ಸಿನಿಮಾ ಸಹವಾಸ ಸಾಕು ಎಂಬ ಯೋಚನೆ ಬಂದ ಟೈಮಲ್ಲಿ 'ಟಗರು' ಚಿತ್ರದ ಮೂಲಕ 'ಡಾಲಿ'ಯಾಗಿ ಕನ್ನಡಿಗರ ಹೃದಯ ಗೆದ್ದು, ಪ್ರಸ್ತುತ ಪ್ಯಾನ್ ಇಂಡಿಯಾ ಸಿನಿಮಾಗಳಲ್ಲಿ ಮಿಂಚುತ್ತಿರುವ ಧನಂಜಯ್ ಅವರಿಗೀಗ ಎರಡೆರಡು ಸಂಭ್ರಮ. ಒಂದು ಮದುವೆ ಸಂಭ್ರಮ ಮತ್ತೊಂದು ಬಹುನಿರೀಕ್ಷಿತ 'ಜೀಬ್ರಾ' ಸಿನಿಮಾ ತೆರೆಕಂಡು ಪ್ರೇಕ್ಷಕರಿಂದ ಅಪಾರ ಮೆಚ್ಚುಗೆ ಸ್ವೀಕರಿಸಿದೆ.
ನಟರಾಕ್ಷಸ ಖ್ಯಾತಿಯ ಡಾಲಿ ಧನಂಜಯ್ ಮತ್ತು ಟಾಲಿವುಡ್ ಸೂಪರ್ಸ್ಟಾರ್ ಸತ್ಯದೇವ್ ನಟನೆಯ ಜೀಬ್ರಾ ಚಿತ್ರ ತೆಲುಗು ಮತ್ತು ಕನ್ನಡ ಭಾಷೆಗಳಲ್ಲಿ ಕಳೆದ ಶುಕ್ರವಾರದಂದು ಚಿತ್ರಮಂದಿರ ಪ್ರವೇಶಿಸಿತು. ಡಾನ್ ಆಗಿ ಮಿಂಚಿರುವ ಡಾಲಿ ಅವರನ್ನು ನೋಡಿ ಅಭಿಮಾನಿಗಳು ಫುಲ್ ಖುಷ್. ತೆಲುಗು ಪ್ರೇಕ್ಷಕರು ಸಹ ಧನಂಜಯ್ ನಟನೆಗೆ ಫಿದಾ ಆಗಿದ್ದು ದೊಡ್ಡ ಪರದೆ ಮೇಲೆ ನೋಡಿ ಸಂಭ್ರಮಿಸುತ್ತಿದ್ದಾರೆ. ಅಭಿಮಾನಿಗಳು ಮುಗಿಬಿದ್ದು ಸಿನಿಮಾ ನೋಡುತ್ತಿದ್ದಾರೆ. 'ಜೀಬ್ರಾ' ಹೌಸ್ ಫುಲ್ ಪ್ರದರ್ಶನ ಕಾಣುತ್ತಿದೆ.
ತೆಲುಗಿನಲ್ಲಿ ಡಾಲಿಗೆ ಡಿಮ್ಯಾಂಡ್: ಜೀಬ್ರಾ ಸಿನಿಮಾ ರಿಲೀಸ್ ಆಗಿ ಸಕ್ಸಸ್ ಕಾಣುತ್ತಿದ್ದಂತೆ ತೆಲುಗಿನಲ್ಲಿ ಡಾಲಿಗೆ ಡಿಮ್ಯಾಂಡ್ ಹೆಚ್ಚಾಗಿದೆ. ಈ ಮೊದಲು ವಿಲನ್ ಪಾತ್ರಗಳಿಗೆ ಹೆಚ್ಚು ಬೇಡಿಕೆ ಇತ್ತು. ಆದ್ರೀಗ ಹೀರೋ ಪಾತ್ರಗಳಿಗೂ ಆಫರ್ ಹೆಚ್ಚಾಗಿದೆ. ಈ ಸಿನಿಮಾದಲ್ಲಿ ಡಾಲಿ ನಟನೆ, ಸ್ಟೈಲ್‌ಗೆ ಪ್ರೇಕ್ಷಕರು ಮಾತ್ರವಲ್ಲದೇ ತೆಲುಗು ಸಿನಿಮಾ ಇಂಡಸ್ಟ್ರಿ ಕೂಡಾ ಫಿದಾ ಆಗಿದೆ. ಹಾಗಾಗಿಯೇ, ಡಾಲಿ ತೆಲುಗು ಇಂಡಸ್ಟ್ರಿಯಲ್ಲಿ ತಮ್ಮನ್ನು ತೊಡಗಿಸಿಕೊಳ್ಳಲಿ, ತೆಲುಗು ಪ್ರೇಕ್ಷಕರನ್ನು ರಂಜಿಸಲಿ ಎನ್ನುವ ಕಾರಣಕ್ಕೆ ತೆಲುಗಿನ ದೊಡ್ಡ ದೊಡ್ಡ ನಿರ್ಮಾಣ ಸಂಸ್ಥೆಗಳೀಗ ಡಾಲಿ ಹಿಂದೆ ಬಿದ್ದಿವೆ.
ಈಗಾಗಲೇ ಪೀಪಲ್ ಮೀಡಿಯಾ ಫ್ಯಾಕ್ಟರಿ, ಹಯಾಗ್ರೀವ ಕ್ರಿಯೇಷನ್, ಸತ್ಯ ಜ್ಯೋತಿ ಫಿಲ್ಮ್ ಸೇರಿದಂತೆ ತೆಲುಗಿನ ಅನೇಕ ದೊಡ್ಡ ಬ್ಯಾನರ್‌ಗಳು ಡಾಲಿ ಜೊತೆ ಸಿನಿಮಾ ಮಾಡಲು ಕಾಯುತ್ತಿದ್ದಾರೆ. ಧನಂಜಯ್ ಅವರ ಕಾಲ್‌ಶೀಟ್‌ಗಾಗಿ ಈ ಬ್ಯಾನರ್‌ಗಳು ಎದುರು ನೋಡುತ್ತಿವೆ. ಒಂದು ವೇಳೆ ಡಾಲಿ ಕಡೆಯಿಂದ ಎಲ್ಲ ಬ್ಯಾನರ್‌ಗಳಿಗೆ ಗ್ರೀನ್ ಸಿಗ್ನಲ್ ಸಿಕ್ಕರೆ ಕನ್ನಡದ ಜೊತೆಗೆ ತೆಲುಗಿನಲ್ಲೂ ತಮ್ಮ ಪ್ರತಿಭೆ ಸಾಬೀತುಪಡಿಸಲಿದ್ದಾರೆ.
ಇದನ್ನೂ ಓದಿ: 'ಡಾಲಿ ಧನಂಜಯ್ ಕನ್ನಡದಲ್ಲಿ ಅದ್ಭುತ ನಟ, ತೆಲುಗಿನಲ್ಲಿ ಸ್ಟಾರ್ ಆಗ್ತಾರೆ': ಚಿರಂಜೀವಿ
ಡಾಲಿ ಧನಂಜಯ್ ಹಾಡಿಹೊಗಳಿದ್ದ ಮೆಗಾಸ್ಟಾರ್ ಚಿರಂಜೀವಿ: ಇನ್ನೂ 'ಜೀಬ್ರಾ' ಪ್ರೀ ರಿಲೀಸ್ ಈವೆಂಟ್ನಲ್ಲಿ ತೆಲುಗು ಮೆಗಾಸ್ಟಾರ್ ಚಿರಂಜೀವಿ ಅವರು ಕೂಡಾ ಡಾಲಿ ಧನಂಜಯ್ ಅವರನ್ನು ಹಾಡಿಹೊಗಳಿದ್ದರು. ಧನಂಜಯ್ ತೆಲುಗಿನಲ್ಲಿ ಸ್ಟಾರ್ ಆಗಿ ಸೆಟಲ್ ಆಗಲಿದ್ದಾರೆ, ಟಾಲಿವುಡ್ನ ಮುಂದಿನ ಸ್ಟಾರ್ ಎಂದು ಭವಿಷ್ಯ ನುಡಿದಿದ್ದರು.
ಟ್ರೇಲರ್ ಅನಾವರಣಗೊಳಿಸಿ ಮಾತನಾಡಿದ್ದ ಸೂಪರ್ ಸ್ಟಾರ್ ಚಿರಂಜೀವಿ, ''ಜೀಬ್ರಾ ಯಶ ಕಾಣಲಿ. ಚಿತ್ರತಂಡಕ್ಕೆ ಒಳ್ಳೆಯದಾಗಲಿ. ಡಾಲಿ ಧನಂಜಯ್ ಕನ್ನಡದಲ್ಲಿ ಅದ್ಭುತ ನಟ. ತೆಲುಗಿನಲ್ಲಿ ಸ್ಟಾರ್ ಆಗ್ತಾರೆ'' ಎಂದು ನುಡಿದಿದ್ದರು.
ಇದನ್ನೂ ಓದಿ: ಮುರುಡೇಶ್ವರದಲ್ಲಿ ಡಾಲಿ ಜಾಲಿ: ನೇತ್ರಾಣಿಯಲ್ಲಿ ನಟ ಧನಂಜಯ್ ಸ್ಕೂಬಾ ಡೈವಿಂಗ್ - ವಿಡಿಯೋ ನೋಡಿ
ಅದರಂತೆ ಇದೀಗ ಡಾಲಿ ಅವರ ಜೀಬ್ರಾ ಯಶ ಕಂಡಿದ್ದು, ಅವರಿಗೆ ಆಫರ್‌ಗಳು ಹೆಚ್ಚಾಗಿವೆ. ಆದರೆ ನಟನ ಮುಂದಿನ ನಡೆ ಏನು ಅನ್ನೋ ಕುತೂಹಲ ಸಹಜವಾಗಿ ಎಲ್ಲರಲ್ಲೂ ಇದೆ. ಉತ್ತಮ ಕಥೆ, ಪಾತ್ರಗಳು ಬಂದರೆ ನೋ ಅನ್ನೋದು ಕಷ್ಟ. ಅದೇನೇ ಇರ್ಲಿ, ಕನ್ನಡದ ಕಲಾವಿದರು ಬಹುಭಾಷೆಯಲ್ಲಿ, ಪ್ಯಾನ್ ಇಂಡಿಯಾ ಮಟ್ಟದಲ್ಲಿ ಸದ್ದು ಮಾಡುತ್ತಿರುವುದನ್ನು ನೋಡುವುದೇ ಒಂದು ಖುಷಿ. ಕನ್ನಡಿಗರ ಪ್ರೀತಿಯ ಡಾಲಿ ಕನ್ನಡ ಸಿನಿಮಾಗಳ ಜೊತೆಗೆ ಬಹು ಭಾಷೆಗಳಲ್ಲೂ ಮಿಂಚುತ್ತಾ ಪ್ಯಾನ್ ಇಂಡಿಯಾ ಮಟ್ಟದಲ್ಲಿ ಖ್ಯಾತಿ ಗಳಿಸಲಿ ಅನ್ನೋದೇ ಅಭಿಮಾನಿಗಳ ಆಸೆ.
