ಸರ್ಕಾರಿ‌ ಶಾಲೆ ಅಭಿವೃದ್ಧಿ ನಿಧಿಗಾಗಿ 25 ಗಂಟೆ ನಿರಂತರ ಯೋಗ ತರಬೇತಿ: ಗೋಲ್ಡನ್ ಬುಕ್ ಆಫ್ ವರ್ಲ್ಡ್​ನಲ್ಲಿ 2 ದಾಖಲೆ - Golden Book of World Record

ನಿರಂತರ 25 ಗಂಟೆಗಳ ಕಾಲ ಯೋಗ ತರಬೇತಿ ನೀಡಿ ಗೋಲ್ಡನ್ ಬುಕ್‌ ಆಫ್ ವರ್ಲ್ಡ್​ ರೆಕಾರ್ಡ್​ನಲ್ಲಿ 2 ದಾಖಲೆ ನಿರ್ಮಿಸುವುದರ ಜೊತೆಗೆ ಯೋಗ ಶಿಕ್ಷಣದಿಂದ ಬಂದ 2 ಲಕ್ಷ ರೂ. ಹಣವನ್ನು ಯೋಗ ಶಿಕ್ಷಕ ಕುಶಾಲಪ್ಪ ಗೌಡ ಅವರು ತಾವು ಕಲಿತ ಸರ್ಕಾರಿ ಶಾಲೆಯ ಅಭಿವೃದ್ಧಿಗಾಗಿ ನೀಡಿದ್ದಾರೆ.

ಮಂಗಳೂರು: ತಾನು ಕಲಿತ ಸರ್ಕಾರಿ ಶಾಲೆಯ ಅಭಿವೃದ್ಧಿಗಾಗಿ ನಿಧಿ ಹೊಂದಿಸಲು ಯೋಗ ಶಿಕ್ಷಕರೊಬ್ಬರು ನಿರಂತರ 25 ಗಂಟೆಗಳ ಯೋಗ ತರಬೇತಿ ನೀಡಿ ಗೋಲ್ಡನ್ ಬುಕ್‌ ಆಫ್ ವರ್ಲ್ಡ್​ ರೆಕಾರ್ಡ್​ನಲ್ಲಿ ವೈಯಕ್ತಿಕ ಮತ್ತು ಸಂಸ್ಥೆಯ ಹೆಸರಿನಲ್ಲಿ ದಾಖಲೆ ಬರೆದಿದ್ದಾರೆ.

2024ರ ಜುಲೈ 22ರಿಂದ 23ವರೆಗೆ ಮಂಗಳೂರಿನ ಯೆನೆಪೋಯ ವೈದ್ಯಕೀಯ ಸಂಸ್ಥೆಯ ಬೆಳ್ಳಿಹಬ್ಬ ಕಾರ್ಯಕ್ರಮದಲ್ಲಿ ಈ ದಾಖಲೆಯ ಯೋಗ ನಡೆದಿತ್ತು. ಯೋಗ ಶಿಕ್ಷಕ ಕುಶಾಲಪ್ಪ ಗೌಡ ಯಾವುದೇ ವಿಶ್ರಾಂತಿ ಇಲ್ಲದೆ, ಉಪಹಾರ ಸೇವಿಸದೇ ನಿರಂತರ 25 ಗಂಟೆ 4 ನಿಮಿಷ 35 ಸೆಕೆಂಡ್ ಯೋಗ ತರಬೇತಿ ನೀಡಿದ್ದರು. ಇದರಲ್ಲಿ‌ 2,693 ಮಂದಿ ಯೋಗ ತರಬೇತಿ ಪಡೆದಿದ್ದರು. ಇವರೆಲ್ಲರೂ ವೈದ್ಯಕೀಯ ಸಿಬ್ಬಂದಿ ಎನ್ನುವುದು ವಿಶೇಷ.

ಈ ಮ್ಯಾರಾಥನ್ ಯೋಗ ಶಿಕ್ಷಣ ನಡೆಯುವ ಸಂದರ್ಭದಲ್ಲಿ ಗೋಲ್ಡನ್ ಬುಕ್ ಆಫ್ ವರ್ಲ್ಡ್ ರೆಕಾರ್ಡ್ಸ್​ನ ಅಧಿಕಾರಿಗಳು ಹಾಜರಿದ್ದರು. ಈ ದಾಖಲೆಯ ಯೋಗ ಶಿಕ್ಷಣವನ್ನು ಕಣ್ಣಾರೆ ಕಂಡ ಅಧಿಕಾರಿಗಳು ಎರಡು ದಾಖಲೆಗಳನ್ನು ಗೋಲ್ಡನ್ ಬುಕ್ ಆಫ್ ವರ್ಲ್ಡ್ ರೆಕಾರ್ಡ್ಸ್​ನಲ್ಲಿ ದಾಖಲಿಸಿದ್ದಾರೆ. 25 ಗಂಟೆ ನಿರಂತರ ಯೋಗ ಶಿಕ್ಷಣ ನೀಡಿರುವುದಕ್ಕೆ ಕುಶಾಲಪ್ಪ ಗೌಡರಿಗೆ ಮತ್ತು ಯೆನೆಪೋಯ ಸಂಸ್ಥೆಗೆ ಮೋಸ್ಟ್ ಹೆಲ್ತ್ ಕೇರ್ ಪ್ರೊಫೆಶನಲ್ ಯೋಗ ಸೆಷನ್ಸ್ ದಾಖಲೆ ಬರೆಯಲಾಗಿದೆ.

ಈ ಯೋಗ ಶಿಕ್ಷಣದಿಂದ ಬಂದ 2 ಲಕ್ಷ ರೂ ಹಣವನ್ನು ಬೆಳ್ತಂಗಡಿಯ ಮೊಗ್ರು ಸರ್ಕಾರಿ ಶಾಲೆಗೆ ನೀಡಲಾಗಿದೆ. ಈ ಮೂಲಕ ಶಾಲೆಯ ಅಭಿವೃದ್ಧಿಗೆ ಶಿಕ್ಷಕ ಕುಶಾಲಪ್ಪ ಅವರು ನಿಧಿ ನೀಡಿದ್ದಾರೆ.

ಈ ಬಗ್ಗೆ ಮಾತನಾಡಿದ ಕುಶಾಲಪ್ಪ ಗೌಡ, "ಬೆಳ್ತಂಗಡಿ ತಾಲೂಕಿನ ಮೊಗ್ರು ಸರ್ಕಾರಿ ಶಾಲೆಗೆ ವಿದ್ಯಾನಿಧಿ ನೀಡಲು 25 ಗಂಟೆ ನಿರಂತರ ಯೋಗ ತರಬೇತಿ ನೀಡಲಾಯಿತು. ಇದರಲ್ಲಿ ವೈದ್ಯಕೀಯ ವೃತ್ತಿಪರರು ಭಾಗವಹಿಸಿದ್ದರು. ಈ ಯೋಗ ಶಿಕ್ಷಣದಿಂದ 2 ದಾಖಲೆಗಳನ್ನು ಬರೆಯಲಾಗಿದೆ. ಯೋಗಭ್ಯಾಸದಿಂದಲೇ ಈ ಸಾಧನೆ ಮಾಡಲು ಸಾಧ್ಯವಾಯಿತು" ಎಂದು ಹೇಳಿದರು.

ಇದನ್ನೂ ಓದಿ:ಸತತ 12 ಗಂಟೆ ಈಜಿದ ಬೆಳಗಾವಿಯ ತಾಯಿ - ಮಗ: ಏಷಿಯಾ ಬುಕ್ ಆಫ್ ರೆಕಾರ್ಡ್ಸ್​ಗೆ ಹೆಸರು ಸೇರ್ಪಡೆ - Mother son set a new record