ತಂದೆ ಮೇಲಿನ ಹಠಕ್ಕೆ ಕಿಕ್‌ ಬಾಕ್ಸರ್‌ ಆದ ಬೀಬಿ ಫಾತಿಮಾ : ಸಾಧಕಿಯ ಬೆನ್ನಿಗೆ ನಿಂತ ಮಂಗಳಮುಖಿ

ರಾಜ್ಯ, ರಾಷ್ಟ್ರ, ಅಂತಾರಾಷ್ಟ್ರೀಯ ಮಟ್ಟದಲ್ಲಿ 29ಕ್ಕೂ ಹೆಚ್ಚು ಚಿನ್ನ ಹಾಗೂ ಬೆಳ್ಳಿ ಪದಕಗಳನ್ನು ಗೆದ್ದು, ಹೆಣ್ಣೆಂದು ಜರಿಯುವವರಿಗೆ ಸಾಧನೆಯ ಮೂಲಕ ಉತ್ತರಿಸಿದ್ದಾರೆ ಮೈಸೂರಿನ ಬೀಬಿ ಫಾತಿಮಾ. ವಿಶೇಷ ವರದಿ - ಮಹೇಶ ಎಂ

ಮೈಸೂರು : ಗಂಡು ಮಕ್ಕಳಿಲ್ಲವೆಂದು ಹೆಂಡತಿ ಮಕ್ಕಳನ್ನು ಬಿಟ್ಟು ಹೋದ ತಂದೆ ಮೇಲಿನ ಸವಾಲಿಗಾಗಿ, ರಾಷ್ಟ್ರ, ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಕಿಕ್​ ಬಾಕ್ಸಿಂಗ್​ನಲ್ಲಿ ಸಾಧನೆ ಮಾಡಿದವರು ಈ ಧೀರೆ. ಮುಸ್ಲಿಂ ಸಮುದಾಯದಿಂದ ಬಂದರೂ, ತಂದೆ ಮೇಲಿನ ಕೋಪಕ್ಕಾಗಿ ಕಿಕ್​ ಬಾಕ್ಸಿಂಗ್​ನಲ್ಲಿ 29 ಚಿನ್ನದ ಪದಕಗಳನ್ನು ಕೊರಳಿಗೇರಿಸಿಕೊಂಡು ಬೀಗಿದವರು ಮೈಸೂರಿನ ಬೀಬಿ ಫಾತಿಮಾ. ಇವರ ಈ ಸಾಧನೆಗೆ ಬೆನ್ನೆಲುಬಾಗಿ ನಿಂತಿದ್ದು ಓರ್ವ ಮಂಗಳಮುಖಿ.

ಬೀಬಿ ಫಾತಿಮಾರ ತಾಯಿಗೆ ಇವರೂ ಸೇರಿದಂತೆ ನಾಲ್ವರು ಹೆಣ್ಣು ಮಕ್ಕಳು. ತಂದೆಯಾದವನು ತನಗೆ ನಾಲ್ಕು ಹೆಣ್ಣು ಮಕ್ಕಳೇ, ಗಂಡು ಮಕ್ಕಳಿಲ್ಲ ಎಂದು ಹೆಂಡತಿ, ಮಕ್ಕಳನ್ನು ಬಿಟ್ಟು ಹೋಗಿದ್ದಾನೆ. ಸಾಯುವ ನಿರ್ಧಾರಕ್ಕೆ ಬಂದಿದ್ದ ಇಡೀ ಕುಟುಂಬಕ್ಕೆ ಆಸರೆಯಾಗಿದ್ದು ಮಂಗಳಮುಖಿ. ಆ ಮಂಗಳಮುಖಿ ಅಕ್ರಮ್​ ಪಾಷಾ ಅವರೇ ಇಡೀ ಕುಟುಂಬವನ್ನು ಸಾಕುತ್ತಿದ್ದಾರೆ. ಅಷ್ಟೇ ಅಲ್ಲದೆ ಆ ಮನೆಯ ಹೆಣ್ಣು ಮಗಳು ಆಕಾಶದೆತ್ತರಕ್ಕೆ ಕಂಡ ಕನಸನ್ನು ನನಸು ಮಾಡಲು ನಿಂತವರು ಇದೇ ಅಕ್ರಮ್​ ಪಾಷಾ.

ಇಲ್ಲಿಯವರೆಗೆ ಬೀಬಿ ಫಾತಿಮಾ, ರಾಜ್ಯ, ರಾಷ್ಟ್ರಮಟ್ಟದಲ್ಲಿ 29 ಚಿನ್ನದ ಪದಕಗಳನ್ನು ಹಾಗೂ ಕಳೆದ ವಾರ ದೆಹಲಿಯಲ್ಲಿ ನಡೆದ ಅಂತಾರಾಷ್ಟ್ರೀಯ ಮಟ್ಟದ ಪಂದ್ಯದಲ್ಲಿ 55 ಕೆಜಿ ವಿಭಾಗದಲ್ಲಿ ಬೆಳ್ಳಿ ಪದಕವನ್ನು ಗೆದ್ದಿದ್ದು, ಹೆಣ್ಣು ಮಗುವೆಂದು ಜರಿಯುವವರಿಗೆ ಸಾಧನೆಯ ಮೂಲಕ ಉತ್ತರ ನೀಡಿದ್ದಾರೆ.

ತಂದೆಗೆ ಸಾಧಿಸಿ ತೋರಿಸುವ ಛಲ ಇದೆ :ಈಟಿವಿ ಭಾರತ ಜೊತೆ ಮಾತನಾಡಿ ಬೀಬಿ ಫಾತಿಮಾ, "ಹುಟ್ಟಿದ ನಾಲ್ಕೂ ಮಕ್ಕಳು ಹೆಣ್ಣಾದವು, ಗಂಡು ಸಂತಾನವಿಲ್ಲವೆಂದು ತಂದೆ, ತಾಯಿ ಸೇರಿ ಮಕ್ಕಳೆಲ್ಲರನ್ನು ತೊರೆದು ಹೋದರು. ಆಗ ಅಕ್ರಮ್​ ಪಾಷಾ ಅಲಿಯಾಸ್​ ಶಬ್ನಾ ಎಂಬ ಮಂಗಳಮುಖಿ ಅವರು ನಮ್ಮನ್ನು ದತ್ತು ಪಡೆದು ಸಾಕುತ್ತಿದ್ದಾರೆ. ನಮ್ಮ ಜೀವನ, ವಿದ್ಯಾಭ್ಯಾಸ, ನಿತ್ಯ ಜೀವನಕ್ಕೆ ಬೇಕಾದ ಅಗತ್ಯತೆಗಳನ್ನು ಎಲ್ಲವನ್ನೂ ಶಬ್ನಾ ಅವರೇ ನೋಡಿಕೊಳ್ಳುತ್ತಿದ್ದಾರೆ. ಪ್ರಸ್ತುತ ನಾನು ಎಸ್.ಎಸ್.‌ಎಲ್.ಸಿ. ಓದುತ್ತಿದ್ದೇನೆ. ಗಂಡು - ಹೆಣ್ಣು ಸಮಾನರು ಎಂದು ತೋರಿಸಲು ಕಿಕ್‌ ಬಾಕ್ಸಿಂಗ್‌ ಆಯ್ಕೆ ಮಾಡಿಕೊಂಡಿದ್ದೇನೆ. ಹೆಣ್ಣಾಗಿ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಸಾಧಿಸಿದ್ದೇನೆ. ಈ ಸಾಧನೆಯನ್ನು ನನ್ನ ತಂದೆಯ ಮುಂದೆ ತೋರಿಸುವ ಛಲ ನನ್ನಲ್ಲಿದೆ" ಎಂದು ವಿಶ್ವಾಸದ ಮಾತುಗಳನ್ನಾಡಿದರು.

ಒಲಂಪಿಕ್​ನಲ್ಲಿ ದೇಶಕ್ಕಾಗಿ ಚಿನ್ನದ ಪದಕ ಗೆಲ್ಲುವ ಆಸೆ :12 ವರ್ಷದಿಂದ ಬಾಕ್ಸಿಂಗ್‌ ತರಬೇತಿಯಲ್ಲಿ ತೊಡಗಿದ್ದೇನೆ. ಜಸ್ವಂತ್‌ ಅವರ ಬಳಿ ತರಬೇತಿ ಪಡೆಯುತ್ತಿದ್ದೇನೆ. ಅವರ ಸಹಕಾರ ಬಹಳ ಇದೆ. ಜಿಲ್ಲಾಮಟ್ಟ, ರಾಜ್ಯಮಟ್ಟ, ರಾಷ್ಟ್ರ, ಅಂತಾರಾಷ್ಟ್ರೀಯ ಮಟ್ಟದ ಸ್ಫರ್ಧೆಗಳಲ್ಲಿ ಭಾಗವಹಿಸಿದ್ದೇನೆ. 29 ಚಿನ್ನ, 2 ಬೆಳ್ಳಿ ಪದಕಗಳನ್ನು ಗೆದ್ದಿದ್ದೇನೆ. ಒಲಂಪಿಕ್​​ನಲ್ಲಿ ದೇಶಕ್ಕಾಗಿ ಆಡಿ, ಪದಕ ಗೆಲ್ಲಬೇಕು ಎಂಬುದು ನನ್ನ ಕನಸು. ಒಲಿಂಪಿಕ್​​ಗೆ ಹೋಗಲು ಮೈಸೂರಿಗರು, ರಾಜ್ಯದ ಜನತೆ, ಹಾಗೂ ಸರ್ಕಾರದ ಸಹಾಯದ ನೀರಿಕ್ಷೆಯಲ್ಲಿದ್ದೇವೆ ಎಂದು ಬೀಬಿ ಫಾತಿಮಾ ಹೇಳಿದರು.

ಪಂದ್ಯವೇ ಮುಖ್ಯ ಕೈ ಅಲ್ಲ : "ಕೈ ಮುರಿದಿದ್ದರು ಪರವಾಗಿಲ್ಲ ಎಂದು ಅಂತಾರಾಷ್ಟ್ರೀಯ ಮಟ್ಟದ ಪಂದ್ಯದಲ್ಲಿ ಭಾಗವಹಿಸಿ ಎರಡು ಬೆಳ್ಳಿ ಪದಕ ಗೆದ್ದು ಬಂದಿದ್ದೇನೆ. ನಾನು ಎಲ್ಲರಿಗೂ ಸ್ಫೂರ್ತಿಯಾಗಿಬೇಕೆಂಬ ಆಸೆಯಿದೆ. ಇದಲ್ಲದೆ ಮನೆಗೆ ಹಿರಿಯ ಮಗಳಾದ ನನ್ನ ಮೇಲೆ ಕುಟುಂಬದ ಜವಾಬ್ದಾರಿ, ತಂಗಿಯರ ವಿದ್ಯಾಭಾಸದ ಹೊಣೆ, ಕಿಕ್‌ ಬಾಕ್ಸಿಂಗ್‌ ಕಲಿಕೆ ಎಲ್ಲವೂ ಇವೆ. ಈ ಜವಾಬ್ದಾರಿ ಇರುವುದರಿಂದ ಸರ್ಕಾರದ ವತಿಯಿಂದ ಸಹಾಯಕ್ಕೆ ಎದುರು ನೋಡುತ್ತಿದ್ದೇವೆ" ಎಂದು ಮನವಿ ಮಾಡಿದರು.

ಅಕ್ರಮ್‌ ಪಾಷಾ ಹೇಳಿದ್ದೇನು ?ತಮ್ಮ ಜೀವನಕ್ಕೆ ಭಿಕ್ಷೆ ಬೇಡುವ ಮಂಗಳಮುಖಿಯರು ಕೆಲವೊಮ್ಮೆ ವಿಶಿಷ್ಟ ಸಾಧನೆ ಮಾಡುತ್ತಾರೆ. ಅಂತಹವರ ಸಾಲಿಗೆ ಮೈಸೂರಿನ ಮಂಗಳಮುಖಿ ಅಕ್ರಮ್‌ ಪಾಷಾ ಸೇರುತ್ತಾರೆ. ಗಂಡ ಬಿಟ್ಟು ಹೋದಾಗ ಸಾಯಲು ನಿರ್ಧರಿಸಿದ್ದ ನಾಲ್ವರು ಮಕ್ಕಳ ತಾಯಿಗೆ ಆಧಾರವಾಗಿ ನಿಂತದ್ದು ಮಂಗಳಮುಖಿ ಅಕ್ರಮ್​ ಪಾಷಾ.

"ಬೀಬಿ ಫಾತಿಮಾ ತಾಯಿ ನನಗೆ ದೂರದ ಸಂಬಂಧಿಕಳು. ಸಾಯಲು ನಿರ್ಧರಿಸಿ ಊರು ತೊರೆದ ತಾಯಿ ಮಕ್ಕಳನ್ನು ನಾನು ದತ್ತು ಸ್ವೀಕಾರ ಮಾಡಿ ಇಲ್ಲಿಯವರೆಗೆ ಸಾಕಿದ್ದೇನೆ. ನನಗೆ ವಯಸ್ಸಾಗಿದೆ. ಓಡಾಡಲು ಕಷ್ಟವಾಗುತ್ತಿದೆ. ಕಳೆದ 19 ವರ್ಷಗಳಿಂದ ಅವರ ಜೊತೆ ಜೀವನ ಸಾಗಿಸುತ್ತಿದ್ದೇನೆ, ನಾನೇನು ಶ್ರೀಮಂತಳಲ್ಲ. ಹಲವು ಜನರ ಸಹಾಯ ಹಾಗೂ ನನ್ನ ಭಿಕ್ಷಾಟನೆಯಿಂದ ಜೀವನ ಸಾಗುತ್ತಿದೆ. ಮೈಸೂರು ಜನತೆ ನಮ್ಮ ಕೈಹಿಡಿದರು. ಕಿಕ್‌ ಬಾಕ್ಸಿಂಗ್‌ ಸ್ಪರ್ಧೆಗಳಲ್ಲಿ ಭಾಗವಹಿಸಲು ಹೋಗಲು ಸಾರಿಗೆ ವ್ಯವಸ್ಥೆ, ಸಹಾಯ ಮಾಡಿ ಸಹೃದಯರು ಸಹಕರಿಸಿದ್ದಾರೆ" ಎಂದು ವಿವರಿಸಿದರು.

ಸರ್ಕಾರಿ ನೌಕರಿಗೆ ಮನವಿ : ಮಂಗಳಮುಖಿ ಎಂದು ಮೂಗು ಮುರಿಯವವರ ನಡುವೆ ಛಲದಿಂದ ಕುಟುಂಬ ನಿರ್ವಹಣೆ ಮಾಡಿದ್ದೇನೆ. ಕಿಕ್‌ ಬಾಕ್ಸರ್‌ ಫಾತಿಮಾ ಇನ್ನುಂದೆ ತಾಯಿ ಹಾಗೂ ಸೋದರಿಯರ ಜವಾಬ್ದಾರಿ ಹೊತ್ತು ಕುಟುಂಬ ನಿರ್ವಹಣೆ ಮಾಡಬೇಕಿದೆ. ಹಾಗಾಗಿ ಸರ್ಕಾರ ಆಕೆಯ ಕಿಕ್‌ ಬಾಕ್ಸಿಂಗ್‌ ಕಲೆಯನ್ನು ಪುರಸ್ಕರಿಸಿ ಒಂದು ಸರ್ಕಾರಿ ನೌಕರಿ ನೀಡಬೇಕು" ಎಂದು ಮನವಿ ಮಾಡಿಕೊಂಡರು.

ಇದನ್ನೂ ಓದಿ:ರಾಜ್ಯಗಳ ರಾಜಧಾನಿ ಹೆಸರು ಪಟಪಟನೆ ಹೇಳುವ ಪುಟಾಣಿ: ಇಂಡಿಯಾ ಬುಕ್‌ ಆಫ್‌ ರೆಕಾರ್ಡ್ಸ್​ ಸಾಧನೆ