ഗുവാഹത്തി: പക്ഷികള്‍ ആത്മഹത്യ ചെയ്‌തിരുന്ന ഒരു നിഗൂഢ സ്ഥലമുണ്ട് അസമില്‍. അസമിലെ മനോഹര പ്രദേശമായ ദിമ ഹസാവോ ജില്ലയിൽ സ്ഥിതി ചെയ്യുന്ന ജതിംഗയിലാണ് ദേശാടനക്കിളികള്‍ കൂട്ടത്തോടെ ആത്മഹത്യ ചെയ്‌തിരുന്നത്. 6 പതിറ്റാണ്ടോളം നീണ്ടുനിന്ന ജതിംഗയിലെ പക്ഷികളുടെ ആത്മഹത്യ കുറേക്കാലം ചുരുളഴിയാത്ത രഹസ്യമായിരുന്നു.
ഈ വിചിത്ര സംഭവത്താൽ ജതിംഗ ഇതിനോടകം ആഗോള ശ്രദ്ധ ആകർഷിച്ചിട്ടുണ്ട്. 70-കൾ മുതൽ 90-കൾ വരെ ഈ നിഗൂഢത പ്രദേശത്തെ ആകെ വിഴുങ്ങിയിരുന്നു.
അന്ധവിശ്വാസങ്ങളും ശാസ്‌ത്രീയ വിശദീകരണവും:
ജതിംഗയിലെത്തുന്ന ദേശാടന പക്ഷികള്‍ കൂട്ടത്തോടെ ചത്തുവീഴുന്നത് പല നിഗൂഢ കഥകളും പ്രചരിക്കാന്‍ കാരണമായിട്ടുണ്ട്. ചിലർ ഇത് ഒരു അമാനുഷിക പ്രതിഭാസമാണെന്ന് വിശ്വസിച്ചു. വൈദ്യുത കാന്തിക ശക്തികളാണ് കാരണമെന്ന് മറ്റു ചിലര്‍.
An arch welcoming visitors to Jatinga village in Assam (ETV Bharat)
കൗതുകവും നിഗൂഢതയും സമന്വയിച്ച ഈ സംഭവം ബോംബെ നാച്വറൽ ഹിസ്റ്ററി സൊസൈറ്റി (ബിഎൻഎച്ച്എസ്) പോലുള്ള പ്രശസ്‌ത സ്ഥാപനങ്ങൾ ഉൾപ്പെടെ ലോകമെമ്പാടുമുള്ള പക്ഷിശാസ്‌ത്രജ്ഞരുടെ ശ്രദ്ധ പിടിച്ചുപറ്റി.
പ്രാദേശിക ഗോത്രവർഗ സമൂഹങ്ങൾക്കിടയിൽ അമാനുഷിക ശക്തികളുടെ വിശ്വാസം കൂടി വേരൂന്നിയ സാഹചര്യത്തില്‍ ഈ നിഗൂഢതയുടെ ചുരുളഴിക്കുന്നത് വെല്ലുവിളിയായി.
the Carcass of a Migratory Bird (ETV Bharat)
ജതിംഗ, പക്ഷി ആത്മഹത്യകള്‍ക്ക് ലോകപ്രശസ്‌തം
അസമിലെ ദിമ ഹസാവോ ജില്ലയിൽ സ്ഥിതി ചെയ്യുന്ന ജതിംഗ, കുന്നുകളാൽ ചുറ്റപ്പെട്ട ഒരു താഴ്‌വരയാണ്. 70 കളിലും 80 കളിലുമാണ് ജതിംഗയിൽ ആ വിചിത്ര പ്രതിഭാസം അരങ്ങേറിയത്. എല്ലാ വർഷവും ആഗസ്‌ത് അവസാനം മുതൽ നവംബർ വരെ, ദേശാടന പക്ഷികളുടെ കൂട്ടം, രാത്രിയിൽ ഇവിടെയെത്തും. എന്നാല്‍ ഇവിടെയെത്തുന്ന പക്ഷികള്‍ ജീവനോടെ മടങ്ങില്ല. ജതിംഗയിലെത്തുന്ന ദേശാടന പക്ഷികള്‍ ചത്തുവീഴാറാണ് പതിവ്. ഇത് പ്രാദേശത്തെ ജനങ്ങളെയാകെ ആശങ്കയിലാക്കി.
ഇപ്പോൾ ജതിംഗയിലെ ദേശാടന പക്ഷികളുടെ സംരക്ഷണത്തിലും സംരക്ഷണത്തിലും ഏർപ്പെട്ടിരിക്കുന്ന പ്രാദേശിക സാമൂഹിക പ്രവർത്തകന്‍ ജോസ്റിംഗ്‌ദാവോ ഫോൺഗ്ലോ, ഇടിവി ഭാരതുമായി ഒരു പഴയ കഥ പങ്കുവെച്ചു. 'പതിറ്റാണ്ടുകൾക്ക് മുമ്പ്, ജതിംഗയിലെ ഗ്രാമവാസികൾ വിറകിൽ ഭക്ഷണം പാകം ചെയ്യുകയായിരുന്നു. പെട്ടെന്ന്, ഒരു പക്ഷി തീയിൽ വീണ് ചത്തു. ഈ പക്ഷിയെ പിന്തുടർന്ന് നിരവധി പക്ഷികൾ തീയിലേക്ക് ചാടി. അമാനുഷിക ശക്തിയാണ് ഇതിന് കാരണം എന്ന് ഭയന്ന ഗ്രാമവാസികൾ ഇവിടം ഉപേക്ഷിച്ച് പലായനം ചെയ്‌തു. ജതിംഗയിലെ പക്ഷികളുടെ മരണത്തിന്‍റെ നിഗൂഢ സ്വഭാവത്തിന് ഈ സംഭവം ബലം നല്‍കി.
ജതിംഗയുടെ ഭൂമിശാസ്‌ത്രപരമായ സ്ഥാനവും അതുല്യമായ സവിശേഷതകളുമാണ് പ്രദേശത്തെ വേറിട്ടു നിര്‍ത്തുന്നത്. 90-കളില്‍ ബിഎന്‍എച്ച്എസ് ശാസ്‌ത്രജ്ഞരും മറ്റ് ഗവേഷകരും ഈ പ്രതിഭാസത്തെക്കുറിച്ച് പഠിക്കാൻ എത്തുന്നതു വരെ ജതിംഗ പക്ഷികളുടെ ഒരു ബർമുഡ ട്രയാംഗിളായി തന്നെയാണ് വിശ്വസിച്ച് പോന്നിരുന്നത്. ഇത് പൊതുജനങ്ങളെയും മാധ്യമങ്ങളെയും ഒരുപോലെ ആകർഷിച്ചു. വർഷങ്ങളോളം, പക്ഷിശാസ്‌ത്രജ്ഞർക്കും വിദഗ്‌ധർക്കും ഈ ദേശാടന പക്ഷികളുടെ മരണത്തെക്കുറിച്ച് വിശദീകരിക്കാൻ കഴിഞ്ഞില്ല. അവ 'പക്ഷി ആത്മഹത്യകൾ' ആയിത്തന്നെ നിലനിന്നു.
വാസ്‌തവത്തിൽ, സെപ്‌തംബർ മുതൽ നവംബർ വരെയാണ് ദേശാടന പക്ഷികൾ ജതിംഗയിലെത്തുന്നത്. ഈ പ്രദേശത്തെ മൂടൽമഞ്ഞുള്ള രാത്രികളും മനുഷ്യവാസ കേന്ദ്രങ്ങളിൽ നിന്നുള്ള കൃത്രിമ പ്രകാശ സ്രോതസുകളും ഈ പക്ഷികളെ ആകർഷിക്കുന്നതാണ്.
തെക്ക് നിന്ന് വടക്കോട്ട് പറക്കുമ്പോൾ പക്ഷികള്‍ വിളക്കുകളിലേക്ക് ആകർഷിക്കപ്പെടും. ഇടതൂർന്ന വനങ്ങളിലൂടെ പറക്കുമ്പോള്‍ മരങ്ങളിലും മുളകളിലും ഇടിക്കും. തുടര്‍ന്ന് പരിക്കേറ്റും വഴിതെറ്റിയും പറക്കാൻ കഴിയാതെ പക്ഷികള്‍ മരിക്കുകയാണ് ചെയ്യുന്നത്. പ്രകാശ സ്രോതസുകളിലേക്കുള്ള ആകർഷണമാണ് ഈ പ്രതിഭാസത്തിന്‍റെ മൂലകാരണം.
എന്തുകൊണ്ട് ദേശാടന പക്ഷികൾ ജതിംഗയിലേക്ക് ആകർഷിക്കപ്പെടുന്നു?
കുന്നുകളാൽ ചുറ്റപ്പെട്ട ഇടുങ്ങിയ താഴ്‌വരയാണ് ജതിംഗ. ഒരു വശത്ത് അസമിലെ ബരാക് താഴ്വരയും മറുവശത്ത് നാഗോൺ സമതലവുമാണ്. മറ്റ് രണ്ട് വശങ്ങളില്‍ ചിറാപുഞ്ചി, മണിപ്പൂർ എന്നിവയ്ക്ക് സമാനമായി മേഘാലയയിലെ മഴ സമൃദ്ധമായ പ്രദേശങ്ങളാണ്.
വർഷത്തിലെ പ്രത്യേക സമയങ്ങളിൽ ദേശാടന പക്ഷികൾ ഈ താഴ്‌വരയിലേക്ക് കൂട്ടമായി എത്തും. എന്നാൽ ദീർഘദൂരം പറക്കാന്‍ കഴിവുള്ള ഈ പക്ഷികൾ എന്തുകൊണ്ടായിരിക്കും ജതിംഗയിൽ ദുർബലപ്പെടുകയും വെളിച്ചത്തിന് കീഴടങ്ങുകയും ചെയ്യുന്നത്?
പ്രശസ്‌ത പ്രകൃതി ശാസ്‌ത്രജ്ഞനും ബോംബെ നാച്വറൽ ഹിസ്റ്ററി സൊസൈറ്റിയുടെ (ബിഎൻഎച്ച്എസ്) ഇന്ത്യാ ബേർഡ്സ് കൺസർവേഷൻ നെറ്റ്‌വർക്കിന്‍റെ (ഐബിസിഎൻ) അംഗവും മെഗാമിക്‌സ് നാച്വർ ക്ലബ്ബിന്‍റെ കൺവീനറുമായ ദേബജിത് ഫുകാൻ ഇതുമായി ബന്ധപ്പെട്ട് നിരവധി കാര്യങ്ങള്‍ വിശദീകരിക്കുന്നു.
'ജതിംഗ ഒരു ഇടുങ്ങിയ താഴ്ന്ന താഴ്‌വരയാണ്. ദേശാടന പക്ഷികളുടെ എണ്ണം വർദ്ധിക്കുന്നതിനനുസരിച്ച് ഭക്ഷ്യക്ഷാമം ഒരു പ്രശ്നമായി മാറുന്നു. പട്ടിണി മൂലം ദുർബലരാകുന്ന ഈ പക്ഷികൾക്ക് ഈ പ്രദേശത്ത് ദീർഘദൂരം പറക്കാന്‍ കഴിയില്ല.
രണ്ടാമതായി, ദേശാടന സീസണിൽ ജതിംഗയിലെ ഈർപ്പത്തിന്‍റെ അളവും ഗണ്യമായി കുറയുന്നു. ആവശ്യത്തിന് ഓക്സിജൻ ലഭിക്കാത്ത പക്ഷികൾ ദുർബലരാവുകയും വായു തേടി മുകളിലേക്ക് പറക്കുകയും ചെയ്യും. പരന്ന ഭൂപ്രദേശങ്ങളിൽ ഇത് പക്ഷികുളുടെ ആരോഗ്യം ക്ഷയിക്കുന്നതിലേക്ക് നയിക്കും. തൽഫലമായി, ഏത് പ്രകാശ സ്രോതസ്സും ഈ ദുർബലരായ പക്ഷികളെ ആകർഷിക്കും.പ്രകാശം തേടിപ്പോകുന്ന വഴിയില്‍ അവ ദിശതെറ്റിയും നശിക്കും.
മുൻകാലങ്ങളിൽ പ്രദേശവാസികൾ ഈ പക്ഷികളെ കെണിവെച്ച് പിടിച്ച് കൊല്ലുമായിരുന്നു. ഇത് യഥാർത്ഥത്തിൽ പക്ഷികളുടെ ആത്മഹത്യയല്ല. തീര്‍ത്തും ഭൂമിശാസ്‌ത്രപരവും കാലാവസ്ഥാ ഘടകങ്ങളുടെ അനന്തര ഫലവുമാണ്'.
കാരണം മനുഷ്യന്‍
'പ്രകാശ സ്രോതസുകളിലേക്ക് ആകർഷിക്കപ്പെട്ട ദുർബലരായ പക്ഷികളെ യഥാർത്ഥത്തിൽ മനുഷ്യർ കൊന്നൊടുക്കുകയാണ് ഉണ്ടായത്. ഭക്ഷണത്തിനായി ഈ പക്ഷികളെ വേട്ടയാടുന്ന പരമ്പരാഗത രീതി പ്രദേശവാസികൾക്കുണ്ടായിരുന്നു. ശാസ്‌ത്രീയമായ ധാരണയുടെ അഭാവം പക്ഷികൾ ആത്മഹത്യ ചെയ്യുന്നുവെന്ന വിശ്വാസത്തിലേക്ക് നയിച്ചു'- ദേബജിത് ഫുകാൻ വിശദീകരിച്ചു.
ജതിംഗയിലെ ഗ്രാമവാസികൾ ഭക്ഷണത്തിനായി പക്ഷികളെ കെണിയിലാക്കി കൊല്ലാറുണ്ടായിരുന്നു. ഒരു ഘട്ടം കഴിഞ്ഞപ്പോള്‍ അവര്‍ക്കത് വിനോദമായി. മണ്ണെണ്ണ വിളക്കുകളും ശക്തിയേറിയ ഹാലൊജൻ ലൈറ്റുകളും ഉപയോഗിച്ച് പക്ഷികളെ ആകർഷിച്ചാണ് കെണിയിലാക്കുന്നത്.
സംരക്ഷണ ശ്രമങ്ങള്‍:
2010-ൽ, ബ്ലൂ ഹിൽസ് സൊസൈറ്റി, എൻജിഒ, വനം വകുപ്പ്, നോർത്ത് കാച്ചാർ ഹിൽസ് ഓട്ടോണമസ് കൗൺസിൽ, ജില്ലാ ഭരണകൂടം എന്നിവയുടെ സഹകരണത്തോടെ പക്ഷി വേട്ടയ്‌ക്കെതിരെ ബോധവത്കരണ കാമ്പെയ്‌നുകൾ നടത്തി. തൽഫലമായി, ജതിംഗയിലെ പക്ഷി വേട്ട ഗണ്യമായി കുറഞ്ഞു.
ഫോംഗ്ലോ പറയുന്നു, 'പക്ഷി വേട്ടയ്‌ക്ക് ജില്ലാ ഭരണകൂടം നിരോധനം ഏർപ്പെടുത്തിയിട്ടുണ്ട്, ഇത് പക്ഷികളുടെ മരണ നിരക്ക് കുറയുന്നതിന് കാരണമായി. കൂടാതെ, ദേശാടന പക്ഷി സംരക്ഷണത്തെക്കുറിച്ചും സംരക്ഷണത്തെക്കുറിച്ചും അവബോധം വളർത്തുന്നതിനായി നോർത്ത് കച്ചാർ ഹിൽസ് സ്വയംഭരണ കൗൺസിൽ എല്ലാ വർഷവും ജതിംഗ ഫെസ്റ്റിവൽ സംഘടിപ്പിക്കുന്നുണ്ട്. ഈ ഉത്സവം ക്രമേണ ആഭ്യന്തര, അന്തർദേശീയ വിനോദ സഞ്ചാരികളുടെ ഒരു പ്രധാന ആകർഷണമായി മാറുകയും ചെയ്‌തു.
ജതിംഗ ഇപ്പോഴും ഒരു നിഗൂഢമോ?
പക്ഷികളുടെ ആത്മഹത്യാ കേന്ദ്രമെന്ന പേരില്‍ ജതിംഗ ഇപ്പോൾ നിഗൂഢ സ്ഥലമല്ല. ദേശാടന പക്ഷികളെ സംരക്ഷിക്കുന്നതിലാണ് ഇപ്പോള്‍ ഇവിടെ ശ്രദ്ധ. രണ്ട് ദശാബ്‌ദങ്ങൾക്ക് മുമ്പ് ഈ നിഗൂഢത നീക്കിയെങ്കിലും ജതിംഗയിലെ പക്ഷി സംരക്ഷണത്തിന് വെല്ലുവിളികൾ ഇപ്പോഴുമുണ്ട്. സാങ്കേതിക പുരോഗതിയും മനുഷ്യരുടെ കടന്നുകയറ്റവും മൂലം ജതിംഗയിലെ ദേശാടന പക്ഷികളുടെ ആവാസവ്യവസ്ഥ ഭീഷണി അഭിമുഖീകരിക്കുകയാണ്.
ജോസ്റിംഗ്‌ദാവോ ഫോംഗ്ലോ പറയുന്നു, 'ജതിംഗ സന്ദർശിക്കുന്ന ദേശാടന പക്ഷികളുടെ എണ്ണം മുൻകാലങ്ങളെ അപേക്ഷിച്ച് കുറഞ്ഞു. അവ ഇപ്പോൾ ജതിംഗയ്ക്ക് സമീപമുള്ള ദോഹിംഗ് ഗ്രാമത്തിലേക്കാണ് ചേക്കേറുന്നത്. കാലാവസ്ഥാ വ്യതിയാനവും വികസന പ്രവർത്തനവുമാണ് ഈ മാറ്റത്തിന് പ്രധാന കാരണം.
കാലാവസ്ഥാ വ്യതിയാനം മൂലം ഈർപ്പത്തിന്‍റെ അളവ് കുറയുന്നതും മഴ കുറയുന്നതും ദേശാടന പക്ഷികളുടെ എണ്ണം കുറയുന്നതിന് കാരണമായി. മനുഷ്യ പ്രവർത്തനങ്ങളിൽ നിന്നുള്ള ജൈവ സമ്മർദ്ദങ്ങളും ജതിംഗയുടെ ആവാസ വ്യവസ്ഥയെ ബാധിക്കുന്നുണ്ട്.'- ദേബജിത് ഫുകാൻ പറയുന്നു.
