ಸಾರಿ ಸಿರಾಜ್​.. ಇದೇ ಕಾರಣಕ್ಕೆ ನಿನ್ನ ಚಾಂಪಿಯನ್​ ಟ್ರೋಫಿಗೆ ಆಯ್ಕೆ ಮಾಡಲಿಲ್ಲ: ರೋಹಿತ್​ ಶರ್ಮಾ!

ಚಾಂಪಿಯನ್ಸ್​ ಟ್ರೋಫಿಗೆ ವೇಗದ ಬೌಲರ್​ ಮೊಹಮ್ಮದ್​ ಸಿರಾಜ್​ ಅವರನ್ನು ಆಯ್ಕೆ ಮಾಡದಿರುವ ಬಗ್ಗೆ ನಾಯಕ ರೋಹಿತ್​ ಶರ್ಮಾ ಸ್ಪಷ್ಟನೆ ನೀಡಿದ್ದಾರೆ.

ಫೆಬ್ರವರಿ ತಿಂಗಳಿನಿಂದ ಆರಂಭವಾಗಲಿರುವ ಐಸಿಸಿ ಚಾಂಪಿಯನ್ಸ್​ ಟ್ರೋಫಿ (ICC Champions Trophy) ಮತ್ತು ಇಂಗ್ಲೆಂಡ್ (England)​ ವಿರುದ್ಧದ ಮೂರು ಏಕದಿನ ಪಂದ್ಯಗಳಿಗಾಗಿ ಇಂದು ಭಾರತ ತಂಡ (Team India)ವನ್ನು ಪ್ರಕಟಿಸಲಾಗಿದೆ.

ಮುಂಬೈನಲ್ಲಿ ನಡೆದಿದ್ದ ಸುದ್ಧಿಗೋಷ್ಠಿಯಲ್ಲಿ ಟೀಂ ಇಂಡಿಯಾದ ಮುಖ್ಯ ಆಯ್ಕೆಗಾರ ಅಜಿತ್​ ಅಗರ್ಕರ್​ 15 ಸದಸ್ಯರ ಬಲಿಷ್ಠ ತಂಡವನ್ನು ಪ್ರಕಡಿಸಿದ್ದಾರೆ. ರೋಹಿತ್​​ ಶರ್ಮಾ ನಾಯಕನಾಗಿ ತಂಡವನ್ನು ಮುನ್ನಡೆಸಲಿದ್ದು, ಯುವ ಆಟಗಾರ ಶುಭಮನ್​ ಗಿಲ್​​ ಉಪನಾಯಕನಾಗಿ ನೇಮಕಗೊಂಡಿದ್ದಾರೆ. ಉಳಿದಂತೆ ಈ 15 ಸದಸ್ಯರ ತಂಡದಲ್ಲಿ ಮೊಹಮ್ಮದ್​ ಶಮಿ ಅವರು ಸ್ಥಾನ ಪಡೆದುಕೊಂಡಿದ್ದು ಜೈಸ್ವಾಲ್​ ಕೂಡ ಆಯ್ಕೆಯಾಗಿದ್ದಾರೆ.

ಜಸ್ಪ್ರೀತ್​ ಬುಮ್ರಾ ಬದಲಿಗೆ ಇವರು ಕಣಕ್ಕೆ: ಆದರೆ, ಇಂಗ್ಲೆಂಡ್​ ವಿರುದ್ಧದ ಸರಣಿಯಲ್ಲಿ ಜಸ್ಪ್ರೀತ್​ ಬುಮ್ರಾ ಹೊರಗುಳಿಯಲಿದ್ದು ಅವರ ಸ್ಥಾನಕ್ಕೆ ಬದಲಿ ಆಟಗಾರನಾಗಿ ಹರ್ಷಿತ್​ ರಾಣ ಆಡಲಿದ್ದಾರೆ ಎಂದು ಅಗರ್ಕರ್​ ತಿಳಿಸಿದ್ದಾರೆ. ಫೆ.6 ರಿಂದ ಟೀಂ ಇಂಡಿಯಾ ಇಂಗ್ಲೆಂಡ್​ ವಿರುದ್ಧ 3 ಪಂದ್ಯಗಳ ಏಕದಿನ ಸರಣಿ ಆಡಲಿದೆ. ಇದರ ಬೆನ್ನಲ್ಲೆ ಭಾರತ ಫೆ.20 ರಿಂದ ಚಾಂಪಿಯನ್ಸ್​ ಟ್ರೋಫಿ ಆಡಲಿದೆ. ಮೊದಲ ಪಂದ್ಯದಲ್ಲಿ ಬಾಂಗ್ಲಾದೇಶದೊಂದಿಗೆ ಸೆಣಸಲಿದೆ.

ಸ್ಟಾರ್​ ಬೌಲರ್​ ಏಕೆ ಸೆಲೆಕ್ಟ್​​ ಮಾಡಿಲ್ಲ?: ಏತನ್ಮದ್ಯೆ, ಚಾಂಪಿಯನ್ಸ್​ ಟ್ರೋಫಿಗೆ ಟೀಂ ಇಂಡಿಯಾದ ಸ್ಟಾರ್​ ಬೌಲರ್​ ಎನಿಸಿಕೊಂಡಿರುವ ಮೊಹಮ್ಮದ್​ ಸಿರಾಜ್​ ಅವರನ್ನು ಆಯ್ಕೆ ಮಾಡಲಾಗಿಲ್ಲ. ಅವರ ಸ್ಥಾನಕ್ಕೆ ಅರ್ಷದೀಪ್​ ಅವರನ್ನು ತಂಡಕ್ಕೆ ಸೇರಿಸಿಕೊಳ್ಳಲಾಗಿದೆ. ಇದರ ಬೆನ್ನಲ್ಲೆ ಅಭಿಮಾನಿಗಳು ಬೇಸರ ಹೊರಹಾಕಿದ್ದು, ಅರ್ಷದೀಪ್​ಗೆ ಹೋಲಿಕೆ ಮಾಡಿದರೇ ಸಿರಾಜ್​ಗೆ ಹೆಚ್ಚಿನ ಅನುಭವವಿದೆ ಮತ್ತು ವಿಕೆಟ್​ ಪಡೆಯುವ ಸಾಮರ್ಥ್ಯ ಇದೆ ಎಂದಿದ್ದಾರೆ. ಅಲ್ಲದೇ ಅವರನ್ನು ತಂಡಕ್ಕೆ ಆಯ್ಕೆ ಮಾಡದಿರಲು ಕಾರಣ ಏನು ಎಂದು ಪತ್ರಕರ್ತರು ಸುದ್ದಿಗೋಷ್ಠಿಯಲ್ಲಿ ಪ್ರಶ್ನಿಸಿದ್ದಾರೆ. ಇದಕ್ಕೆ ನಾಯಕ ರೋಹಿತ್​ ಶರ್ಮಾ ಪ್ರತಿಕ್ರಿಯೆ ನೀಡಿ ಆಯ್ಕೆ ಮಾಡದಿರಲು ಕಾರಣ ತಿಳಿಸಿದ್ದಾರೆ.

ಪ್ರಶ್ನೆಗೆ ರೋಹಿತ್​ ಉತ್ತರಿಸಿದ್ದು ಹೀಗೆ: ಸಿರಾಜ್​ ಅವರನ್ನು ತಂಡಕ್ಕೆ ಏಕೆ ಸೇರಿಸಿಕೊಂಡಿಲ್ಲ ಎಂದು ಪತ್ರಕರ್ತರು ಕೇಳಿದಕ್ಕೆ ಉತ್ತರಿಸಿದ ರೋಹಿತ್​, ಪಂದ್ಯದಲ್ಲಿ ಹೊಸ ಮತ್ತು ಹಳೆಯ ಚೆಂಡಿನೊಂದಿಗೆ ಪ್ರಭಾವ ಬೀರುವ ಆಟಗಾರರನ್ನು ಪಂದ್ಯಾವಳಿಗೆ ಆಯ್ಕೆ ಮಾಡಲು ಬಯಸಿದ್ದೇವೆ. ಸಿರಾಜ್ ಉತ್ತಮ ಬೌಲರ್​ ಹೌದು, ಆದರೆ ಅವರು ಹೊಸ ಚೆಂಡು ಇದ್ದಾಗ ಮಾತ್ರ ಉತ್ತಮ ಬೌಲಿಂಗ್​ ಮಾಡುತ್ತಾರೆ. ಚೆಂಡು ಶೈನ್​ ಕಳೆದುಕೊಂಡು ಹಳೆಯದಾದರೇ ಸಿರಾಜ್​ ಪ್ರಭಾವ ಬೀರಲ್ಲ.

ಅರ್ಷದೀಪ್ ಆರಂಭಿಕ ಓವರ್‌ಗಳಲ್ಲಿ ಸ್ವಿಂಗ್ ಮತ್ತು ಡೆತ್ ಓವರ್‌ಗಳಲ್ಲಿ ಅಪಾಯಕಾರಿ ಬೌಲಿಂಗ್‌ ಮಾಡುತ್ತಾರೆ ವಿಕೆಟ್​ಗಳನ್ನು ಉರುಳಿಸುತ್ತಾರೆ. ಅಲ್ಲದೇ ಕಳೆದ ವರ್ಷ ಟಿ20 ವಿಶ್ವಕಪ್‌ನಲ್ಲಿ ಅದ್ಭುತವಾಗಿ ಬೌಲಿಂಗ್ ಮಾಡಿ ಅತ್ಯುತ್ತಮ ಫಾರ್ಮ್‌ನಲ್ಲಿದ್ದರು. ಆದ್ರೆ ಸಿರಾಜ್​ ಚೆಂಡು ಹಳೆಯದಾದ ಮೇಲೆ ಮಧ್ಯಮ ಮತ್ತು ಡೆತ್​ ಓವರ್​​ನಲ್ಲಿ ಅಪಾಯಕಾರಿ ಬೌಲಿಂಗ್​ ಮಾಡಲು ವಿಫಲರಾಗುತ್ತಾರೆ. ಇದೆ ಕಾರಣಕ್ಕೆ ಅವರನ್ನು ತಂಡದಿಂದ ಕೈಬಿಡಲಾಗಿದೆ. ಇದಲ್ಲದೇ ಗಾಯದಿಂದ ಬಳಲುತ್ತಿರುವ ಜಸ್ಪ್ರೀತ್ ಬುಮ್ರಾ ಅವರನ್ನು ಕೂಡ ಮೂರನೇ ವೇಗಿಯಾಗಿ ಇರಿಸಲಾಗಿದೆ ಎಂದು ರೋಹಿತ್​ ಶರ್ಮಾ ತಿಳಿಸಿದ್ದಾರೆ.

ಇದನ್ನೂ ಓದಿ: ಒಂದೇ ಒಂದು ತಪ್ಪಿನಿಂದ ಚಾಂಪಿಯನ್ಸ್​ ಟ್ರೋಫಿಯಿಂದಲೇ ಹೊರಬಿದ್ದ ವಿಕೆಟ್​​ ಕೀಪರ್​!