ಐಸಿಸಿ ಟೆಸ್ಟ್​ ರ‍್ಯಾಂಕಿಂಗ್: ಟಾಪ್​ 10ರಲ್ಲಿ ಇಬ್ಬರು ಭಾರತೀಯರು, ಬೌಲರ್‌ಗಳಿಗೆ ಬುಮ್ರಾ ಬಾಸ್‌​!

ICC Test Ranking: ಐಸಿಸಿ ನೂತನ ಟೆಸ್ಟ್​ ರ‍್ಯಾಂಕಿಂಗ್ ಪ್ರಕಟಗೊಂಡಿದೆ. ಬ್ಯಾಟಿಂಗ್​ ವಿಭಾಗದಲ್ಲಿ ಟಾಪ್​ 10ರಲ್ಲಿ ಇಬ್ಬರು ಭಾರತೀಯರಿದ್ದಾರೆ.

ICC Test Ranking: ಬಾರ್ಡರ್​-ಗವಾಸ್ಕರ್​ ಟ್ರೋಫಿ ಸರಣಿ ಬೆನ್ನಲ್ಲೇ ಐಸಿಸಿ ನೂತನ ಟೆಸ್ಟ್​ ರ‍್ಯಾಂಕಿಂಗ್ ಪಟ್ಟಿ ಪ್ರಕಟಿಸಿದೆ. ಆಸ್ಟ್ರೇಲಿಯಾ ವಿರುದ್ಧದ ಸರಣಿಯಲ್ಲಿ ಅತ್ಯುತ್ತಮ ಪ್ರದರ್ಶನ ತೋರಿದ ಭಾರತದ ವೇಗದ ಬೌಲರ್​ ಜಸ್ಪ್ರೀತ್​ ಬುಮ್ರಾ ಬೌಲಿಂಗ್​ ವಿಭಾಗದಲ್ಲಿ ಅಗ್ರಸ್ಥಾನದಲ್ಲಿ​ ಮುಂದುವರೆದಿದ್ದಾರೆ.

ಬುಮ್ರಾ 908 ರೇಟಿಂಗ್​ ಪಾಯಿಂಟ್ಸ್​ನೊಂದಿಗೆ ಮೊದಲ ಸ್ಥಾನ ಪಡೆದರೆ, ಆಸ್ಟ್ರೇಲಿಯಾ ನಾಯಕ ಪ್ಯಾಟ್ ಕಮ್ಮಿನ್ಸ್ (841) ಎರಡನೇ ಸ್ಥಾನದಲ್ಲಿದ್ದಾರೆ. ಬಾರ್ಡರ್-ಗವಾಸ್ಕರ್ ಟ್ರೋಫಿ ಸರಣಿಯಲ್ಲಿ ಮಿಂಚಿದ್ದ ವೇಗಿ ಸ್ಕಾಟ್ ಬೋಲ್ಯಾಂಡ್ 29 ಸ್ಥಾನಗಳಷ್ಟು ಜಿಗಿತ ಕಂಡು 9ನೇ ಸ್ಥಾನಕ್ಕೆ ಏರಿಕೆ ಕಂಡಿದ್ದಾರೆ. ಇವರು 745 ರೇಟಿಂಗ್​ ಪಾಯಿಂಟ್ಸ್​ನೊಂದಿಗೆ ಜಡೇಜಾರೊಂದಿಗೆ ಜಂಟಿಯಾಗಿ ಒಂಬತ್ತನೇ ಸ್ಥಾನಿಯಾಗಿದ್ದಾರೆ.

ಟೆಸ್ಟ್​ ಟಾಪ್ 5 ಬೌಲರ್‌ಗಳು:

• ಜಸ್ಪ್ರೀತ್ ಬುಮ್ರಾ (ಭಾರತ) - 908 ರೇಟಿಂಗ್​ ಪಾಯಿಂಟ್ಸ್​
• ಪ್ಯಾಟ್ ಕಮ್ಮಿನ್ಸ್ (ಆಸ್ಟ್ರೇಲಿಯಾ) - 841 ರೇಟಿಂಗ್​ ಪಾಯಿಂಟ್ಸ್​
• ಕಗಿಸೊ ರಬಾಡ (ದಕ್ಷಿಣ ಆಫ್ರಿಕಾ) - 837 ರೇಟಿಂಗ್​ ಪಾಯಿಂಟ್ಸ್​
• ಜೋಶ್ ಹ್ಯಾಜಲ್‌ವುಡ್ (ಆಸ್ಟ್ರೇಲಿಯಾ) - 835 ರೇಟಿಂಗ್​ ಪಾಯಿಂಟ್ಸ್​
• ಮಾರ್ಕೊ ಜಾನ್ಸನ್ (ದಕ್ಷಿಣ ಆಫ್ರಿಕಾ) - 785 ರೇಟಿಂಗ್​ ಪಾಯಿಂಟ್ಸ್​

ಬ್ಯಾಟಿಂಗ್‌ನಲ್ಲಿ ರಿಷಬ್ ಪಂತ್ 739 ರೇಟಿಂಗ್​ ಪಾಯಿಂಟ್ಸ್​ ಪಡೆದು ಮೂರು ಸ್ಥಾನಗಳಷ್ಟು ಏರಿಕೆ ಕಂಡು ಅಗ್ರ 9ನೇ ಸ್ಥಾನಕ್ಕೆ ಏರಿದ್ದಾರೆ. ಯುವ ಬ್ಯಾಟರ್ ಯಶಸ್ವಿ ಜೈಸ್ವಾಲ್ 847 ಪಾಯಿಂಟ್ಸ್​ನೊಂದಿಗೆ ನಾಲ್ಕನೇ ಸ್ಥಾನದಲ್ಲಿದ್ದಾರೆ. ದಕ್ಷಿಣ ಆಫ್ರಿಕಾ ಟೆಸ್ಟ್ ತಂಡದ ನಾಯಕ ತೆಂಬಾ ಬವುಮಾ (769) 6ನೇ ಸ್ಥಾನ ಪಡೆದಿದ್ದಾರೆ. ಇಂಗ್ಲೆಂಡ್‌ನ ಸ್ಟಾರ್ ಬ್ಯಾಟರ್ ಜೋ ರೂಟ್ (895) ಈ ಪಟ್ಟಿಯಲ್ಲಿ ಅಗ್ರಸ್ಥಾನದಲ್ಲೇ ಮುಂದುವರಿದಿದ್ದಾರೆ.

ಟೀಂ ಇಂಡಿಯಾದ ಹಿರಿಯ ಆಟಗಾರರಾದ ರೋಹಿತ್ ಶರ್ಮಾ ಮತ್ತು ವಿರಾಟ್ ಕೊಹ್ಲಿ ಸ್ಥಾನಗಳು ಕುಸಿದಿವೆ. ರೋಹಿತ್ ಶರ್ಮಾ (554 ರೇಟಿಂಗ್​ ಪಾಯಿಂಟ್ಸ್​) ಎರಡು ಸ್ಥಾನ ಕಳೆದುಕೊಂಡು 42ನೇ ಸ್ಥಾನಕ್ಕೆ ತಲುಪಿದರೆ, ವಿರಾಟ್ ಕೊಹ್ಲಿ (614) ಮೂರು ಸ್ಥಾನ ಕುಸಿತ ಕಂಡು 27ನೇ ಸ್ಥಾನಕ್ಕಿಳಿದಿದ್ದಾರೆ.

ಟಾಪ್ 5 ಟೆಸ್ಟ್​ ಬ್ಯಾಟರ್‌ಗಳು:

• ಜೋ ರೂಟ್ (ಇಂಗ್ಲೆಂಡ್)- 895 ರೇಟಿಂಗ್​ ಪಾಯಿಂಟ್ಸ್​
• ಹ್ಯಾರಿ ಬ್ರೂಕ್ (ಇಂಗ್ಲೆಂಡ್)- 876 ರೇಟಿಂಗ್​ ಪಾಯಿಂಟ್ಸ್​
• ಕೇನ್ ವಿಲಿಯಮ್ಸನ್ (ನ್ಯೂಜಿಲೆಂಡ್) - 867 ರೇಟಿಂಗ್​ ಪಾಯಿಂಟ್ಸ್​
• ಯಶಸ್ವಿ ಜೈಸ್ವಾಲ್ (ಭಾರತ) - 847 ರೇಟಿಂಗ್​ ಪಾಯಿಂಟ್ಸ್​
• ಟ್ರಾವಿಸ್ ಹೆಡ್ (ಆಸ್ಟ್ರೇಲಿಯಾ) - 772 ರೇಟಿಂಗ್​ ಪಾಯಿಂಟ್ಸ್​

ಟಾಪ್​ 5 ಟೆಸ್ಟ್​ ತಂಡಗಳು:

ಬಾರ್ಡರ್-ಗವಾಸ್ಕರ್​​ ಸರಣಿ ಸೋಲಿನ ಬಳಿಕ ಭಾರತ ಟೆಸ್ಟ್​ ರ‍್ಯಾಂಕಿಂಗ್​ನಲ್ಲೂ ಕುಸಿದಿದೆ. ಎರಡು ಸ್ಥಾನಗಳಷ್ಟು ಕುಸಿದು 3ನೇ ಸ್ಥಾನಕ್ಕಿಳಿದಿದೆ. ಆಸ್ಟ್ರೇಲಿಯಾ 126 ರೇಟಿಂಗ್ ಪಾಯಿಂಟ್ಸ್​​​ನೊಂದಿಗೆ ಮೊದಲ ಸ್ಥಾನದಲ್ಲಿದ್ದರೆ, ದಕ್ಷಿಣ ಆಫ್ರಿಕಾ (112​), ಭಾರತ (109​), ಇಂಗ್ಲೆಂಡ್​ (105​), ನ್ಯೂಜಿಲೆಂಡ್​ (87​) ಕ್ರಮವಾಗಿ ನಂತರದ ಸ್ಥಾನದಲ್ಲಿವೆ.

ಇದನ್ನೂ ಓದಿ:2019ರ ವಿಶ್ವಕಪ್‌ನಲ್ಲಿ ಭಾರತದ ಸೋಲಿಗೆ ಕಾರಣವಾಗಿದ್ದ ಸ್ಟಾರ್​ ಕ್ರಿಕೆಟರ್ ನಿವೃತ್ತಿ