കൊല്‍ക്കത്ത: ഡല്‍ഹി വിമാനത്താവളത്തിലെ ഒന്നാം ടെര്‍മിനലില്‍ മേല്‍ക്കൂര തകര്‍ന്ന് വീണ സംഭവത്തില്‍ കേന്ദ്ര സര്‍ക്കാരിനെതിരെ രൂക്ഷ വിമര്‍ശനവുമായി തൃണമൂല്‍ കോണ്‍ഗ്രസ് രംഗത്ത്. പ്രധാനമന്ത്രി നരേന്ദ്രമോദിയുടെ ഉറപ്പുകളെല്ലാം തകരാന്‍ തുടങ്ങിയെന്ന് ടിഎംസി പരിഹസിച്ചു.
വിമാനത്താവളത്തിന്‍റെ മേല്‍ക്കൂര തകര്‍ന്നതിനെ കുറിച്ച് വ്യോമയാന മന്ത്രി കെ രാം മോഹന്‍ നായിഡു അന്വേഷണം പ്രഖ്യാപിച്ചു. അപകടത്തില്‍ ഒരാള്‍ മരിക്കുകയും ആറു പേര്‍ക്ക് പരിക്കേല്‍ക്കുകയും ചെയ്‌തിരുന്നു. പ്രധാനമന്ത്രി നരേന്ദ്ര മോദിയുടെ നുണകള്‍ക്ക് മേല്‍ നിരത്തിയ ഗ്യാരന്‍റികളെല്ലാം തകര്‍ന്ന് വീഴുകയാണെന്ന് ടിഎംസി സാമൂഹ്യ മാധ്യമ പോസ്റ്റില്‍ ആരോപിച്ചു.
മോദി ധൃതി പിടിച്ച് ഉദ്ഘാടനം ചെയ്‌ത കെട്ടിടത്തിന്‍റെ മേല്‍ക്കൂരയാണ് പൊളിഞ്ഞ് വീണത്. മാര്‍ച്ചിലായിരുന്നു ഇതിന്‍റെ ഉദ്ഘാടനം. തെരഞ്ഞെടുപ്പ് ലക്ഷ്യമിട്ട് പണി പൂര്‍ത്തിയാകും മുമ്പ് ഉദ്ഘാടനം നിര്‍വഹിക്കുകയായിരുന്നുവെന്നും ടിഎംസി എക്‌സില്‍ കുറിച്ചു.