ಶಿವಮೊಗ್ಗ: ಲೋಕಸಭಾ ಚುನಾವಣೆ ಮುಗಿದ ನಂತರ ಈಗ ಎಲ್ಲಾ ಪಕ್ಷಗಳು ತಮ್ಮ ಗೆಲುವು ಹಾಗೂ ಗೆಲುವಿನ ಅಂತರದ ಬಗ್ಗೆ ಚರ್ಚೆ ನಡೆಸುತ್ತಿವೆ. ಈ ನಡುವೆ ಕಾರ್ಯಕರ್ತರು ತಮ್ಮ ತಮ್ಮ ಪಕ್ಷದ ಅಭ್ಯರ್ಥಿಗಳು ಗೆಲುವು ಸಾಧಿಸುತ್ತಾರೆ ಎಂದು ಪರಸ್ಪರ ಬಾಜಿ ಕಟ್ಟುತ್ತಿದ್ದಾರೆ.
ಕೆಲ ದಿನಗಳ ಹಿಂದೆ ಶಿಕಾರಿಪುರ ತಾಲೂಕಿನ ಕಲ್ಮನೆ ಗ್ರಾಮದ ರೈತ ರವೀಂದ್ರ ಎಂಬುವರು ಕಾಂಗ್ರೆಸ್ ಅಭ್ಯರ್ಥಿ ಗೀತಾ ಶಿವರಾಜ್ಕುಮಾರ್ ಅವರು ಚುನಾವಣೆಯಲ್ಲಿ ಗೆದ್ದೇ ಗೆಲ್ಲುತ್ತಾರೆ ಎಂದು ತಮ್ಮ ಬಳಿಯ ಟ್ರ್ಯಾಕ್ಟರ್ ಅನ್ನು ಪಣಕ್ಕೆ ಇಟ್ಟಿದ್ದರು. ಕಾಂಗ್ರೆಸ್ ಕಾರ್ಯಕರ್ತ ರವೀಂದ್ರ ಅವರು ಹಾಕಿದ ಈ ಸವಾಲನ್ನು ಶಿಕಾರಿಪುರ ಪಟ್ಟಣದ ರೈತ ಮಂಜುನಾಥ್ ಸ್ವೀಕಾರ ಮಾಡಿದ್ದಾರೆ.
ಮಂಜುನಾಥ್ ಅವರು ಗೀತಾ ಶಿವರಾಜ್ಕುಮಾರ್ ಅವರು ಗೆದ್ದೇ ಗೆಲ್ಲುತ್ತಾರೆಂದು ತಮ್ಮ ಟ್ರ್ಯಾಕ್ಟರ ಅನ್ನು ಪಣಕ್ಕೆ ಇಟ್ಟಿದ್ದಾರೆ. ನಾವು ಅವರ ಸವಾಲನ್ನು ಸ್ವೀಕಾರ ಮಾಡುತ್ತೇವೆ. ನಮ್ಮ ಅಭ್ಯರ್ಥಿ ಬಿ.ವೈ. ರಾಘವೇಂದ್ರ ಅವರು ಗೆಲ್ಲುವುದಷ್ಟೇ ಅಲ್ಲ, ಬಹುಮತದಿಂದ ದಿಗ್ವಿಜಯ ಸಾಧಿಸುತ್ತಾರೆ. ರವೀಂದ್ರ ಅವರು ಯಾವ ಟ್ರ್ಯಾಕ್ಟರ ಪಣಕ್ಕೆ ಇಡುತ್ತಾರೂ ನಾವು ಅದೇ ಟ್ರ್ಯಾಕ್ಟರ ಅನ್ನು ಬಾಜಿ ಕಟ್ಟುತ್ತೇವೆ. ಅಂದ್ರೆ ಹಳೆ ಟ್ರ್ಯಾಕ್ಟರ್ ಆದ್ರೆ ಹಳೇ ಟ್ರ್ಯಾಕ್ಟರ್ ಅಥವಾ ಹೊಸ ಟ್ರ್ಯಾಕ್ಟರ್ ಅಂದ್ರೆ ಹೊಸ ಟ್ರ್ಯಾಕ್ಟರ್ ಅನ್ನು ನಾವು ಪಣಕ್ಕೆ ಇಡುತ್ತೇವೆ ಎಂದು ವಿಡಿಯೋದಲ್ಲಿ ಹೇಳಿಕೊಂಡಿದ್ದಾರೆ. ಈ ಮೂಲಕ ಕಾಂಗ್ರೆಸ್ ಕಾರ್ಯಕರ್ತನ ಸವಾಲಿಗೆ ಬಿಜೆಪಿ ಕಾರ್ಯಕರ್ತ ಸವಾಲನ್ನು ಸ್ವೀಕಾರ ಮಾಡಿದಂತೆ ಆಗಿದೆ.
ಕಾಂಗ್ರೆಸ್ ಕಾರ್ಯಕರ್ತ ರವೀಂದ್ರ ಸವಾಲು ಹಾಕಿದಾಗ ಅದನ್ನು ಬಿಜೆಪಿ ಕಾರ್ಯಕರ್ತರು ಸ್ವೀಕಾರ ಮಾಡಬೇಕು ಎಂದು ಬಿಜೆಪಿ ಅಭ್ಯರ್ಥಿ ಬಿ.ವೈ. ರಾಘವೇಂದ್ರ ಕಾರ್ಯಕರ್ತರಿಗೆ ಕರೆ ನೀಡಿದ್ದರು. ಇದರಿಂದ ಪ್ರೇರೇಪಣೆ ಪಡೆದು ನಾನು ರವೀಂದ್ರ ಅವರ ಸವಾಲನ್ನು ಸ್ವೀಕಾರ ಮಾಡಿರುವುದಾಗಿ 'ಈಟಿವಿ ಭಾರತ'ಗೆ ಸವಾಲು ಸ್ವೀಕಾರ ಮಾಡಿರುವ ಮಂಜುನಾಥ ತಿಳಿಸಿದ್ದಾರೆ.
ಓದಿ: ಶಿವಮೊಗ್ಗ: ಗೀತಾ ಶಿವರಾಜ್ಕುಮಾರ್ ಗೆಲ್ತಾರೆಂದು ಹೊಸ ಟ್ರ್ಯಾಕ್ಟರನ್ನೇ ಪಣಕ್ಕಿಟ್ಟ ರೈತ! - FARMER BETTING ON ELECTION RESULT
