ತಂದೆಯ ಮೃತದೇಹವನ್ನು ವೈದ್ಯ ಮಗ ಛೇದಿಸಿದ ದಾಖಲೆಗೆ 14 ವರ್ಷ: ದೇಹದಾನಕ್ಕೆ ಪ್ರೇರಣೆಯಾದ ಅಪರೂಪದ ಘಟನೆ

ತಂದೆಯ ಮೃತದೇಹವನ್ನು ವೈದ್ಯ ಮಗ ಛೇದಿಸಿ ವಿದ್ಯಾರ್ಥಿಗಳಿಗೆ ಪಾಠ ಮಾಡಿದ್ದ ವಿಶ್ವದಾಖಲೆಗೀಗ 14 ವರ್ಷ. ಪ್ರೇರಣೆಯಾದ ಈ ದೇಹದಾನದ ಸಂಗತಿ ಕುರಿತು 'ಈಟಿವಿ ಭಾರತ' ಪ್ರತಿನಿಧಿ ಸಿದ್ದನಗೌಡ ಪಾಟೀಲ್​ ನೀಡಿರುವ ವಿಶೇಷ ವರದಿ ಇಲ್ಲಿದೆ.

ಬೆಳಗಾವಿ: ದೇಹದಾನ ಮಾಡಿದ್ದ ತಂದೆಯ ಮೃತದೇಹವನ್ನು ವೃತ್ತಿಯಲ್ಲಿ ವೈದ್ಯನಾಗಿದ್ದ ಪುತ್ರ ಛೇದಿಸಿದ ವಿಶ್ವದಾಖಲೆಗೆ ಗಡಿನಾಡು ಬೆಳಗಾವಿ ಸಾಕ್ಷಿಯಾಗಿತ್ತು. ಇಂಥದ್ದೊಂದು ಐತಿಹಾಸಿಕ ಘಟನೆಗೆ ಇಂದಿಗೆ 14 ವರ್ಷ. ಇದರಿಂದ ಪ್ರೇರಣೆ ಪಡೆದು ಮುಂದೆ ಸಾವಿರಾರು ಜನರು ದೇಹದಾನಕ್ಕೆ ಮುಂದಾಗಿದ್ದು, ಈ ಪೈಕಿ ಸ್ವಾಮೀಜಿಗಳೂ ಸೇರಿದ್ದಾರೆ. ಸ್ವಾಮೀಜಿಗಳು ಮಠಗಳಲ್ಲಿ ಅನ್ನ, ಅಕ್ಷರ, ಜ್ಞಾನ ನೀಡುವುದರೊಂದಿಗೆ ದೇಹದಾನಕ್ಕೂ ಪ್ರತಿಜ್ಞೆ ತೊಟ್ಟಿರುವುದು ವಿಶೇಷವಾಗಿದೆ.

17ನೇ ಶತಮಾನದ ಕೊನೆಯಲ್ಲಿ ವೈದ್ಯಕೀಯ ವಿಜ್ಞಾನದಲ್ಲಿ ಸಂಶೋಧನೆಯಲ್ಲಿ ತೊಡಗಿದ್ದ ಇಂಗ್ಲೆಂಡ್‌ನ ಫ್ಲೊಕ್‌ಸ್ಟೋನ್ ಕೆಂಟ್‌ನ ಸರ್.ವಿಲಿಯಂ ಹಾರ್ವೆ ತನ್ನ ಮೃತ ಸಹೋದರಿಯ ದೇಹ ಛೇದಿಸಿ ಮಾನವ ದೇಹದ ರಕ್ತ ಪರಿಚಲನೆ ಕಂಡುಹಿಡಿದಿದ್ದರು. 300 ವರ್ಷಗಳ ಬಳಿಕ ಇದನ್ನೇ ಪ್ರೇರಣೆಯಾಗಿಸಿಕೊಂಡು ಡಾ.ಮಹಾಂತೇಶ ರಾಮಣ್ಣವರ ಮೃತಪಟ್ಟ ತಮ್ಮ ತಂದೆಯ ದೇಹ ಛೇದಿಸಿ ವೈದ್ಯಕೀಯ ಲೋಕವನ್ನು ಅಚ್ಚರಿಗೊಳಿಸಿದ್ದರು.

ವೈದ್ಯ ವೃತ್ತಿ ನನಗೆ ರೋಗಿಗಳ ಸೇವೆ ಮಾಡುವ ಸದಾವಕಾಶದ ಜೊತೆಗೆ ಅನ್ನ, ಐಶ್ವರ್ಯ, ಖ್ಯಾತಿ ನೀಡಿ ಬದುಕು ಕಟ್ಟಿಕೊಟ್ಟಿದೆ. ಇದರ ಋಣ ತೀರಿಸಲು ಮರಣಾನಂತರ ತಮ್ಮ ದೇಹದಾನ ಮಾಡುವುದಾಗಿ ಬೈಲಹೊಂಗಲ ನಗರದ ಖ್ಯಾತ ವೈದ್ಯರಾಗಿದ್ದ ಡಾ.‌ಬಸವಣ್ಣೆಪ್ಪ ಸಂಗಪ್ಪ ರಾಮಣ್ಣವರ‌ ವಾಗ್ದಾನ ಮಾಡಿದ್ದರು. ಅದರಂತೆ 2008ರ ನವೆಂಬರ್ 13ರಂದು ನಿಧನರಾದ ಅವರ ದೇಹದಾನ ಮಾಡಲಾಗಿತ್ತು. ಮೊದಲಿಗೆ, 2002ರಲ್ಲಿ ಹುಬ್ಬಳ್ಳಿ ಕಿಮ್ಸ್ ಆಸ್ಪತ್ರೆಗೆ ದೇಹ ನೀಡುವುದಾಗಿ ಹೇಳಿದ್ದ ಅವರು ಬಳಿಕ ಪುತ್ರ ಕೆಲಸ ಮಾಡುವ ಮಹಾವಿದ್ಯಾಲಯಕ್ಕೆ ತಮ್ಮ ದೇಹ ನೀಡುವಂತೆ ಮೃತ್ಯು ಪತ್ರದಲ್ಲಿ ಉಲ್ಲೇಖಿಸಿದ್ದರು. ಆ ಪ್ರಕಾರ ಕೆಎಲ್ಇ ಬಿ.ಎಂ.ಕಂಕಣವಾಡಿ ಆಯುರ್ವೇದ ಮಹಾವಿದ್ಯಾಲಯಕ್ಕೆ ಅವರ ದೇಹವನ್ನು ಹಸ್ತಾಂತರಿಸಲಾಗಿತ್ತು. ಸ್ವತಃ ತಮ್ಮ ತಂದೆಯ ದೇಹವನ್ನು ಡಾ.‌ಮಹಾಂತೇಶ ರಾಮಣ್ಣವರ ಛೇದಿಸಿ ಎಲ್ಲರ ಹುಬ್ಬೇರುವಂತೆ ಮಾಡಿದ್ದರು.

ಪತ್ರದಲ್ಲಿ ಏನಿತ್ತು? "ಮರಣಾನಂತರ ನನ್ನ ದೇಹವನ್ನು ದಾನವಾಗಿ ಕೆಎಲ್ಇ ಆಯುರ್ವೇದ ಕಾಲೇಜಿಗೆ ನೀಡಿದ್ದೇನೆ. ಇದಕ್ಕೆ ರಾಮಣ್ಣವರ ಕುಟುಂಬದ ಸದಸ್ಯರು ತಂಟೆ ತಕರಾರು ಮಾಡುವಂತಿಲ್ಲ. ಅಲ್ಲದೇ ನನ್ನ ದೇಹವನ್ನು ನನ್ನ ಸುಪುತ್ರ ಡಾ.ಮಹಾಂತೇಶನೇ ಛೇದಿಸಿ, ವೈದ್ಯಕೀಯ ವಿದ್ಯಾರ್ಥಿಗಳಿಗೆ ಪಾಠ ಮಾಡಬೇಕು" ಎಂದು ತಿಳಿಸಿದ್ದರು. "ಎರಡು ವರ್ಷ ಬಿ‌.ಎಂ.ಕಂಕಣವಾಡಿ ಆಯುರ್ವೇದ ಮಹಾವಿದ್ಯಾಲಯದಲ್ಲಿ ಮೃತದೇಹವನ್ನು ಇರಿಸಲಾಗಿತ್ತು. 2010ರ ನವೆಂಬರ್ 13ರಂದು ದೇಹ ಛೇದಿಸಿ, ವಿದ್ಯಾರ್ಥಿಗಳಿಗೆ ಪಾಠ ಮಾಡಲಾಯಿತು. ಈಗಲೂ ಮೃತದೇಹವನ್ನು ಸಂಗ್ರಹಿಸಿಟ್ಟಿದ್ದು, ವೈದ್ಯ ವಿದ್ಯಾರ್ಥಿಗಳು ಹಾಗೂ ದಾನಿಗಳಿಗೆ ಪ್ರೇರಣೆಯಾಗಿದೆ" ಎಂದು ಈಟಿವಿ ಭಾರತಕ್ಕೆ ಡಾ.‌ಮಹಾಂತೇಶ ರಾಮಣ್ಣವರ ತಿಳಿಸಿದರು.

ತಂದೆಯ ದೇಹ ಛೇದಿಸಿದ ಬಳಿಕ ಸುಮ್ಮನೆ ಕೂರದ ಡಾ.‌ಮಹಾಂತೇಶ ಅವರು ಪಟ್ಟಣಕ್ಕೆ ಪಂಚರಾತ್ರಿಯಂತೆ ಹಳ್ಳಿಗೆ ಏಕರಾತ್ರಿಯಂತೆ ಕಾಲಿಗೆ ಚಕ್ರ ಕಟ್ಟಿಕೊಂಡು ಓಡಾಡಿ, ದೇಹದಾನ ಮಹತ್ವ ಕುರಿತು ಜಾಗೃತಿ ಮೂಡಿಸುತ್ತಿದ್ದಾರೆ. ಈವರೆಗೂ ಸಾವಿರಾರು ಜನ ಇವರಿಂದ ಪ್ರೇರಿತರಾಗಿ ಮರಣಾನಂತರ ದೇಹದಾನ ಘೋಷಿಸಿದ್ದಾರೆ. ವಿಶೇಷವಾಗಿ ದೇಹದಾನಕ್ಕೆ ಸ್ವಾಮೀಜಿಗಳೂ ಮುಂದೆ ಬಂದಿದ್ದು, ತಮ್ಮ ಭಕ್ತರಲ್ಲೂ ಜಾಗೃತಿ ಮೂಡಿಸುತ್ತಿರುವುದು ಗಮನಾರ್ಹ ಸಂಗತಿ.

ದೇಹದಾನಕ್ಕೆ ಸ್ವಾಮೀಜಿಗಳ ವಾಗ್ದಾನ ಮಾಡಿದ ಸ್ವಾಮೀಜಿಗಳು (ETV Bharat)

ದೇಹದಾನಕ್ಕೆ ಸ್ವಾಮೀಜಿಗಳ ವಾಗ್ದಾನ:ಕೇವಲ ಜನಸಾಮಾನ್ಯರು ಅಷ್ಟೇ ಅಲ್ಲದೇ ಕೆಲ ಸ್ವಾಮೀಜಿಗಳು ಕೂಡ ಡಾ.ಮಹಾಂತೇಶ ರಾಮಣ್ಣವರ ಅವರಿಂದ ಪ್ರೇರಿತರಾಗಿ ದೇಹದಾನಕ್ಕೆ ಮುಂದಾಗಿದ್ದಾರೆ. 2017ರ ಏಪ್ರಿಲ್ 8ರಂದು ಕಾರಂಜಿಮಠದ ಗುರುಸಿದ್ಧ ಸ್ವಾಮೀಜಿ ವಾಗ್ದಾನ ಮಾಡಿದ್ದು, ಸ್ವಾಮೀಜಿ ಪ್ರೇರಣೆಯಿಂದಲೂ ಅವರ 200ಕ್ಕೂ ಅಧಿಕ ಭಕ್ತರು ದೇಹದಾನಕ್ಕೆ ನೋಂದಣಿ‌ ಮಾಡಿಸಿಕೊಂಡಿದ್ದಾರೆ.

ಸವದತ್ತಿ ತಾಲ್ಲೂಕಿನ ಮುನವಳ್ಳಿಯ ಸೋಮಶೇಖರ ಮಠದ ಮುರುಘೇಂದ್ರ ಸ್ವಾಮೀಜಿ 2010ರಲ್ಲೇ ನೇತ್ರದಾನಕ್ಕೆ ವಾಗ್ದಾನ ಮಾಡಿದ್ದರು. ಇವರಿಂದ‌ ಪ್ರೇರೇಪಣೆಗೊಂಡ 375ಕ್ಕೂ ಅಧಿಕ ಜನರು ಮರಣಾನಂತರ ತಮ್ಮ ನೇತ್ರ, ಚರ್ಮ, ದೇಹದಾನದ ಸಂಕಲ್ಪ ತೊಟ್ಟಿದ್ದರು. ಇವರಲ್ಲಿ ಈವರೆಗೆ ನಿಧನರಾದ 8 ಜನರ ಮೃತದೇಹಗಳನ್ನು ರಾಮಣ್ಣವರ ಚಾರಿಟೇಬಲ್ ಟ್ರಸ್ಟ್​ಗೆ ನೀಡಿದ್ದಾರೆ.

ರಾಯಭಾಗ ತಾಲ್ಲೂಕಿನ ಹಾರೂಗೇರಿಯ ಶರಣ ವಿಚಾರ ವಾಹಿನಿಯ ಐ.ಆರ್.ಮಠಪತಿ ಅವರು ಕೂಡ 2010ರ ನ.13ರಂದು ನೇತ್ರ, ಚರ್ಮ, ದೇಹದಾನ ಮಾಡುವುದಾಗಿ ಘೋಷಿಸಿದ್ದಾರೆ. ಇನ್ನು ಇವರ ಪ್ರವಚನದ ಪ್ರೇರಣೆಯಿಂದ 300ಕ್ಕೂ ಹೆಚ್ಚು ಜನರು ದೇಹದಾನಕ್ಕೆ ವಾಗ್ದಾನ ಮಾಡಿದ್ದಾರೆ. ಈ ಪೈಕಿ 30ಕ್ಕೂ ಅಧಿಕ ಜನರು ಈಗಾಗಲೇ ದೇಹದಾನ ಮಾಡಿದ್ದು ವಿಶೇಷ.

ರಾಮದುರ್ಗ ತಾಲ್ಲೂಕಿನ ನಾಗನೂರಿನ ಗುರುಬಸವ ಪೀಠದ ಬಸವಪ್ರಕಾಶ ಸ್ವಾಮೀಜಿ ನೇತ್ರ, ಚರ್ಮ, ದೇಹದಾನ ಮತ್ತು ಬಸವಗೀತಾ ಮಾತಾಜಿ ಅವರು 2022ರಲ್ಲಿ ಚರ್ಮದಾನಕ್ಕೆ ವಾಗ್ದಾನ ಮಾಡುವ ಮೂಲಕ ಸ್ವಾಮೀಜಿಗಳು ಕೂಡ ದೇಹದಾನ ಮಾಡಬಹುದು ಎಂಬುದನ್ನು ನಿರೂಪಿಸಿದ್ದಾರೆ.

ಮೃತದೇಹಗಳ ಅಭಾವ:"ಮೆಡಿಕಲ್, ಹೋಮಿಯೋಪತಿ, ಆಯುರ್ವೇದ, ಯೂನಾನಿ, ಸಿದ್ಧ ಹಾಗೂ ದಂತ ವೈದ್ಯಕೀಯ ಮಹಾವಿದ್ಯಾಲಯಗಳು ವರ್ಷದಿಂದ ವರ್ಷಕ್ಕೆ ಹೆಚ್ಚುತ್ತಿವೆ. ವೈದ್ಯಕೀಯ ಪ್ರವೇಶ ಪಡೆಯುವ ವಿದ್ಯಾರ್ಥಿಗಳ ಸಂಖ್ಯೆ ಕೂಡ ಜಾಸ್ತಿಯಾಗಿದೆ. ಮೃತದೇಹಗಳ ಅಭಾವ ಇರುವುದರಿಂದ ಎಷ್ಟೋ ವೈದ್ಯಕೀಯ ಹಾಗೂ ಆಯುರ್ವೇದ ಮಹಾವಿದ್ಯಾಲಯಗಳಲ್ಲಿ ಶವಚ್ಛೇದನ (Dissection) ಮಾಡಲು ಸಾಧ್ಯವಾಗುತ್ತಿಲ್ಲ. ಸ್ವಯಂ ಪ್ರೇರಿತರಾಗಿ ದೇಹದಾನ ಮಾಡುವರ ಸಂಖ್ಯೆ ಕಡಿಮೆಯಾಗಿದೆ. ದೇಹದಾನವೆಂದರೆ ಜನರಿಗೆ ಏನೋ ಒಂದು ತರಹದ ಅಳುಕು, ಅಸಹ್ಯ, ಧಾರ್ಮಿಕ ಕಟ್ಟಳೆಯ ಭಯ, ಆತ್ಮಕ್ಕೆ ಮೋಕ್ಷ ಸಿಗದ ಕಲ್ಪನೆಗಳು ಕಾಡುತ್ತಿವೆ" ಎಂಬುದು ಡಾ‌.ಮಹಾಂತೇಶ ರಾಮಣ್ಣವರ ಅವರ ಆತಂಕ.

ಕಾರಂಜಿಮಠದ ಗುರುಸಿದ್ಧ ಸ್ವಾಮೀಜಿ ಮಾತನಾಡಿ, "ದೇಹದಾನ ಕುರಿತು ಡಾ. ಮಹಾಂತೇಶ ರಾಮಣ್ಣವರ ಹೇಳಿದ್ದರು. ನಾವು ಕೂಡ ಸಾಕಷ್ಟು ಸಭೆ, ಸಮಾರಂಭ, ಪ್ರವಚನ ಕಾರ್ಯಕ್ರಮಗಳಲ್ಲಿ ಭಕ್ತರಿಗೆ ತಿಳಿಸಿದೆವು. ಆದರೆ, ಅಷ್ಟಾಗಿ ಸ್ಪಂದನೆ ಸಿಗಲಿಲ್ಲ. ಹಾಗಾಗಿ, ಕೊನೆಗೆ ನನ್ನ ದೇಹ ದಾನ ಮಾಡುವುದಾಗಿ ಘೋಷಿಸಿದೆ.‌ ಇದು ಭಕ್ತರ ಮೇಲೂ ಗಾಢವಾದ ಪರಿಣಾಮ ಬೀರಿ, ಸಾಕಷ್ಟು ಜನರು ತಾವು ಕೂಡ ದೇಹದಾನ ಮಾಡುವುದಾಗಿ ವಾಗ್ದಾನ ಮಾಡಿದರು. ಒಟ್ಟಾರೆ ದೇಹದಾನದಿಂದ ವೈದ್ಯಕೀಯ ವಿದ್ಯಾರ್ಥಿಗಳ ಅಧ್ಯಯನಕ್ಕೆ, ಹೊಸ ಸಂಶೋಧನೆ ಕೈಗೊಳ್ಳಲು ಅನುಕೂಲ ಆಗುತ್ತದೆ. ಹಾಗಾಗಿ, ಪ್ರತಿಯೊಬ್ಬರು ಈ ಬಗ್ಗೆ ಗಂಭೀರವಾಗಿ ಚಿಂತನೆ ನಡೆಸಲಿ" ಎಂದು ಆಶಿಸಿದರು.

"ಎಲ್ಲದಕ್ಕೂ ಒಂದೊಂದು ದಿನವಿದೆ. ಅದೇ ರೀತಿ ವಿಶ್ವ ದೇಹದಾನ ದಿನಾಚರಣೆಯನ್ನೂ ಘೋಷಣೆ ಮಾಡುವಂತೆ ಈ ಹಿಂದೆ ಆರೋಗ್ಯ ಸಚಿವರಾಗಿದ್ದ ಕೇಂದ್ರ ಸಚಿವ ಗುಲಾಮ್‌ ನಬಿ ಆಜಾದ್‌ ಅವರಿಗೆ ಕೆಎಲ್ಇ ಕಾರ್ಯಾಧ್ಯಕ್ಷ ಡಾ.ಪ್ರಭಾಕರ ಕೋರೆ ನೇತೃತ್ವದಲ್ಲಿ ಮನವಿ ಸಲ್ಲಿಸಲಾಗಿತ್ತು. ಇದನ್ನು ಅನೇಕ ವೈದ್ಯಕೀಯ ಸಮ್ಮೇಳನಗಳು ಬೆಂಬಲಿಸಿವೆ. ಹಾಗಾಗಿ, ಕೇಂದ್ರ ಸರ್ಕಾರ ಆದಷ್ಟು ಬೇಗ ನಿರ್ಧಾರ ಕೈಗೊಳ್ಳಬೇಕು. ದೇಹದಾನ ದಿನಾಚರಣೆ ವೇಳೆ ದೇಹದಾನಿಗಳನ್ನು ಸನ್ಮಾನಿಸಿದರೆ ಮತ್ತಷ್ಟು ಜನರಿಗೆ ಅದು ಸ್ಫೂರ್ತಿ ಆಗುತ್ತದೆ ಎನ್ನುತ್ತಾರೆ ಕೆಎಲ್ಇ ಶ್ರೀ ಬಿ‌.ಎಂ.ಕಂಕಣವಾಡಿ ಆಯುರ್ವೇದ ಮಹಾವಿದ್ಯಾಲಯದ ಮುಖ್ಯಸ್ಥ ಡಾ.ಮಹಾಂತೇಶ ರಾಮಣ್ಣವರ.

ಇದನ್ನೂ ಓದಿ:2,600 ಲೀಟರ್ ಎದೆಹಾಲು ದಾನ ಮಾಡಿ ಗಿನ್ನೆಸ್ ವಿಶ್ವದಾಖಲೆ ಬರೆದ ಅಮೆರಿಕದ ಅಮ್ಮ