ಲಂಡನ್ (ಇಂಗ್ಲೆಂಡ್):ಇಂಗ್ಲೆಂಡ್ ಕ್ರಿಕೆಟ್ ತಂಡದ ಹಿರಿಯ ವೇಗಿ ಜೇಮ್ಸ್ ಆ್ಯಂಡರ್ಸನ್ ವೃತ್ತಿಜೀವನದ ಕೊನೆಯಲ್ಲಿದ್ದು, ವೆಸ್ಟ್ ಇಂಡೀಸ್ ವಿರುದ್ಧದ ಮೊದಲ ಟೆಸ್ಟ್ ಪಂದ್ಯ ಅವರಿಗೆ ಕೊನೆಯಾಗಲಿದೆ. ಹಿರಿಯ ಆಟಗಾರನಿಗೆ ಗೆಲುವಿನ ವಿದಾಯ ನೀಡಲು ಇಂಗ್ಲೆಂಡ್ ತಂಡ ಯೋಜಿಸಿದ್ದರೆ, ಕೊನೆಯ ಪಂದ್ಯದಲ್ಲಿ ಉತ್ತಮ ಪ್ರದರ್ಶನ ನೀಡಿದಲ್ಲಿ ಮಹತ್ತರ ದಾಖಲೆ ಮಾಡುವ ಅವಕಾಶವೂ ಜೇಮ್ಸ್ಗಿದೆ.
ಜುಲೈ 10 ರಿಂದ 3 ಪಂದ್ಯಗಳ ಟೆಸ್ಟ್ ಸರಣಿ ಆರಂಭವಾಗಲಿದೆ. ವೆಸ್ಟ್ ಇಂಡೀಸ್ ತಂಡ ಇಂಗ್ಲೆಂಡ್ ಪ್ರವಾಸ ಕೈಗೊಳ್ಳಲಿದೆ. ಮೊದಲ ಪಂದ್ಯ ಜುಲೈ 10 ರಿಂದ 14 ರವರೆಗೆ ನಡೆಯಲಿದ್ದು, ಈ ಪಂದ್ಯದಲ್ಲಿ ಜೇಮ್ಸ್ 9 ವಿಕೆಟ್ ಉರುಳಿಸಿದಲ್ಲಿ ಟೆಸ್ಟ್ ಕ್ರಿಕೆಟ್ ಇತಿಹಾಸದಲ್ಲಿ ಅತಿ ಹೆಚ್ಚು ವಿಕೆಟ್ ಕಬಳಿಸಿದ ವಿಶ್ವದ ಮೊದಲ ವೇಗಿ ಮತ್ತು ಎರಡನೇ ಬೌಲರ್ ಎನಿಸಿಕೊಳ್ಳಲಿದ್ದಾರೆ.
ಹೌದು, ಜೇಮ್ಸ್ ಆ್ಯಂಡರ್ಸನ್ ಈಗಾಗಲೇ ಟೆಸ್ಟ್ ಇತಿಹಾಸದಲ್ಲಿ ಅತಿಹೆಚ್ಚು ವಿಕೆಟ್ ಪಡೆದ 3ನೇ ಬೌಲರ್ ಎನಿಸಿಕೊಂಡಿದ್ದಾರೆ. ಇದೀಗ ಮತ್ತೊಂದು ಮೆಟ್ಟಿಲು ಏರುವ ಅವಕಾಶವಿದೆ. ಹೀಗಾಗಿ ವೆಸ್ಟ್ ಇಂಡೀಸ್ ವಿರುದ್ಧದ ಸರಣಿಯ ಮೊದಲ ಟೆಸ್ಟ್ ಪಂದ್ಯಕ್ಕೆ ಹೆಚ್ಚಿನ ಮಹತ್ವವಿದೆ. ಜೇಮ್ಸ್ ಆಂಡರ್ಸನ್ ಅವರು ಪಂದ್ಯದ ನಂತರ ಅಂತಾರಾಷ್ಟ್ರೀಯ ಕ್ರಿಕೆಟ್ಗೆ ನಿವೃತ್ತಿಯಾಗಲಿದ್ದಾರೆ.
ಅಗ್ರ 2 ನೇ ಸ್ಥಾನಕ್ಕೇರುತ್ತಾರಾ ಜೇಮ್ಸ್?:ವಿಂಡೀಸ್ ವಿರುದ್ಧದ ಮೊದಲ ಪಂದ್ಯ ಜೇಮ್ಸ್ರ ಕೊನೆಯ ಪಂದ್ಯವಾಗಿರುವ ಕಾರಣ, 41ರ ಪ್ರಾಯದ ಆಟಗಾರನಿಗೆ ಪಂದ್ಯದಲ್ಲಿ ವಿಶಿಷ್ಟ ದಾಖಲೆಗಳನ್ನು ಮುರಿಯುವ ಅವಕಾಶವಿದೆ. ಇದು ಸಾಧ್ಯವಾದಲ್ಲಿ ವಿದಾಯದ ಪಂದ್ಯ ಅವಿಸ್ಮರಣೀಯವಾಗಲಿದೆ.
ಸದ್ಯ, ಆ್ಯಂಡರ್ಸನ್ 187 ಟೆಸ್ಟ್ ಪಂದ್ಯಗಳಿಂದ ಭರ್ತಿ 700 ವಿಕೆಟ್ ಪಡೆದಿದ್ದಾರೆ. ಅತಿ ಹೆಚ್ಚು ವಿಕೆಟ್ ಪಡೆದವರ ಪಟ್ಟಿಯಲ್ಲಿ ಮೂರನೇ ಸ್ಥಾನದಲ್ಲಿದ್ದಾರೆ. ಇದೇ ಪಟ್ಟಿಯಲ್ಲಿ 2ನೇ ಸ್ಥಾನದಲ್ಲಿರುವ ಆಸ್ಟ್ರೇಲಿಯಾದ ದಿಗ್ಗಜ ಸ್ಪಿನ್ ಮಾಂತ್ರಿಕ ಶೇನ್ವಾರ್ನ್ 145 ಪಂದ್ಯಗಳಿಂದ 708 ವಿಕೆಟ್ ಪಡೆದಿದ್ದಾರೆ. ಅಂದರೆ, ಆ್ಯಂಡರ್ಸನ್ಗೆ ಈ ದಾಖಲೆ ಅಳಿಸಿ ಹಾಕಲು ಒಂಬತ್ತು ವಿಕೆಟ್ ಬೇಕು. ಇಷ್ಟು ವಿಕೆಟ್ ಉರುಳಿಸಿದಲ್ಲಿ ಅವರು, ರೆಡ್ ಬಾಲ್ ಕ್ರಿಕೆಟ್ನಲ್ಲಿ ಹೆಚ್ಚು ವಿಕೆಟ್ ಪಡೆದ ಬೌಲರ್‌ಗಳ ಪಟ್ಟಿಯಲ್ಲಿ ಎರಡನೇ ಸ್ಥಾನಕ್ಕೇರುವ ಮೂಲಕ ಸ್ಮರಣೀಯ ವಿದಾಯ ಹೇಳಲಿದ್ದಾರೆ.
ಹಲವು ದಾಖಲೆಗಳು: ಇಂಗ್ಲೆಂಡ್ನ ಬಲಗೈ ವೇಗಿ ಜೇಮ್ಸ್, ಅಂತಾರಾಷ್ಟ್ರೀಯ ಕ್ರಿಕೆಟ್ನಲ್ಲಿ ಒಟ್ಟು 987 ವಿಕೆಟ್‌ಗಳನ್ನು ಉರುಳಿಸಿದ್ದಾರೆ. ಟೆಸ್ಟ್ನಲ್ಲಿ ಅತಿ ಯಶಸ್ವಿ ಬೌಲರ್ ಆಗಿರುವ ಅವರು 700 ವಿಕೆಟ್ ಸಾಧನೆ ಮಾಡಿದ್ದರೆ, ಏಕದಿನದಲ್ಲಿ 269 ವಿಕೆಟ್, ಟಿ20ಯಲ್ಲಿ 18 ಜನರನ್ನು ಪೆವಿಲಿಯನ್ಗೆ ಕಳುಹಿಸಿದ್ದಾರೆ. ಹೀಗಾಗಿ ಕ್ರಿಕೆಟ್ನಲ್ಲಿ 1 ಸಾವಿರ ವಿಕೆಟ್ ಸಾಧನೆ ಮಾಡಿದ ಮೂರನೇ ಬೌಲರ್ ಎನಿಸಿಕೊಳ್ಳಲು ಇನ್ನೂ 13 ವಿಕೆಟ್ ಬೇಕಿದೆ. ಇದು ಕಷ್ಟವೇ ಆದರೂ, ಕೊನೆಯ ಅವಕಾಶವಿದೆ. ಶ್ರೀಲಂಕಾದ ಸ್ಪಿನ್ ಮಾಂತ್ರಿಕ ಮುತ್ತಯ್ಯ ಮುರಳೀಧರನ್ 1,347 ಅಂತಾರಾಷ್ಟ್ರೀಯ ವಿಕೆಟ್ ಪಡೆದು ಮೊದಲ ಸ್ಥಾನದಲ್ಲಿದ್ದರೆ, ಶೇನ್ ವಾರ್ನ್ 1001 ವಿಕೆಟ್ ಗಳಿಸಿ ನಂತರದ ಸ್ಥಾನದಲ್ಲಿದ್ದಾರೆ.
ಆ್ಯಂಡರ್ಸನ್ ತಮ್ಮ ಕೊನೆಯ ಪಂದ್ಯದಲ್ಲಿ 5 ವಿಕೆಟ್ ಗೊಂಚಲು ಪಡೆದರೆ, ವೃತ್ತಿಜೀವನದಲ್ಲಿ 35 ಬಾರಿ ಈ ಸಾಧನೆ ಮಾಡಿದ ವಿಶ್ವದ ಜಂಟಿ ಆರನೇ ಆಟಗಾರ ಎನಿಸಿಕೊಳ್ಳಲಿದ್ದಾರೆ. ಪಾಕಿಸ್ತಾನದ ಮಾಜಿ ವೇಗಿ ವಕಾರ್ ಯೂನಸ್ ಮತ್ತು ಶ್ರೀಲಂಕಾ ಸ್ಪಿನ್ನರ್ ರಂಗನಾ ಹೆರಾತ್ 35 ಬಾರಿ ಐದು ವಿಕೆಟ್‌ಗಳನ್ನು ಪಡೆದಿರುವ ಬೌಲರ್ಗಳಾಗಿದ್ದಾರೆ.
ಇದನ್ನೂ ಓದಿ:ಸೊನ್ನೆಗೆ ಔಟಾದಾಗ ನಕ್ಕಿದ್ದ ಯುವರಾಜ್ ಸಿಂಗ್: ಶತಕವೀರ ಅಭಿಷೇಕ್ ಶರ್ಮಾ ಹೀಗೆ ಹೇಳಿದ್ಯಾಕೆ? - ABHISHEK SHARMA
