5ಜಿ ಡೇಟಾ ಬಳಕೆ 4ಜಿಗಿಂತ 4 ಪಟ್ಟು ವೇಗದಲ್ಲಿ ಹೆಚ್ಚಳ: ವರದಿ

ಭಾರತದಲ್ಲಿ 5ಜಿ ಡೇಟಾ ಬಳಕೆ ಗಮನಾರ್ಹ ಪ್ರಮಾಣದಲ್ಲಿ ಹೆಚ್ಚಾಗುತ್ತಿದೆ ಎಂದು ವರದಿ ಹೇಳಿದೆ.

ನವದೆಹಲಿ: 4 ಜಿಗೆ ಹೋಲಿಸಿದರೆ ಭಾರತದಲ್ಲಿ 5 ಜಿ ಬಳಕೆದಾರರು ಸುಮಾರು 3.6 ಪಟ್ಟು ಹೆಚ್ಚು ಮೊಬೈಲ್ ಡೇಟಾ ಟ್ರಾಫಿಕ್ ಬಳಸುತ್ತಿದ್ದಾರೆ ಎಂದು ವರದಿಯೊಂದು ಬುಧವಾರ ತೋರಿಸಿದೆ. 2022 ರ ಅಕ್ಟೋಬರ್​ನಲ್ಲಿ 5ಜಿ ನೆಟ್​ವರ್ಕ್​ ಅನ್ನು ಪ್ರಧಾನ ಮಂತ್ರಿ ನರೇಂದ್ರ ಮೋದಿ ಅನಾವರಣಗೊಳಿಸಿದ್ದರು.

ಪ್ರತಿ ಬಳಕೆದಾರರಿಗೆ ಸರಾಸರಿ ಮಾಸಿಕ 5ಜಿ ಡೇಟಾ ಟ್ರಾಫಿಕ್ 2023 ರಲ್ಲಿ ವರ್ಷದಿಂದ ವರ್ಷಕ್ಕೆ ಶೇಕಡಾ 24 ರಷ್ಟು ಏರಿಕೆಯಾಗಿದ್ದು, ಪ್ರತಿ ಬಳಕೆದಾರರಿಗೆ ತಿಂಗಳಿಗೆ 24.1 ಗಿಗಾಬೈಟ್​ಗಳಿಗೆ ತಲುಪಿದೆ. ಭಾರತದಲ್ಲಿ 5 ಜಿ ಸ್ಮಾರ್ಟ್​ಫೋನ್​ಗಳ ಬಳಕೆಯು ವೇಗವಾಗಿ ಹೆಚ್ಚಾಗುತ್ತಿದೆ. ದೇಶದಲ್ಲಿ ಬಳಕೆಯಲ್ಲಿರುವ ಒಟ್ಟಾರೆ 796 ಮಿಲಿಯನ್ ಸಕ್ರಿಯ ಸ್ಮಾರ್ಟ್​ಫೋನ್​ಗಳ ಪೈಕಿ ಶೇ 17ರಷ್ಟು ಅಂದರೆ 134 ಮಿಲಿಯನ್ ಸ್ಮಾರ್ಟ್​ಫೋನ್​ಗಳು 5ಜಿ ಸಾಧನಗಳಾಗಿವೆ.

'ನೋಕಿಯಾ ಮೊಬೈಲ್ ಬ್ರಾಡ್ ಬ್ಯಾಂಡ್ ಇಂಡೆಕ್ಸ್' ವರದಿ ಪ್ರಕಾರ, "ಭಾರತದಲ್ಲಿ 5 ಜಿ ಡೇಟಾ ಬಳಕೆಯು 4 ಜಿ ಗಿಂತ ನಾಲ್ಕು ಪಟ್ಟು ವೇಗವಾಗಿದೆ". 2023 ರಲ್ಲಿ ಬಳಕೆದಾರರು ಒಟ್ಟಾರೆಯಾಗಿ ತಿಂಗಳಿಗೆ 17.4 ಎಕ್ಸಾಬೈಟ್​ಗಳಷ್ಟು ಡೇಟಾ ಬಳಸಿದ್ದಾರೆ. ಕಳೆದ ಐದು ವರ್ಷಗಳಲ್ಲಿ ಸಿಎಜಿಆರ್ ದರ ಶೇಕಡಾ 26 ರಷ್ಟಿದೆ.

"5 ಜಿ ನೆಟ್​ವರ್ಕ್ ಆರಂಭವಾಗಿರುವುದು ಡೇಟಾ ಬಳಕೆ ಗಮನಾರ್ಹವಾಗಿ ಹೆಚ್ಚಾಗಲು ಕಾರಣವಾಗಿದೆ. 2023 ರಲ್ಲಿ ಒಟ್ಟಾರೆ ಡೇಟಾ ಟ್ರಾಫಿಕ್​ನಲ್ಲಿ 5ಜಿ ಡೇಟಾ ಬಳಕೆಯ ಪ್ರಮಾಣ ಶೇಕಡಾ 15 ರಷ್ಟಿದೆ" ಎಂಬುದು ಸಂಶೋಧನೆಯಲ್ಲಿ ತಿಳಿದು ಬಂದಿದೆ.

"ಭಾರತದಾದ್ಯಂತ 5 ಜಿ ತಂತ್ರಜ್ಞಾನದ ಅಸಾಧಾರಣ ಬೆಳವಣಿಗೆ ಮತ್ತು ಸೂಪರ್-ಫಾಸ್ಟ್ 5 ಜಿ ಡೇಟಾ ವೇಗಕ್ಕೆ ಬೇಡಿಕೆ ಹೆಚ್ಚುತ್ತಿರುವುದು ಸ್ಪಷ್ಟವಾಗಿದೆ" ಎಂದು ನೋಕಿಯಾ (ಭಾರತ) ಮೊಬೈಲ್ ನೆಟ್​ವರ್ಕ್ಸ್​ ವ್ಯವಹಾರದ ಮುಖ್ಯಸ್ಥ ತರುಣ್ ಛಾಬ್ರಾ ಹೇಳಿದರು.

ಎಲ್ಲ ಟೆಲಿಕಾಂ ವಲಯಗಳಲ್ಲಿ 5 ಜಿ ಟ್ರಾಫಿಕ್ ಗಮನಾರ್ಹ ಪ್ರಮಾಣದಲ್ಲಿ ಹೆಚ್ಚಾಗಿದೆ. ಅದರಲ್ಲೂ ಮೆಟ್ರೋ ನಗರಗಳಲ್ಲಿ 5ಜಿ ಬಳಕೆ ಅತ್ಯಧಿಕವಾಗಿದ್ದು, ಒಟ್ಟಾರೆ ಮೊಬೈಲ್ ಡೇಟಾ ಟ್ರಾಫಿಕ್​ನಲ್ಲಿ ಮೆಟ್ರೋ ನಗರಗಳು ಶೇಕಡಾ 20 ರಷ್ಟು ಪಾಲು ಪಡೆದುಕೊಂಡಿವೆ.

ವೇಗದ 5 ಜಿ ಲಭ್ಯತೆ ಮತ್ತು ಕಾರ್ಯಕ್ಷಮತೆ, ವ್ಯಾಪಕ ಶ್ರೇಣಿಯ ಕೈಗೆಟುಕುವ ಬೆಲೆಯ ಸ್ಮಾರ್ಟ್​ಪೋನ್​ಗಳ ಲಭ್ಯತೆ ಮತ್ತು ದೊಡ್ಡ ಪ್ರಮಾಣದಲ್ಲಿ ಡೇಟಾ ಬಳಸುವ ಹೊಸ ಅಪ್ಲಿಕೇಶನ್​ಗಳು ಮತ್ತು ಸೇವೆಗಳ ಪರಿಚಯವು ಭವಿಷ್ಯದ 5 ಜಿ ಬೆಳವಣಿಗೆಯನ್ನು ತೀವ್ರಗೊಳಿಸಲಿದೆ ಎಂದು ವರದಿ ತೋರಿಸಿದೆ.

ಇದನ್ನೂ ಓದಿ : ಗೇಮಿಂಗ್, ಇ-ಸ್ಪೋರ್ಟ್ಸ್​ ವಲಯದಲ್ಲಿ ಹೆಚ್ಚಿನ ಉದ್ಯೋಗಾವಕಾಶ ಸೃಷ್ಟಿಗೆ ಅವಕಾಶ: ಸಿಐಐ