ಇಸ್ರೇಲ್, ಹಮಾಸ್ ಶಾಂತಿ ಮಾತುಕತೆ ಮುಂದಿನ ವಾರ ಪುನಾರಂಭ ಸಾಧ್ಯತೆ

ಇಸ್ರೇಲ್ ಮತ್ತು ಹಮಾಸ್ ನಡುವಿನ ಕದನ ವಿರಾಮಕ್ಕಾಗಿ ಮುಂದಿನ ವಾರ ಮಾತುಕತೆಗಳು ನಡೆಯಲಿವೆ ಎಂದು ವರದಿ ತಿಳಿಸಿವೆ.

ಟೆಲ್ ಅವೀವ್:ಒತ್ತೆಯಾಳುಗಳ ವಿನಿಮಯ ಮತ್ತು ಗಾಜಾದಲ್ಲಿ ಕದನ ವಿರಾಮಕ್ಕಾಗಿ ಹಮಾಸ್ ಮತ್ತು ಇಸ್ರೇಲ್ ನಡುವಿನ ಮಾತುಕತೆ ಈ ವಾರ ಕೈರೋದಲ್ಲಿ ಪುನರಾರಂಭಗೊಳ್ಳಲಿದೆ. ಅಮೆರಿಕದ ಮಧ್ಯಪ್ರಾಚ್ಯ ರಾಯಭಾರಿ ಬ್ರೆಟ್ ಮೆಕ್ಗುರ್ಕ್ ಗಾಝಾದಲ್ಲಿರುವ ಒತ್ತೆಯಾಳುಗಳ ಬಿಡುಗಡೆಯ ಮಾತುಕತೆಯ ನೇತೃತ್ವ ವಹಿಸಲಿದ್ದಾರೆ.

ರಾಯಭಾರಿ ಬ್ರೆಟ್ ಮೆಕ್ಗುರ್ಕ್ ಈಗಾಗಲೇ ಇಸ್ರೇಲ್​ಗೆ ಮಧ್ಯಸ್ಥಿಕೆ ಯೋಜನೆಗಳನ್ನು ತಲುಪಿಸಿದ್ದಾರೆ ಮತ್ತು ಅದನ್ನು ಕತಾರ್ ಮೂಲಕ ಹಮಾಸ್ ನಾಯಕತ್ವಕ್ಕೆ ತಿಳಿಸಿದ್ದಾರೆ ಎಂದು ಮೂಲಗಳು ತಿಳಿಸಿವೆ. ಈ ಹಿಂದೆ, ನವೆಂಬರ್ 24 ರಿಂದ ಡಿಸೆಂಬರ್ 1 ರವರೆಗೆ ಒಂದು ವಾರದ ಕದನ ವಿರಾಮ ಘೋಷಿಸಲಾಗಿತ್ತು. ಆ ಸಂದರ್ಭದಲ್ಲಿ ಎರಡೂ ಪಕ್ಷಗಳು ಕೈದಿಗಳನ್ನು ವಿನಿಮಯ ಮಾಡಿಕೊಂಡಿದ್ದರು.

ಪ್ಯಾಲೆಸ್ಟೈನ್ ಗೆ ಪೂರ್ಣ ದೇಶದ ಸ್ಥಾನಮಾನದೊಂದಿಗೆ ಎರಡು ರಾಷ್ಟ್ರಗಳ ಸಿದ್ಧಾಂತವನ್ನು ಒಪ್ಪುವಂತೆ ಯುಎಸ್ ಅಧ್ಯಕ್ಷರು ಇಸ್ರೇಲ್ ನಾಯಕತ್ವಕ್ಕೆ ಸೂಚಿಸಿದ್ದಾರೆ ಎಂದು ವರದಿಗಳು ತಿಳಿಸಿವೆ. ಆದರೆ ಹೆಚ್ಚುತ್ತಿರುವ ಯುಎಸ್ ಒತ್ತಡದ ಹೊರತಾಗಿಯೂ ಇಸ್ರೇಲ್ ಇದಕ್ಕೆ ಒಪ್ಪಿಲ್ಲ. ಕಳೆದ ವರ್ಷ ಅಕ್ಟೋಬರ್ 7 ರಂದು ಹಮಾಸ್ ಇಸ್ರೇಲ್​ನ ದಕ್ಷಿಣ ಭಾಗಗಳ ಮೇಲೆ ದಾಳಿ ನಡೆಸಿ ಕನಿಷ್ಠ 1200 ಜನರನ್ನು ಕೊಂದು, 200 ಕ್ಕೂ ಹೆಚ್ಚು ಜನರನ್ನು ಒತ್ತೆಯಾಳುಗಳಾಗಿ ತೆಗೆದುಕೊಂಡಿತ್ತು. ಸುಮಾರು 105 ಒತ್ತೆಯಾಳುಗಳನ್ನು ಹಮಾಸ್ ಈಗಾಗಲೇ ಬಿಡುಗಡೆ ಮಾಡಿದೆ.

ಗಾಜಾ ಪಟ್ಟಿಯಲ್ಲಿನ ಜನರ ಆರೋಗ್ಯ ದುರಂತ ಮತ್ತು ನೋವಿನಿಂದ ಕೂಡಿದೆ ಎಂದು ಗಾಜಾ ಮೂಲದ ಆರೋಗ್ಯ ಸಚಿವಾಲಯ ಹೇಳಿದೆ. "ಇಸ್ರೇಲ್ ಸೇನೆ ಉದ್ದೇಶಪೂರ್ವಕವಾಗಿ ಆರೋಗ್ಯ ವ್ಯವಸ್ಥೆಯನ್ನು ನಾಶಪಡಿಸುತ್ತಿದೆ" ಎಂದು ಸಚಿವಾಲಯದ ವಕ್ತಾರ ಅಶ್ರಫ್ ಅಲ್-ಖೈದಾ ಭಾನುವಾರ ಪತ್ರಿಕಾ ಹೇಳಿಕೆಯಲ್ಲಿ ತಿಳಿಸಿದ್ದಾರೆ.

ಗಾಜಾ ಪಟ್ಟಿಗೆ ಬಂದಿರುವ ಶೇಕಡಾ 70 ರಷ್ಟು ವೈದ್ಯಕೀಯ ನೆರವು ಸ್ಥಳೀಯ ಆಸ್ಪತ್ರೆಗಳ ಮೂಲಭೂತ ಅಗತ್ಯಗಳ ವ್ಯಾಪ್ತಿಯಿಂದ ಹೊರಗಿದೆ ಮತ್ತು 99 ವೈದ್ಯಕೀಯ ಸಿಬ್ಬಂದಿ ಇನ್ನೂ ಇಸ್ರೇಲಿ ಪಡೆಗಳ ಬಂಧನದಲ್ಲಿದ್ದಾರೆ ಎಂದು ವಕ್ತಾರರು ಹೇಳಿದರು. 2023 ರ ಅಕ್ಟೋಬರ್ 7 ರಿಂದ ನಡೆಯುತ್ತಿರುವ ಸಂಘರ್ಷದಿಂದಾಗಿ ಪ್ಯಾಲೆಸ್ಟೈನ್​ನಲ್ಲಿ ಸಾವಿನ ಸಂಖ್ಯೆ 25,105 ಕ್ಕೆ ಏರಿದೆ ಎಂದು ಸಚಿವಾಲಯ ಭಾನುವಾರ ತಿಳಿಸಿದೆ. ಏತನ್ಮಧ್ಯೆ, ಗಾಜಾ ಪಟ್ಟಿಯ ಬಹುತೇಕ ಭಾಗಗಳಲ್ಲಿ ಪ್ಯಾಲೆಸ್ಟೈನ್ ಉಗ್ರರು ಮತ್ತು ಇಸ್ರೇಲಿ ಸೈನ್ಯದ ನಡುವೆ ಹಿಂಸಾತ್ಮಕ ಘರ್ಷಣೆಗಳು ಮುಂದುವರೆದಿವೆ.

ಇದನ್ನೂ ಓದಿ: ಭಾರಿ ಪ್ರವಾಹ: ಉತ್ತರ ಆಸ್ಟ್ರೇಲಿಯಾದಲ್ಲಿ ತುರ್ತು ಪರಿಸ್ಥಿತಿ ಘೋಷಣೆ