ಭಾರತ, ಚೀನಾ ಮಧ್ಯೆ ಸಮತೋಲನವೇ ಶ್ರೀಲಂಕಾದ ಹೊಸ ಅಧ್ಯಕ್ಷರಿಗೆ ದೊಡ್ಡ ಸವಾಲು: ವಿಶ್ಲೇಷಣೆ - Sri Lanka Political Situation

ಭಾರತ ಮತ್ತು ಚೀನಾಗಳ ಮಧ್ಯೆ ಸಮತೋಲನ ಸಾಧಿಸುವುದೇ ಶ್ರೀಲಂಕಾದ ನೂತನ ಅಧ್ಯಕ್ಷ ದಿಸ್ಸಾನಾಯಕೆ ಅವರ ಮುಂದಿರುವ ಮುಖ್ಯ ಸವಾಲಾಗಿದೆ ಎಂದು ಯುಎಸ್​ನ ಮಾಜಿ ಭಾರತೀಯ ರಾಯಭಾರಿ ಮತ್ತು ವಿದೇಶಾಂಗ ವ್ಯವಹಾರಗಳ ತಜ್ಞ ಟಿ.ಪಿ. ಶ್ರೀನಿವಾಸನ್ ಅಭಿಪ್ರಾಯ ಪಟ್ಟಿದ್ದಾರೆ.

ಶ್ರೀಲಂಕಾದ ಹೊಸ ಅಧ್ಯಕ್ಷರಾಗಿ ಅನುರಾ ಕುಮಾರ ದಿಸ್ಸಾನಾಯಕೆ ಅವರ ಆಯ್ಕೆಯು ಅನೇಕರನ್ನು ಆಶ್ಚರ್ಯಗೊಳಿಸಿದೆ. ಇದು ದೇಶದ ರಾಜಕೀಯ ಭೂದೃಶ್ಯವನ್ನು ಮರುರೂಪಿಸುವಂಥ ಸಂದರ್ಭವಾಗಿದೆ. ಯುಎಸ್​ನ ಮಾಜಿ ಭಾರತೀಯ ರಾಯಭಾರಿ ಮತ್ತು ವಿದೇಶಾಂಗ ವ್ಯವಹಾರಗಳ ತಜ್ಞ ಟಿ.ಪಿ.ಶ್ರೀನಿವಾಸನ್ ಈ ಬಗ್ಗೆ ಈಟಿವಿ ಭಾರತ್​ಗೆ ನೀಡಿದ ವಿಶೇಷ ಸಂದರ್ಶನದಲ್ಲಿ ಮಾತನಾಡಿದ್ದು, ದಿಸ್ಸಾನಾಯಕೆ ಅವರ ಗೆಲುವು ಶ್ರೀಲಂಕಾದ ರಾಜಕೀಯದಲ್ಲಿ ಮಹತ್ವದ ಬದಲಾವಣೆಯನ್ನು ಸೂಚಿಸುತ್ತದೆ ಎಂದು ಅಭಿಪ್ರಾಯಪಟ್ಟಿದ್ದಾರೆ.

ಶ್ರೀಲಂಕಾದ ಆರ್ಥಿಕ ಬಿಕ್ಕಟ್ಟನ್ನು ಪರಿಹರಿಸಲು ಗಣನೀಯ ಪ್ರಯತ್ನಗಳನ್ನು ಮಾಡಿದ ಮಾಜಿ ಅಧ್ಯಕ್ಷ ರನಿಲ್ ವಿಕ್ರಮಸಿಂಘೆ ಅವರ ಅನಿರೀಕ್ಷಿತ ಸೋಲು ದೇಶದ ಭವಿಷ್ಯದ ಪಥದ ಬಗ್ಗೆ, ವಿಶೇಷವಾಗಿ ಪ್ರಮುಖ ಪ್ರಾದೇಶಿಕ ಶಕ್ತಿಗಳಾದ ಭಾರತ ಮತ್ತು ಚೀನಾದೊಂದಿಗಿನ ಸಂಬಂಧಗಳ ಬಗ್ಗೆ ಪ್ರಶ್ನೆಗಳನ್ನು ಹುಟ್ಟುಹಾಕುತ್ತದೆ.

ಎರಡು ಏಷ್ಯನ್​ ದೈತ್ಯಗಳ ನಡುವೆ ದೀರ್ಘಕಾಲದಿಂದ ಸಂಬಂಧ:ಶ್ರೀಲಂಕಾವು ಈ ಎರಡು ಏಷ್ಯಾದ ದೈತ್ಯ ದೇಶಗಳ ನಡುವಿನ ಸಂಬಂಧಗಳನ್ನು ದೀರ್ಘಕಾಲದಿಂದ ಸಮತೋಲನದಿಂದ ಕಾಪಾಡಿಕೊಂಡು ಬಂದಿದೆ. ಆದರೆ ಈಗ ದಿಸ್ಸಾನಾಯಕೆ ಅವರ ಆಯ್ಕೆಯಿಂದ ದೇಶವು ಈಗ ಯಾವ ದಿಕ್ಕಿನಲ್ಲಿ ವಾಲಲಿದೆ ಎಂಬ ಬಗ್ಗೆ ಅನಿಶ್ಚಿತತೆ ಉಂಟಾಗಿದೆ. ಐಎಂಎಫ್ ಬೇಲ್ ಔಟ್ ಪಡೆಯುವಲ್ಲಿ ಮತ್ತು ಚೀನಾದ ಸಾಲದಿಂದ ಉಂಟಾದ ಆರ್ಥಿಕ ಒತ್ತಡವನ್ನು ಸರಾಗಗೊಳಿಸಲು ಭಾರತದೊಂದಿಗೆ ಮಾತುಕತೆ ನಡೆಸುವಲ್ಲಿ ವಿಕ್ರಮಸಿಂಘೆ ಯಶಸ್ವಿಯಾಗಿದ್ದರೂ, ಅವರು ಚುನಾವಣೆಯಲ್ಲಿ ಮೂರನೇ ಸ್ಥಾನ ಪಡೆದರು. ಅವರ ಬದಲಾಗಿ, ಮತದಾರರು ಕಮ್ಯುನಿಸ್ಟ್ ಬೇರುಗಳನ್ನು ಹೊಂದಿರುವ ಎಡಪಂಥೀಯ ನಾಯಕ ದಿಸ್ಸಾನಾಯಕೆ ಅವರನ್ನು ಆಯ್ಕೆ ಮಾಡಿದ್ದಾರೆ. ಇದು ಜನರಲ್ಲಿ ಬದಲಾವಣೆಯ ಬಯಕೆಯನ್ನು ಸೂಚಿಸುತ್ತದೆ.

ಆರ್ಥಿಕತೆ ಸ್ಥಿರಗೊಳಿಸಲು ವಿಕ್ರಮಸಿಂಘೆ ಕೈಗೊಂಡ ಕ್ರಮ ಜನರಿಗೆ ಹಿಡಿಸಿಲ್ಲ:ಶ್ರೀನಿವಾಸನ್ ಅವರ ಪ್ರಕಾರ, ಆರ್ಥಿಕತೆಯನ್ನು ಸ್ಥಿರಗೊಳಿಸಲು ವಿಕ್ರಮಸಿಂಘೆ ಅವರ ಪ್ರಯತ್ನಗಳು ಸಾರ್ವಜನಿಕರೊಂದಿಗೆ ಅನುರಣಿಸಲಿಲ್ಲ ಎಂದು ಚುನಾವಣಾ ಫಲಿತಾಂಶವು ಎತ್ತಿ ತೋರಿಸುತ್ತದೆ. ಭಾರತ ಮತ್ತು ಪಶ್ಚಿಮದೊಂದಿಗಿನ ಅವರ ನಿಕಟ ಒಡನಾಟವು ಅವರಿಗೆ ಬೆಂಬಲ ಕಡಿಮೆಯಾಗಲು ಕಾರಣವಾಗಿರಬಹುದು. ವಿಶೇಷವಾಗಿ ಚೀನಾದ ವ್ಯಾಪಕ ಹೂಡಿಕೆಗಳು ಸಾಲದ ಹೊರೆಯನ್ನು ಸೃಷ್ಟಿಸಿದವು. ಇದು ದೇಶದ ಮೇಲೆ ತೀವ್ರ ಪರಿಣಾಮ ಬೀರಿತು. ಆದಾಗ್ಯೂ, ದಿಸ್ಸಾನಾಯಕೆ ಅವರ ಗೆಲುವು ಚೀನಾದತ್ತ ಆ ದೇಶವು ವಾಲುತ್ತದೆ ಎಂಬುದನ್ನು ಸೂಚಿಸುವುದಿಲ್ಲ. ಎಡಪಂಥೀಯ ಸಿದ್ಧಾಂತದ ಹೊರತಾಗಿಯೂ, ದಿಸ್ಸಾನಾಯಕೆ ಈಗಾಗಲೇ ವಿದೇಶಾಂಗ ಸಂಬಂಧಗಳಿಗೆ ಪ್ರಾಯೋಗಿಕ ವಿಧಾನವನ್ನು ಸೂಚಿಸಿದ್ದಾರೆ.

ತಮ್ಮ ಆರಂಭಿಕ ಹೇಳಿಕೆಗಳಲ್ಲಿ, ಭಾರತ ಮತ್ತು ಚೀನಾ ಎರಡರೊಂದಿಗಿನ ಶ್ರೀಲಂಕಾದ ಸಂಬಂಧಗಳನ್ನು ಮರುಪರಿಶೀಲಿಸಲಾಗುವುದು ಎಂದು ದಿಸ್ಸಾನಾಯಕೆ ಹೇಳಿದ್ದಾರೆ. ಅವರು ಚೀನಾವನ್ನು ಸಂಪೂರ್ಣವಾಗಿ ಅಪ್ಪಿಕೊಂಡಿಲ್ಲ ಅಥವಾ ಭಾರತದಿಂದ ದೂರವಾಗಿಲ್ಲ. ಶ್ರೀನಿವಾಸನ್ ಗಮನಿಸಿದಂತೆ, ದಿಸ್ಸಾನಾಯಕೆ ಅವರು ಶ್ರೀಲಂಕಾ ಎದುರಿಸುತ್ತಿರುವ ಸವಾಲುಗಳ ಅಗಾಧತೆಗೆ ಈಗಿನ್ನೂ ಹೊಂದಿಕೊಳ್ಳುತ್ತಿದ್ದಾರೆ. ಇಲ್ಲಿಯವರೆಗೆ ಅವರ ಎಚ್ಚರಿಕೆಯ ನಿಲುವು ಯಾವುದೇ ಮಹತ್ವದ ನೀತಿ ನಿರ್ಧಾರಗಳನ್ನು ತೆಗೆದುಕೊಳ್ಳುವ ಮೊದಲು ಅವರು ತಮ್ಮ ಆಯ್ಕೆಗಳನ್ನು ತೂಗುತ್ತಿದ್ದಾರೆ ಎಂಬುದನ್ನು ಸೂಚಿಸುತ್ತದೆ.

ಎಡಪಂಥೀಯರು ಎಂದಾಕ್ಷಣ ಈಗಲೇ ಚೀನಾ ಪರ ಒಲವು ತೋರುತ್ತಾರೆ ಎನ್ನಲಾಗಲ್ಲ:ದಿಸ್ಸಾನಾಯಕೆ ಅವರ ಎಡಪಂಥೀಯ ಒಲವುಗಳು ಚೀನಾದ ಕಡೆಗೆ ವಾಲುವುದನ್ನು ಸೂಚಿಸಬಹುದಾದರೂ, ಯಾವುದೇ ತೀರ್ಮಾನಗಳನ್ನು ತೆಗೆದುಕೊಳ್ಳಲು ಇದು ತುಂಬಾ ಅವಸರವಾಗುತ್ತದೆ ಎಂದು ಶ್ರೀನಿವಾಸನ್ ಒತ್ತಿ ಹೇಳಿದರು. ಹೊಸ ಅಧ್ಯಕ್ಷರು ಭಾರತ ಅಥವಾ ಚೀನಾದ ಮೇಲೆ ಸಂಪೂರ್ಣ ಅವಲಂಬನೆಯನ್ನು ತಪ್ಪಿಸುವ ಮೂಲಕ ಸಮತೋಲಿತ ವಿಧಾನವನ್ನು ಅಳವಡಿಸಿಕೊಂಡಿರುವಂತೆ ಕಾಣುತ್ತದೆ. ಶ್ರೀಲಂಕಾದ ಅನಿಶ್ಚಿತ ಆರ್ಥಿಕ ಪರಿಸ್ಥಿತಿಯನ್ನು ಗಮನದಲ್ಲಿಟ್ಟುಕೊಂಡು, ಈ ವಿಧಾನವು ದೇಶವು ತನ್ನ ವಿದೇಶಾಂಗ ನೀತಿ ನಿರ್ಧಾರಗಳಲ್ಲಿ ಸಾರ್ವಭೌಮತ್ವವನ್ನು ಕಾಪಾಡಿಕೊಳ್ಳುವಾಗ ಅಂತಾರಾಷ್ಟ್ರೀಯ ಬೆಂಬಲವನ್ನು ಹೆಚ್ಚಿಸಿಕೊಳ್ಳಲು ಅನುವು ಮಾಡಿಕೊಡುತ್ತದೆ.

ಶ್ರೀಲಂಕಾದ ಪಾಲಿಗೆ ಭಾರತದ ಪಾತ್ರ ಇನ್ನೂ ಪ್ರಮುಖವಾಗಿದೆ. ಪ್ರಧಾನಿ ನರೇಂದ್ರ ಮೋದಿ ಅವರು ಈಗಾಗಲೇ ಹೊಸ ಸರ್ಕಾರಕ್ಕೆ ಕೊಡುಗೆಯನ್ನು ವಿಸ್ತರಿಸಿದ್ದು, ಪ್ರಾದೇಶಿಕ ಸ್ಥಿರತೆಗೆ ಭಾರತದ ಬದ್ಧತೆ ಸಂಕೇತಿಸಿದ್ದಾರೆ. ಶ್ರೀಲಂಕಾದಲ್ಲಿ, ವಿಶೇಷವಾಗಿ ಹಿಂದೂ ಮಹಾಸಾಗರ ಪ್ರದೇಶದಲ್ಲಿ ಭಾರತದ ಕಾರ್ಯತಂತ್ರದ ಹಿತಾಸಕ್ತಿಗಳು ಪ್ರಮುಖವಾಗಿವೆ ಮತ್ತು ಚೀನಾದ ಕಡೆಗೆ ಯಾವುದೇ ಬದಲಾವಣೆಯನ್ನು ನವದೆಹಲಿ ನಿಕಟವಾಗಿ ಮೇಲ್ವಿಚಾರಣೆ ಮಾಡುತ್ತದೆ. ಆದಾಗ್ಯೂ, ಶ್ರೀನಿವಾಸನ್ ಸೂಚಿಸಿದಂತೆ, ದಿಸ್ಸಾನಾಯಕೆ ಅವರ ಆರಂಭಿಕ ಸಂಕೇತಗಳು ಅವರು ಭಾರತದೊಂದಿಗೆ ಬಲವಾದ ಸಂಬಂಧವನ್ನು ಗೌರವಿಸುತ್ತಾರೆ ಎಂಬುದನ್ನೇ ಸೂಚಿಸುತ್ತದೆ.

ಚೀನಾದ ಗಮನಾರ್ಹ ಆರ್ಥಿಕ ಉಪಸ್ಥಿತಿ ಕಡಿಮೆ ಮಾಡಬೇಕಿದೆ:ಅದೇ ಸಮಯದಲ್ಲಿ, ದಿಸ್ಸಾನಾಯಕೆ ಶ್ರೀಲಂಕಾದಲ್ಲಿ ಚೀನಾದ ಗಮನಾರ್ಹ ಆರ್ಥಿಕ ಉಪಸ್ಥಿತಿಯನ್ನು ಕಡಿಮೆ ಮಾಡಬೇಕಿದೆ. ಚೀನಾದ ಹೂಡಿಕೆಗಳು, ವಿಶೇಷವಾಗಿ ಮೂಲಸೌಕರ್ಯ ಯೋಜನೆಗಳಲ್ಲಿ, ಮಿಶ್ರ ಪರಿಣಾಮವನ್ನು ಬೀರಿವೆ. ಇವು ದೇಶಕ್ಕೆ ಅಭಿವೃದ್ಧಿಯನ್ನು ತರುವುದು ಹೌದಾದರೂ ದೇಶದ ಸಾಲದ ಹೊರೆಯನ್ನು ಕೂಡ ಹೆಚ್ಚಿಸುತ್ತವೆ. ಶ್ರೀಲಂಕಾದ ಆರ್ಥಿಕ ಬಿಕ್ಕಟ್ಟನ್ನು ಇನ್ನಷ್ಟು ಹದಗೆಡಿಸದೇ ಈ ಒಪ್ಪಂದಗಳನ್ನು ಮರು ಮಾತುಕತೆ ನಡೆಸುವುದು, ಏಕಕಾಲದಲ್ಲಿ ಭಾರತದ ಹೂಡಿಕೆಗಳನ್ನು ರಕ್ಷಿಸುವುದು ದಿಸ್ಸಾನಾಯಕೆ ಅವರ ದೊಡ್ಡ ಸವಾಲುಗಳಲ್ಲಿ ಒಂದಾಗಿದೆ ಎಂದು ಶ್ರೀನಿವಾಸನ್ ಒತ್ತಿ ಹೇಳಿದರು.

ಈ ಸ್ಪರ್ಧಾತ್ಮಕ ಹಿತಾಸಕ್ತಿಗಳನ್ನು ಮುನ್ನಡೆಸುವ ದಿಸ್ಸಾನಾಯಕೆ ಅವರ ಸಾಮರ್ಥ್ಯವು ಮುಂಬರುವ ಸಂಸದೀಯ ಚುನಾವಣೆಯ ಫಲಿತಾಂಶವನ್ನು ಹೆಚ್ಚಾಗಿ ಅವಲಂಬಿಸಿರುತ್ತದೆ ಎಂದು ಶ್ರೀನಿವಾಸನ್ ಹೇಳಿದರು. ಸಂಸತ್ತಿನ ಬಹುಮತವಿಲ್ಲದೇ, ದಿಸ್ಸಾನಾಯಕೆ ಅರ್ಥಪೂರ್ಣ ಸುಧಾರಣೆಗಳನ್ನು ಜಾರಿಗೆ ತರುವಲ್ಲಿ ವಿಘ್ನಗಳನ್ನು ಎದುರಿಸಬಹುದು.

ಅಂತಿಮವಾಗಿ, ದಿಸ್ಸಾನಾಯಕೆ ಸೂಕ್ಷ್ಮ ಸಮತೋಲನ ಕ್ರಿಯೆಯನ್ನು ನಿರ್ವಹಿಸಬೇಕಾಗಿದೆ ಎಂದು ಶ್ರೀನಿವಾಸನ್ ಪ್ರತಿಪಾದಿಸುತ್ತಾರೆ. ಅವರ ಎಡಪಂಥೀಯ ಹಿನ್ನೆಲೆಯು ಚೀನಾದೊಂದಿಗಿನ ಅವರ ಸಂಭಾವ್ಯ ಹೊಂದಾಣಿಕೆಯ ಬಗ್ಗೆ ಪ್ರಶ್ನೆಗಳನ್ನು ಹುಟ್ಟುಹಾಕಿದರೆ, ಶ್ರೀಲಂಕಾದ ಪರಿಸ್ಥಿತಿಯ ಭೌಗೋಳಿಕ ರಾಜಕೀಯ ವಾಸ್ತವಗಳು ಹೆಚ್ಚು ಸೂಕ್ಷ್ಮವಾದ ವಿಧಾನವನ್ನು ಬಯಸುತ್ತವೆ. ಹೊಸ ಅಧ್ಯಕ್ಷರು ಭಾರತ ಮತ್ತು ಚೀನಾ ಎರಡರೊಂದಿಗೂ ಮಾತುಕತೆ ಮುಂದುವರಿಸುವ ಸಾಧ್ಯತೆಯಿದೆ. ಜೊತೆಗೆ ಶ್ರೀಲಂಕಾದ ಆರ್ಥಿಕ ಚೇತರಿಕೆ ಮತ್ತು ರಾಜಕೀಯ ಸ್ಥಿರತೆಯನ್ನು ಭದ್ರಪಡಿಸಲು ಎಚ್ಚರಿಕೆಯಿಂದ ಮಾತುಕತೆ ನಡೆಸುವ ಸಾಧ್ಯತೆಯಿದೆ. ಜಗತ್ತು, ವಿಶೇಷವಾಗಿ ಭಾರತದತ್ತ ಗಮನಿಸುತ್ತಿರುವಾಗ ದಿಸ್ಸಾನಾಯಕೆ ಅವರ ಮುಂದಿನ ನಡೆಗಳು ಶ್ರೀಲಂಕಾದ ಭವಿಷ್ಯದ ದಿಕ್ಕನ್ನು ನಿರ್ಧರಿಸುವಲ್ಲಿ ನಿರ್ಣಾಯಕವಾಗಿವೆ.

ಲೇಖನ: ಟಿ.ಪಿ. ಶ್ರೀನಿವಾಸನ್,ಯುಎಸ್​ನ ಮಾಜಿ ಭಾರತೀಯ ರಾಯಭಾರಿ ಮತ್ತು ವಿದೇಶಾಂಗ ವ್ಯವಹಾರಗಳ ತಜ್ಞ

ಇದನ್ನೂ ಓದಿ : 'ನಮ್ಮ ದೇಶಕ್ಕೆ ಭಿಕ್ಷುಕರನ್ನು ಕಳುಹಿಸಬೇಡಿ': ಪಾಕಿಸ್ತಾನಕ್ಕೆ ಸೌದಿ ಅರೇಬಿಯಾ ಎಚ್ಚರಿಕೆ - Pakistan sending beggars