ಕೆಕೆಆರ್​ ವಿರುದ್ಧ 262 ರನ್​ ಚೇಸ್​ ಮಾಡಿ ಗೆದ್ದ ಪಂಜಾಬ್​ ಕಿಂಗ್ಸ್​: ಟಿ20 ಕ್ರಿಕೆಟ್​ನಲ್ಲಿ ಇತಿಹಾಸ ಸೃಷ್ಟಿ - KKR vs PK Match

ಕೋಲ್ಕತ್ತಾದ ಈಡನ್​ ಗಾರ್ಡನ್ಸ್​ನಲ್ಲಿ ರನ್​ ಮಳೆಯೇ ಹರಿದಿದೆ. ಕೆಕೆಆರ್​ ಮತ್ತು ಪಂಜಾಬ್​ ಕಿಂಗ್ಸ್​ ಪಂದ್ಯದಲ್ಲಿ 523 ರನ್​ ಸಿಡಿಸಿ ಎರಡನೇ ಸರ್ವಾಧಿಕ ಮೊತ್ತ ದಾಖಲಿಸಿವೆ.

ಕೋಲ್ಕತ್ತಾ:ಹೊಡಿಬಡಿ ಆಟವಾದ ಟಿ20, ಕ್ರಿಕೆಟ್​ ಸ್ವರೂಪವನ್ನೇ ಬದಲಿಸಿದೆ. ಅದರಲ್ಲೂ, ಐಪಿಎಲ್​ನಲ್ಲಿ ದಿನಕ್ಕೊಂದು ದಾಖಲೆಗಳು ಸೃಷ್ಟಿಯಾಗುತ್ತಿವೆ. 287 ರನ್​ ಸಿಡಿಸುವ ಮೂಲಕ ಅತಿ ಹೆಚ್ಚು ರನ್​ ಪೇರಿಸಿದ ಸನ್​​ರೈಸರ್ಸ್ ಹೈದರಾಬಾದ್​​ ದಾಖಲೆ ಬರೆದಿತ್ತು. ಈಗ ಪಂಜಾಬ್​ ಕಿಂಗ್ಸ್​ ಅತಿ ಹೆಚ್ಚು ರನ್​ ಚೇಸ್​ ಮಾಡಿ ಗೆದ್ದು ವಿಶ್ವದಾಖಲೆ ಸೃಷ್ಟಿಸಿದೆ.

ಕೋಲ್ಕತ್ತಾದ ಈಡನ್​ ಗಾರ್ಡನ್​ನಲ್ಲಿ ಪಂಜಾಬ್​ ಕಿಂಗ್ಸ್​ ಟಿ-20 ಕ್ರಿಕೆಟ್​​ನ ಅಪ್ಪಟ ಸೊಬಗನ್ನು ಪರಿಚಯಿಸಿತು. ಟೂರ್ನಿಯಲ್ಲಿ ಭರ್ಜರಿ ಲಯದಲ್ಲಿರುವ ಕೋಲ್ಕತ್ತಾ ನೈಟ್ ರೈಡರ್ಸ್​ ತಂಡವನ್ನು ಚೆಂಡಾಡಿತು. ಕೆಕೆಆರ್​ ನೀಡಿದ್ದ ಬೆಟ್ಟದಂತಹ 261 ರನ್​​ ಗುರಿಯನ್ನು ಇನ್ನೂ 8 ಬಾಲ್​ಗಳು(18.4) ಉಳಿದಿರುವಂತೆಯೇ ಗುರಿ ಮುಟ್ಟಿ ಇತಿಹಾಸ ಬರೆಯಿತು.

ಬ್ಯಾಟಿಂಗೇ ಎಲ್ಲ, ಬೌಲಿಂಗ್​ ಲೆಕ್ಕಕ್ಕಿಲ್ಲ:ಈ ಋತುವಿನ ಐಪಿಎಲ್​ನಲ್ಲಿ ನಿಜಕ್ಕೂ ಬೌಲರ್​ಗಳ ಬಗ್ಗೆ ಅನುಕಂಪ ಮೂಡುತ್ತದೆ. ಪ್ರತಿ ಪಂದ್ಯದಲ್ಲೂ ಯಾವುದೇ ತಂಡದ ಬೌಲರ್​ ದಂಡನೆಗೆ ಗುರಿಯಾಗುತ್ತಿದ್ದಾನೆ. ಅದೆಷ್ಟೇ ಚಾಕಚಕತ್ಯೆಯಿಂದ ಬೌಲಿಂಗ್​ ಮಾಡಿದರೂ, ಬ್ಯಾಟಿಂಗ್​ ಪರಾಕ್ರಮದ ಮುಂದೆ ಸೆಡ್ಡು ಹೊಡೆಯಲಾಗುತ್ತಿಲ್ಲ.

ಟಾಸ್​ ಸೋತರೂ ಮೊದಲು ಬ್ಯಾಟ್​ ಮಾಡಿದ ಕೆಕೆಆರ್​ಗೆ ಫಿಲಿಪ್​ ಸಾಲ್ಟ್​​, ಸುನಿಲ್​ ನರೈನ್​ ಮತ್ತೊಮ್ಮೆ ದೈತ್ಯ ಇನಿಂಗ್ಸ್​ ಕಟ್ಟಿ ನೆರವಾದರು. ಸಾಲ್ಟ್​ 37 ಎಸೆತಗಳಲ್ಲಿ 75 ರನ್​ ಸಿಡಿಸಿದರು. ತಾನು ಬ್ಯಾಟರ್ರೋ, ಬೌಲರ್ರೋ ಎಂಬುದನ್ನೇ ಮರೆತಿರುವ ನರೈನ್​ ಪಂಜಾಬ್​ ಬೌಲರ್​ಗಳನ್ನು ಚಚ್ಚಿ 32 ಎಸೆತಗಳಲ್ಲಿ 71 ರನ್​ ಸಿಡಿಸಿದರು. ಮೊದಲ ವಿಕೆಟ್​ಗೆ ಇಬ್ಬರೂ ಸೇರಿ 10 ಓವರ್​​ಗಳಲ್ಲಿ 138 ರನ್​ ಗಳಿಸಿದರು. ಇದರ ಬಳಿಕ ಬಂದ ವೆಂಕಟೇಶ್​ ಅಯ್ಯರ್​ 39, ಆಂಡ್ರೆ ರಸೆಲ್​ 24, ನಾಯಕ ಶ್ರೇಯಸ್​ ಅಯ್ಯರ್​ 28 ರನ್​ ಗಳಿಸಿದರು. ಇದರಿಂದ ತಂಡ 20 ಓವರ್​ಗಳಲ್ಲಿ 6 ವಿಕೆಟ್​​ಗೆ 261 ರನ್​ ಪೇರಿಸಿತು.

ಗುರಿ ಮುಖ್ಯವಲ್ಲ, ಗೆಲುವು ನಮ್ದೇ:261 ರನ್​ಗಳ ಅಸಾಧ್ಯ ಗುರಿಯನ್ನು ಪಡೆದ ಬಳಿಕ ಯಾವುದೇ ತಂಡವಾದರೂ ತುಸು ಧೃತಿಗೆಡುವುದು ಸಹಜ. ಆದರೆ, ಇದ್ಯಾವುದನ್ನೂ ಲೆಕ್ಕಕ್ಕೆ ತೆಗೆದುಕೊಳ್ಳದ ಪಂಜಾಬ್​ ಸಿಡಿಲಬ್ಬರದ ಬ್ಯಾಟಿಂಗ್​ ನಡೆಸಿತು. ಆರಂಭಿಕನಾಗಿ ಬಂದ ಪ್ರಭ್​ಸಿಮ್ರಾನ್​​ ಸಿಂಗ್​ 20 ಎಸೆತಗಳಲ್ಲಿ 54 ಸಿಡಿಸಿದರು. ಇಂಗ್ಲೆಂಡ್​ ಹಿರಿಯ ಆಟಗಾರ ಜಾನಿ ಬೈರ್​ಸ್ಟೋವ್​ ಕೆಚ್ಚೆದೆಯ ಬ್ಯಾಟ್​ ಬೀಸಿ 48 ಎಸೆತಗಳಲ್ಲಿ 108 ರನ್​ ಗಳಿಸಿದರು. ಇಬ್ಬರೂ ಸೇರಿ 6 ಓವರ್​ಗಳ ಪವರ್​ಪ್ಲೇನಲ್ಲಿ 93 ರನ್​ ಕಲೆ ಹಾಕಿದರು. ರಿಲೆ ರೋಸ್ಸೊ 26, ಶಶಾಂಕ್​ ಸಿಂಗ್​ 68 ರನ್​ ಚಚ್ಚುವ ಮೂಲಕ 18.4 ಓವರ್​ಗಳಲ್ಲಿ ಗೆಲುವಿನ ಗುರಿಯನ್ನು ಮುಟ್ಟಿಸಿದರು.

ವಿಶ್ವದಾಖಲೆ ಸೃಷ್ಟಿ:ಬೃಹತ್​ ಗುರಿಯನ್ನು ಯಶಸ್ವಿಯಾಗಿ ಬೆನ್ನಟ್ಟಿದ ಪಂಜಾಬ್​ ಕಿಂಗ್ಸ್​ ಟಿ20 ಇತಿಹಾಸದಲ್ಲಿಯೇ ವಿಶ್ವದಾಖಲೆ ಸೃಷ್ಟಿಸಿತು. 262 ದಾಖಲಿಸುವ ಮೂಲಕ 2023 ರಲ್ಲಿ ದಕ್ಷಿಣ ಆಫ್ರಿಕಾದ ಹೆಸರಿನಲ್ಲಿ 259 ನರ್​ ಚೇಸಿಂಗ್​ ದಾಖಲೆಯನ್ನು ಮುರಿಯಿತು. ಐಪಿಎಲ್​ನಲ್ಲಿ 224 ರನ್​ ಚೇಸ್​​ ಮಾಡಿದ್ದೇ ಅತ್ಯಧಿಕವಾಗಿತ್ತು. ಆ ದಾಖಲೆಯೂ ಉಡೀಸ್​ ಆಯಿತು. ಪಂದ್ಯದಲ್ಲಿ ಬರೋಬ್ಬರಿ 523 ರನ್​ ದಾಖಲಾಗಿ 2ನೇ ಅತ್ಯಧಿಕ, ಇತ್ತಂಡಗಳು ಸಿಡಿಸಿದ 42 ಸಿಕ್ಸರ್​ ಟಿ20 ಕ್ರಿಕೆಟ್​ನ ಪಂದ್ಯವೊಂದರಲ್ಲಿ ದಾಖಲಾದ ಅತ್ಯಧಿಕ ಸಿಕ್ಸರ್​ ಎನಿಸಿಕೊಂಡಿತು.

ಇನ್ನೂ, ಈ ಬಾರಿಯ ಐಪಿಎಲ್​ನಲ್ಲಿ 250 ಕ್ಕೂ ಅಧಿಕ ರನ್​ಗಳು ಬಂದಿದ್ದು ಇದು 7ನೇ ಬಾರಿ. ಐಪಿಎಲ್​ ಆರಂಭವಾದ 2008 ರಿಂದ 2023 ರವರೆಗೂ ಕೇವಲ 2 ಬಾರಿ ಮಾತ್ರ 250+ ರನ್​ ದಾಖಲಾಗಿದ್ದವು. ಈ ದಾಖಲೆ ಒಂದೇ ಋತುವಿನಲ್ಲಿ ಮುರಿಯಿತು.

ಇದನ್ನೂ ಓದಿ:ಹೈದರಾಬಾದ್​ಗೆ 35 ರನ್​ ಸೋಲು: 6 ಸೋಲಿನ ಬಳಿಕ ಆರ್​ಸಿಬಿಗೆ ಮೊದಲ ಜಯ, ಫ್ಯಾನ್ಸ್​ ಖುಷ್​ - RCB vs SH match