ವಿಶಾಖಪಟ್ಟಣ:ಆರಂಭಿಕ ಆಟಗಾರ ಯಶಸ್ವಿ ಜೈಸ್ವಾಲ್ ದ್ವಿಶತಕ ಹಾಗೂ ವೇಗಿ ಜಸ್ಪ್ರೀತ್ ಬುಮ್ರಾ ಮಾರಕ ದಾಳಿಯ ನೆರವಿನಿಂದ ಇಂಗ್ಲೆಂಡ್ ವಿರುದ್ಧ ಎರಡನೇ ಟೆಸ್ಟ್ ಪಂದ್ಯದಲ್ಲಿ ಭಾರತ ಭರ್ಜರಿ ಮುನ್ನಡೆ ಸಾಧಿಸಿದೆ. ಎರಡನೇ ದಿನದ ಅಂತ್ಯಕ್ಕೆ ದ್ವಿತೀಯ ಇನ್ನಿಂಗ್ಸ್ನಲ್ಲಿ ವಿಕೆಟ್ ನಷ್ಟವಿಲ್ಲದೆ 28 ರನ್ ಗಳಿಸಿರುವ ರೋಹಿತ್ ಪಡೆ 171 ರನ್ಗಳ ಮುನ್ನಡೆಯಲ್ಲಿದೆ.
ಇದಕ್ಕೂ ಮುನ್ನ ಎರಡನೇ ದಿನದಾಟ ಆರಂಭಿಸಿದ ಭಾರತ 396 ರನ್ಗಳಿಗೆ ಆಲೌಟ್ ಆಯಿತು. ಭಾರತದ ಪರ ಅಮೋಘ ಬ್ಯಾಟಿಂಗ್ ಪ್ರದರ್ಶಿಸಿದ ಯಶಸ್ವಿ ಜೈಸ್ವಾಲ್ ಚೊಚ್ಚಲ ದ್ವಿಶತಕ (209) ದಾಖಲಿಸಿದರು. 290 ಎಸೆತಗಳನ್ನು ಎದುರಿಸಿದ ಯುವ ಬ್ಯಾಟರ್, 19 ಬೌಂಡರಿ ಹಾಗೂ 7 ಸಿಕ್ಸರ್ ಸಿಡಿಸಿದರು. ಜೇಮ್ಸ್ ಆ್ಯಂಡರ್ಸನ್ ಬೌಲಿಂಗ್ನಲ್ಲಿ ದೊಡ್ಡ ಹೊಡೆತಕ್ಕೆ ಯತ್ನಿಸಿ ವಿಕೆಟ್ ಒಪ್ಪಿಸಿದರು.
ಇದಕ್ಕೂ ಮುನ್ನ ಅಶ್ವಿನ್ 20 ರನ್ಗೆ ಔಟಾಗಿದ್ದರು. ಉಳಿದಂತೆ ಬಾಲಂಗೋಚಿಗಳು ಹೆಚ್ಚಿನ ರನ್ ಕೊಡುಗೆ ನೀಡಲಿಲ್ಲ. ಅಂತಿಮವಾಗಿ ಭಾರತ 396 ರನ್ಗೆ ಸರ್ವಪತನ ಕಂಡಿತು. ಇಂಗ್ಲೆಂಡ್ ಪರ ಆ್ಯಂಡರ್ಸನ್, ಶೋಯಬ್ ಬಶೀರ್ ಹಾಗೂ ರೆಹನ್ ಅಹ್ಮದ್ ತಲಾ 3 ಹಾಗೂ ಟಾಮ್ ಹಾರ್ಟ್ಲಿ 1 ವಿಕೆಟ್ ಕಬಳಿಸಿದರು.
ಬಳಿಕ, ಪ್ರಥಮ ಇನ್ನಿಂಗ್ಸ್ ಆಡಿದ ಆಂಗ್ಲರಿಗೆ ಜಾಕ್ ಕ್ರಾವ್ಲಿ (76) ಹಾಗೂ ಡಕೆಟ್ (21) 59 ರನ್ಗಳ ಉತ್ತಮ ಆರಂಭ ಒದಗಿಸಿದರು. ಈ ವೇಳೆ ಡಕೆಟ್ ಕುಲ್ದೀಪ್ ಬೌಲಿಂಗ್ನಲ್ಲಿ ಪಟಿದಾರ್ಗೆ ಕ್ಯಾಚ್ ನೀಡಿ ಹೊರನಡೆದರು. ಬಳಿಕ ಉತ್ತಮವಾಗಿ ಆಡುತ್ತಿದ್ದ ಕ್ರಾವ್ಲಿ ಶ್ರೇಯಸ್ ಅಯ್ಯರ್ ಹಿಡಿದ ಅದ್ಭುತ ಕ್ಯಾಚ್ಗೆ ಬಲಿಯಾದರು.
ಬಳಿಕ ಆಂಗ್ಲ ಬ್ಯಾಟರ್ಗಳನ್ನು ಕಾಡಿದ ಬುಮ್ರಾ, ಅನುಭವಿ ಜೋ ರೂಟ್ರನ್ನು ಪೆವಿಲಿಯನ್ಗೆ ಅಟ್ಟಿದರು. ಇದಾದ ಬಳಿಕ ಉತ್ತಮ ಲಯದಲ್ಲಿರುವ ಕಳೆದ ಪಂದ್ಯದ ಹೀರೋ ಓಲಿ ಪಾಪ್ರನ್ನು ಯಾರ್ಕರ್ ಮೂಲಕ ಕಂಗೆಡಿಸಿದ ಬುಮ್ರಾ ಇಂಗ್ಲೆಂಡ್ಗೆ ಡಬಲ್ ಶಾಕ್ ನೀಡಿದರು. ಇದಾದ ಕೆಲ ಹೊತ್ತಲ್ಲೇ ಜಾನಿ ಬೈರ್ಸ್ಟೋ ಕೂಡ ಜಸ್ಪ್ರೀತ್ ಬೌಲಿಂಗ್ನಲ್ಲಿ ಗಿಲ್ಗೆ ಕ್ಯಾಚ್ ನೀಡಿ ಹೊರನಡೆದರು. ಆಗ ಇಂಗ್ಲೆಂಡ್ 159 ರನ್ಗಳಿಗೆ 5 ವಿಕೆಟ್ ಕಳೆದುಕೊಂಡಿತು.
ತದನಂತರ ಕೆಳಕ್ರಮಾಂಕದ ಬ್ಯಾಟರ್ಗಳೊಂದಿಗೆ ಹೋರಾಟ ನಡೆಸಿದ ನಾಯಕ ಬೆನ್ ಸ್ಟೋಕ್ಸ್ 47 ರನ್ ಬಾರಿಸಿ ಬುಮ್ರಾ ಬೌಲಿಂಗ್ನಲ್ಲಿ ಬೌಲ್ಡ್ ಆದರು. ಈ ನಡುವೆ, ವಿಕೆಟ್ ಕೀಪಿಂಗ್ ಬ್ಯಾಟರ್ ಫೋಕ್ಸ್ 6 ರನ್ಗೆ ಕುಲ್ದೀಪ್ ಎಸೆತದಲ್ಲಿ ವಿಕೆಟ್ ಕಳೆದುಕೊಂಡರು. ಇನ್ನುಳಿದಂತೆ, ಅಹ್ಮದ್ 6, ಹಾರ್ಟ್ಲಿ 21 ಹಾಗು ಅ್ಯಂಡರ್ಸನ್ 6 ರನ್ಗೆ ಔಟಾದರೆ, ಬಶೀರ್ ಅಜೇಯ 8 ರನ್ ಗಳಿಸಿದರು. 253 ರನ್ಗಳಿಗೆ ಸಂಪೂರ್ಣ ಆಂಗ್ಲ ಪಡೆ ಪೆವಿಲಿಯನ್ ಸೇರಿತು. ಭಾರತದ ಪರ ವೇಗಿ ಬುಮ್ರಾ 45ಕ್ಕೆ 6 ಹಾಗೂ ಕುಲ್ದೀಪ್ 71ಕ್ಕೆ 3 ವಿಕೆಟ್ ಕಬಳಿಸಿ ಮೇಲುಗೈಗೆ ಕಾರಣರಾದರು.
ದಿನದ ಕೊನೆಯಲ್ಲಿ ಎರಡನೇ ಇನ್ನಿಂಗ್ಸ್ ಆರಂಭಿಸಿರುವ ಭಾರತ ವಿಕೆಟ್ ನಷ್ಟವಿಲ್ಲದೆ 28 ರನ್ ಕಲೆ ಹಾಕಿದ್ದು, ಒಟ್ಟಾರೆ ಲೀಡ್ 171 ರನ್ ಆಗಿದೆ. ಜೈಸ್ವಾಲ್ 15 ಹಾಗೂ ನಾಯಕ ರೋಹಿತ್ 13 ರನ್ಗಳೊಂದಿಗೆ ಮೂರನೇ ದಿನಕ್ಕೆ ಬ್ಯಾಟಿಂಗ್ ಕಾಯ್ದುಕೊಂಡಿದ್ದಾರೆ.
ಇದನ್ನೂ ಓದಿ:ಮತ್ತೆ ತಾಳ್ಮೆ ಕಳೆದುಕೊಂಡ ಡ್ಯಾಶಿಂಗ್ ಓಪನರ್ ಶುಭ್ಮನ್ ಗಿಲ್: ರವಿಶಾಸ್ತ್ರಿ ಅಸಮಾಧಾನ
