗ്രസ് ഈ നീക്കത്തെ നിശിതമായി വിമർശിച്ച് രംഗത്തുവന്നു.
ആദിവാസി നേതാവ് ബിർസ മുണ്ടയുടെയും മഹാറാണാ പ്രതാപിന്‍റെയും പ്രതിമകൾ ഇപ്പോൾ പഴയ പാർലമെന്‍റ് മന്ദിരത്തിനും പാർലമെന്‍റ് ലൈബ്രറിക്കും ഇടയിലുള്ള പുൽത്തകിടിയിലാണ്. ഛത്രപതി ശിവാജി മഹാരാജ്, മഹാത്മാ ഗാന്ധി, ഡോ. ബാബാസാഹെബ് അംബേദ്‌കർ എന്നിവരുടെ പ്രതിമകൾ പാർലമെന്‍റ് മന്ദിരത്തിന് മുന്നിലെ പ്രധാന സ്ഥലങ്ങളിൽ നിന്ന് മാറ്റി.ഈ നടപടി ക്രൂരമാണെന്ന് കോൺഗ്രസ് ജനറൽ സെക്രട്ടറി ജയറാം രമേശ് പറഞ്ഞു.
മഹാരാഷ്‌ട്രയിലെ വോട്ടർമാർ ബിജെപിക്ക് വോട്ട് ചെയ്യാതിരുന്നപ്പോൾ ശിവാജിയുടെയും അംബേദ്‌ക്കറിന്‍റെയും പ്രതിമകൾ പാർലമെന്‍റിലെ യഥാർത്ഥ സ്ഥലത്ത് നിന്ന് നീക്കം ചെയ്‌തതായി കോൺഗ്രസിന്‍റെ മാധ്യമ, പബ്ലിസിറ്റി വിഭാഗം മേധാവി പവൻ ഖേര പറഞ്ഞു. ഗുജറാത്തിൽ വ്യക്തമായ ഭൂരിപക്ഷം ലഭിക്കാതെ വന്നപ്പോൾ അവർ മഹാത്മാഗാന്ധിയുടെ പ്രതിമ പാർലമെന്‍റിലെ യഥാർത്ഥ സ്ഥലത്ത് നിന്ന് നീക്കം ചെയ്‌തു, അദ്ദേഹം പറഞ്ഞു. "ഒന്ന് ചിന്തിക്കൂ, അവർക്ക് 400 സീറ്റുകൾ നൽകിയിരുന്നെങ്കിൽ, അവർ ഭരണഘടനയെ ഒഴിവാക്കുമായിരുന്നോ?"
ലോക്‌സഭ സെക്രട്ടേറിയറ്റിന്‍റെ വിശദീകരണം: പാർലമെന്‍റ് വളപ്പിലെ വിവിധ സ്ഥലങ്ങളിൽ സ്ഥിതി ചെയ്യുന്നതിനാൽ സന്ദർശകർക്ക് ഈ പ്രതിമകൾ സൗകര്യപ്രദമായി കാണാൻ കഴിയുന്നില്ലെന്ന് ലോക്‌സഭ സെക്രട്ടേറിയറ്റ് പിന്നീട് പ്രസ്‌താവനയിൽ പറഞ്ഞു. "ഇക്കാരണത്താൽ, ഈ പ്രതിമകളെല്ലാം പാർലമെന്‍റ് ഹൗസ് വളപ്പിലെ 'പ്രേരണ സ്ഥൽ' എന്നയിടത്തേക്ക് ബഹുമാനപൂർവ്വം സ്ഥാപിക്കുന്നു. പാർലമെൻ്റ് സമുച്ചയം സന്ദർശിക്കാൻ വരുന്ന സന്ദർശകർക്ക് ഈ പ്രതിമകൾ വീക്ഷിക്കാവുന്ന തരത്തിലാണ് ഈ 'പ്രേരണ സ്ഥൽ' വികസിപ്പിക്കുന്നത്" എന്നും ലോക്‌സഭ സെക്രട്ടേറിയേറ്റ് വ്യക്‌തമാക്കി.
പാർലമെന്‍റ് ഹൗസ് സമുച്ചയം ലോക്‌സഭ സ്‌പീക്കറുടെ അധികാരപരിധിയിൽ വരുന്നതാണെന്നും നേരത്തെ സ്‌പീക്കറുടെ അനുമതിയോടെ കോംപ്ലക്‌സിനുള്ളിൽ പ്രതിമകൾ മാറ്റിയിട്ടുണ്ടെന്നും ലോക്‌സഭ സെക്രട്ടേറിയറ്റ് പറഞ്ഞു. “പാർലമെന്‍റ് ഹൗസ് കോംപ്ലക്‌സിൽ നിന്ന് ഒരു മഹാനായ വ്യക്തിയുടെയും പ്രതിമ നീക്കം ചെയ്‌തിട്ടില്ലെന്ന് വ്യക്തമാണ്, പകരം അവ പാർലമെന്‍റ് ഹൗസ് സമുച്ചയത്തിനുള്ളിൽ ചിട്ടയായും മാന്യമായും സ്ഥാപിക്കുകയാണ്,” പ്രസ്‌താവനയിൽ പറയുന്നു.
ആധുനിക സാങ്കേതിക വിദ്യയിലൂടെ ഈ മഹത് വ്യക്തികളുടെയും സ്വാതന്ത്ര്യ സമര സേനാനികളുടെയും ജീവിതത്തെയും സംഭാവനകളെയും കുറിച്ചുള്ള വിശദമായ വിവരങ്ങൾ സന്ദർശകർക്ക് നൽകുന്നതിനുള്ള ക്രമീകരണങ്ങളും ഒരുക്കുന്നുണ്ടെന്ന് ലോകസഭാ സെക്രട്ടേറിയറ്റ് എക്‌സിൽ ഹിന്ദിയിൽ എഴുതിയ പോസ്‌റ്റിൽ പറഞ്ഞു. സന്ദർശിക്കുന്ന ആളുകൾക്ക് അവരുടെ ജീവിതത്തിലും ചിന്തകളിലും പ്രചോദനം ലഭിക്കുന്നതിനുതകും വിധമാണ് പ്രേരണ സ്ഥലം ഒരുക്കുന്നത്. ഗാന്ധിജി, ശിവജി, മഹാത്മാ ജ്യോതിബ ഫൂലെ എന്നിവരുടേത് ഉൾപ്പെടെയുള്ള ദേശീയ പ്രതിമകൾ പഴയ പാർലമെന്‍റ് മന്ദിരത്തിന്‍റെ അഞ്ചാം നമ്പർ ഗേറ്റിന് സമീപമുള്ള പുൽത്തകിടിയിലേക്ക് മാറ്റാൻ തീരുമാനിച്ചു, അതിന് സംവിധാൻ സദൻ എന്ന് പേരിട്ടു. രാഷ്‌ട്രപതിക്കും പ്രധാനമന്ത്രിക്കും പുതിയ പാർലമെന്‍റ് മന്ദിരത്തിലേക്ക് പ്രവേശിക്കാൻ ഉപയോഗിക്കുന്ന ഗജദ്വാരത്തിന് മുന്നിൽ വിശാലമായ പുൽത്തകിടി സൃഷ്‌ടിക്കുന്നതിന് ഇത് വഴിയൊരുക്കും. സാധാരണയായി ബജറ്റ് സമ്മേളനത്തിൽ പാർലമെന്‍റിന്‍റെ സംയുക്ത സമ്മേളനത്തിൽ രാഷ്‌ട്രപതിയുടെ പ്രസംഗം പോലുള്ള ഔദ്യോഗിക ചടങ്ങുകൾക്കും പുൽത്തകിടി ഉപയോഗിക്കാം.
അപലപിച്ച് സിപിഎം: പ്രതിമകൾ യഥാസ്ഥാനത്ത് നിന്ന് നീക്കം ചെയ്യാനുള്ള നീക്കം സ്വാതന്ത്ര്യം, സ്വാതന്ത്ര്യം, സമത്വം എന്നീ ആശയങ്ങളോടുള്ള അവഹേളനമാണെന്ന് സിപിഐ ജനറൽ സെക്രട്ടറി ഡി രാജ പറഞ്ഞു. "മഹാത്മാഗാന്ധി, ഡോ. അംബേദ്‌ക്കർ, ഛത്രപതി ശിവജി എന്നിവരുടെ പ്രതിമകൾ പാർലമെന്‍റ് മന്ദിരത്തിൽ മാറ്റി സ്ഥാപിക്കാനുള്ള ഏകപക്ഷീയമായ തീരുമാനം അപലപനീയമാണെന്നും അദ്ദേഹം പറഞ്ഞു.
പാർലമെന്‍റ് മന്ദിര പരിസരത്ത് നിന്ന് ഗാന്ധിജി, ഡോ. അംബേദ്‌ക്കർ, ഛത്രപതി ശിവജി എന്നിവരുടെ പ്രതിമകൾ മാറ്റി സ്ഥാപിക്കുന്നത് സംബന്ധിച്ച് സർക്കാരിന്‍റെ ഏകപക്ഷീയമായ നീക്കത്തിനെതിരെ സിപിഐ പാർലമെന്‍ററി ഗ്രൂപ്പ് നേതാവ് ബിനോയ് വിശ്വം പ്രധാനമന്ത്രി നരേന്ദ്ര മോദിക്ക് കത്തയച്ചു. ഈ പ്രതിമകൾ വെറുമൊരു ലോഹവും ഇഷ്‌ടികയും ചാന്തും അല്ലെന്നും കൊളോണിയൽ പിടിയിൽ നിന്ന് സ്വാതന്ത്ര്യം തട്ടിയെടുത്ത ശേഷം നമ്മുടെ ജനതയുടെ വിമോചനത്തിനും സമത്വത്തിനും അദമ്യമായ ചൈതന്യത്തിനും വേണ്ടിയുള്ള നമ്മുടെ രാജ്യത്തിന്‍റെ പോരാട്ടത്തിന്‍റെ മൂർത്തീഭാവമാണെന്നും സിപിഐ എംപി കത്തിൽ ചൂണ്ടിക്കാട്ടി. ഡോ. അംബേദ്‌ക്കറെയും ഗാന്ധിജിയെയും പ്രധാനമന്ത്രിയുടെ പാർട്ടിയും മാതൃസംഘടനയും ദശാബ്‌ദക്കാലമായി അവഗണിച്ചതാണ് പാർട്ടിയെ ഇന്ത്യയിലെ ജനങ്ങൾ തിരസ്‌കരിക്കുന്നതിലേക്ക് നയിച്ചതെന്നും അദ്ദേഹം പരാമർശിച്ചു. നമ്മുടെ ചരിത്രത്തെയും ദേശീയ ഐക്കണുകൾക്കായി സംവരണം ചെയ്‌ത പ്രാധാന്യമുള്ള സ്ഥലങ്ങളെയും അട്ടിമറിക്കരുതെന്ന് സിപിഐ എംപി പ്രധാനമന്ത്രിയോട് അഭ്യർത്ഥിച്ചു.
Also Read:ജൂൺ എട്ടിനല്ല, മോദിയുടെ സത്യപ്രതിജ്ഞ തീയതിയിൽ മാറ്റമെന്ന് റിപ്പോർട്ട്
