ಲೋಕಸಭೆ ಚುನಾವಣೆಯಲ್ಲಿ ನಿರ್ಣಾಯಕ ಪಾತ್ರ ವಹಿಸುವರೇ ಯುವ ಮತದಾರರು? - Young Voters

2019ರ ಲೋಕಸಭಾ ಚುನಾವಣೆಗೆ ಹೋಲಿಸಿದರೆ ಈ ಬಾರಿ ರಾಜ್ಯದಲ್ಲಿ 18 -19 ವರ್ಷದ ಯುವ ಮತದಾರರ ಸಂಖ್ಯೆ 3,88,527ರಷ್ಟು ಹೆಚ್ಚಳವಾಗಿದೆ.

ಬೆಂಗಳೂರು: ಲೋಕಸಭಾ ಚುನಾವಣೆಯಲ್ಲಿ ನಿರ್ಣಾಯಕ ಪಾತ್ರ ವಹಿಸಲಿರುವ ಯುವ ಮತದಾರರ ಸಂಖ್ಯೆ ಗಣನೀಯವಾಗಿ ಹೆಚ್ಚಳವಾಗಿದೆ. ಮೊದಲ ಬಾರಿಗೆ ಮತದಾರರ ಪಟ್ಟಿಯಲ್ಲಿ ಹೆಸರು ನೋಂದಾಯಿಸಿಕೊಂಡಿರುವ ಯುವ ಮತದಾರರು ಮತಗಟ್ಟೆಗಳಿಗೆ ತೆರಳಿ ಮತದಾನ ಮಾಡಲು ಕಾತರದಿಂದ ಕಾಯುತ್ತಿದ್ದಾರೆ.

ಈ ಪೈಕಿ ರಾಜ್ಯದಲ್ಲಿ 18 ಮತ್ತು 19ನೇ ವಯಸ್ಸಿನ ಒಟ್ಟು 11,24,622 ಯುವ ಹಾಗೂ ಹೊಸ ಮತದಾರರು ಇದ್ದಾರೆ. ಇದರಲ್ಲಿ 6,05,068 ಪುರುಷ ಹಾಗೂ 5,19,438 ಮಹಿಳೆ ಹಾಗೂ 116 ತೃತೀಯ ಲಿಂಗಿ ಯುವ ಮತದಾರರು ಮತದಾರರ ಪಟ್ಟಿಯಲ್ಲಿ ಹೆಸರು ನೋಂದಾಯಿಸಿಕೊಂಡಿದ್ದಾರೆ. ಇದಕ್ಕೆ ಪೂರಕ ಎಂಬಂತೆ ಚುನಾವಣಾ ಆಯೋಗವು ಮತದಾನ ಮಾಡಲು ಯುವ ಮತದಾರರನ್ನು ಆಕರ್ಷಿಸಲು ಜಾಥಾ ಸೇರಿದಂತೆ ಹಲವು ಕಾರ್ಯಕ್ರಮಗಳನ್ನು ಹಮ್ಮಿಕೊಂಡಿದೆ.

ಯುವ ಮತದಾರರ ಮಾಹಿತಿ

ಮತಗಟ್ಟೆಗಳಿಗೆ ಬಂದು ಹೆಚ್ಚಿನ ಪ್ರಮಾಣದಲ್ಲಿ ಮತದಾನ ಮಾಡುವಂತೆ ಹಲವು ಜಾಗೃತಿ ಜಾಥಾ ಕಾರ್ಯಕ್ರಮಗಳನ್ನು ಆಯೋಜಿಸುತ್ತಿದೆ. ಅಲ್ಲದೇ, 18 ವರ್ಷ ತುಂಬಿದ ಯುವ ಮತದಾರರು ಮತದಾರರ ಪಟ್ಟಿಯಲ್ಲಿ ತಮ್ಮ ಹೆಸರು ನೋಂದಾಯಿಸಿಕೊಳ್ಳಲು ಅರ್ಹತಾ ದಿನಾಂಕವನ್ನು ಕಳೆದ ವರ್ಷ ಜನವರಿ 1, ಏಪ್ರಿಲ್ 1, ಜುಲೈ 1 ಹಾಗೂ ಅಕ್ಟೋಬರ್ 1 ಎಂದು ನಿಗದಿಪಡಿಸಲಾಗಿತ್ತು. ಈ ದಿನಾಂಕಗಳಂದು 18 ವರ್ಷ ತುಂಬಿದವರು ಯುವ ಮತದಾರರ ಪಟ್ಟಿಯಲ್ಲಿ ತಮ್ಮ ಹೆಸರನ್ನು ನೋಂದಾಯಿಸಬಹುದು ಎಂದು ಚುನಾವಣಾಧಿಕಾರಿಗಳು ತಿಳಿಸಿದ್ದರು.

ಭಾರತ ಚುನಾವಣಾ ಆಯೋಗ ಪ್ರಕಟಿಸಿರುವ ಪ್ರಸಕ್ತ ಲೋಕಸಭಾ ಚುನಾವಣೆಯಲ್ಲಿ ಕರ್ನಾಟಕದಲ್ಲಿ ಒಟ್ಟು 5,47,08,808 ಮತದಾರರಿದ್ದು, ಈ ಪೈಕಿ 2,71,21,407 ಪುರುಷ, 2,70,81,748 ಮಹಿಳಾ ಮತದಾರರು ಇದ್ದಾರೆ. ಕಳೆದ 2019ರ ಲೋಕಸಭಾ ಚುನಾವಣೆಗೆ ಹೋಲಿಸಿದರೆ 18-19 ವರ್ಷದ ಯುವ ಮತದಾರರ ಸಂಖ್ಯೆ 3,88,527ರಷ್ಟು ರಾಜ್ಯದಲ್ಲಿ ಹೆಚ್ಚಳವಾಗಿದೆ. ಇದರಲ್ಲಿ 1,97,046 ಪುರುಷ ಹಾಗೂ 1,9,453 ಮಹಿಳೆ ಹಾಗೂ 28 ಇತರೆ ಮತದಾರರು ಹೆಚ್ಚಾಗಿದ್ದಾರೆ. ಕಳೆದ ಚುನಾವಣೆಯಲ್ಲಿ 10,10,040 ಯುವ ಮತದಾರರು ಇದ್ದರು.

ಕ್ಷೇತ್ರವಾರು ಯುವ ಮತದಾರರ ವಿವರ:

ಲೋಕಸಭಾ ಕ್ಷೇತ್ರ	ಯುವ ಮತದಾರರ ಸಂಖ್ಯೆ	ಲೋಕಸಭಾ ಕ್ಷೇತ್ರ	ಯುವ ಮತದಾರರ ಸಂಖ್ಯೆ	ಲೋಕಸಭಾ ಕ್ಷೇತ್ರ	ಯುವ ಮತದಾರರ ಸಂಖ್ಯೆ
ಬೆಳಗಾವಿ	47,095	ದಾವಣಗೆರೆ	37,934	ಬೆಂಗಳೂರು ಗ್ರಾಮಾಂತರ	47,356
ಬಾಗಲಕೋಟೆ	47,350	ಶಿವಮೊಗ್ಗ	34,118	ಬೆಂಗಳೂರು ಉತ್ತರ	44,464
ಬಿಜಾಪುರ	39,831	ಉಡುಪಿ-ಚಿಕ್ಕಮಗಳೂರು	29,909	ಬೆಂಗಳೂರು ಕೇಂದ್ರ	30,246
ಗುಲ್ಬರ್ಗಾ	36,920	ದಕ್ಷಿಣ ಕನ್ನಡ	35,763	ಚಿಕ್ಕಬಳ್ಳಾಪುರ	43,138
ರಾಯಚೂರು	47,394	ಚಿತ್ರದುರ್ಗ	45,676	ಕೋಲಾರ	45,603
ಬೀದರ್	39,145	ತುಮಕೂರು	38,829	ಚಾಮರಾಜನಗರ	32,482
ಕೊಪ್ಪಳ	46,162	ಮಂಡ್ಯ	37,761	ಉತ್ತರಕನ್ನಡ	37,226
ಧಾರವಾಡ	40,763	ಮೈಸೂರು	41,145

ಅತೀ ಹೆಚ್ಚು ಯುವ ಮತದಾರರಿರುವ ಕ್ಷೇತ್ರ

ಕ್ಷೇತ್ರ	ಮತದಾರರ ಸಂಖ್ಯೆ
ಬಳ್ಳಾರಿ	53,077
ಹಾವೇರಿ	50,658
ಚಿಕ್ಕೋಡಿ	50,589

ಅತೀ ಕಡಿಮೆ ಯುವ ಮತದಾರರಿರುವ ಕ್ಷೇತ್ರ

ಕ್ಷೇತ್ರ	ಮತದಾರರ ಸಂಖ್ಯೆ
ಬೆಂಗಳೂರು ದಕ್ಷಿಣ	27,461
ಹಾಸನ	28,526

ಇದನ್ನೂ ಓದಿ:ಬೆಳಗಾವಿ ಜಿಲ್ಲೆಯಲ್ಲಿ ಮೊದಲ ಹಕ್ಕು ಚಲಾವಣೆಗೆ ಸಿದ್ದವಾಗಿರುವ 1,08,247 ಯುವ ಮತದಾರರು