ಮೆಕ್ಸಿಕೊ ಕೊಲ್ಲಿಯಲ್ಲಿ ಸೇತುವೆಗೆ ಬಾರ್ಜ್ ಡಿಕ್ಕಿ: ಸಮುದ್ರ ಸೇರಿದ 2 ಸಾವಿರ ಗ್ಯಾಲನ್ ತೈಲ - Barge Hits Bridge

ಮೆಕ್ಸಿಕೊ ಕೊಲ್ಲಿಯ ಸೇತುವೆಯೊಂದಕ್ಕೆ ಬಾರ್ಜ್ ಡಿಕ್ಕಿ ಹೊಡೆದಿದ್ದರಿಂದ 2 ಸಾವಿರ ಗ್ಯಾಲನ್ ತೈಲ ಸಮುದ್ರಕ್ಕೆ ಸೇರಿದೆ.

ಹ್ಯೂಸ್ಟನ್: ಪೂರ್ವ ಟೆಕ್ಸಾಸ್​ನ ಗಾಲ್ವೆಸ್ಟನ್ ದ್ವೀಪ ನಗರದ ಸೇತುವೆಗೆ ಬಂಕರ್ ಬಾರ್ಜ್ (Bunker Barge) ಡಿಕ್ಕಿ ಹೊಡೆದು ಸುಮಾರು 2,000 ಗ್ಯಾಲನ್ ತೈಲ ಮೆಕ್ಸಿಕೊ ಕೊಲ್ಲಿಗೆ ಹರಿದಿರಬಹುದು ಎಂದು ಯುಎಸ್ ಕೋಸ್ಟ್ ಗಾರ್ಡ್ ಅಂದಾಜಿಸಿದೆ. ಅಪಘಾತದ ನಂತರ ಬಾರ್ಜ್​ನಿಂದ ತೈಲ ಸೋರಿಕೆಯನ್ನು ನಿಯಂತ್ರಿಸಲಾಗಿದೆ ಎಂದು ಯುಎಸ್ ಕೋಸ್ಟ್ ಗಾರ್ಡ್ ವರದಿ ಮಾಡಿದೆ.

ಗಲ್ಫ್ ಇಂಟ್ರಾಕೋಸ್ಟಲ್ ಜಲಮಾರ್ಗದ (Gulf Intracoastal Waterway) ಉದ್ದಕ್ಕೂ ಸುಮಾರು 6.5 ಮೈಲಿ (10.5 ಕಿ.ಮೀ) ಪ್ರದೇಶವನ್ನು ಪ್ರಯಾಣಕ್ಕೆ ಮುಚ್ಚಲಾಗಿದ್ದು, ತೈಲ ಸೋರಿಕೆಯ ವ್ಯಾಪ್ತಿಯನ್ನು ಪರಿಶೀಲನೆ ಮಾಡಲು ವಿಮಾನಗಳು ಮತ್ತು ಡ್ರೋನ್​ಗಳನ್ನು ನಿಯೋಜಿಸಲಾಗಿದೆ ಎಂದು ಕೋಸ್ಟ್ ಗಾರ್ಡ್ ತಿಳಿಸಿದೆ. ಗಾಲ್ವೆಸ್ಟನ್ ಟೆಕ್ಸಾಸ್​ನ ಅತಿದೊಡ್ಡ ನಗರವಾದ ಹೂಸ್ಟನ್ ಡೌನ್​ಟೌನ್​ನಿಂದ ಸುಮಾರು 50 ಮೈಲಿ (80.5 ಕಿ.ಮೀ) ದೂರದಲ್ಲಿದೆ.

"ನಾವು ಆರಂಭದಲ್ಲಿ ಅಂದಾಜಿಸಿದ್ದಕ್ಕಿಂತ ಕಡಿಮೆ ತೈಲ ನೀರಿಗೆ ಹರಿದಿದೆ ಎಂಬ ವಿಶ್ವಾಸ ನಮ್ಮದಾಗಿದೆ" ಎಂದು ಕೋಸ್ಟ್ ಗಾರ್ಡ್ ಕ್ಯಾಪ್ಟನ್ ಕೀತ್ ಡೊನೊಹ್ಯೂ ಪತ್ರಿಕಾಗೋಷ್ಠಿಯಲ್ಲಿ ಹೇಳಿದರು. "ನಾವು ಈ ಪ್ರದೇಶದಿಂದ 605 ಗ್ಯಾಲನ್ ಎಣ್ಣೆಯುಕ್ತ ನೀರಿನ ಮಿಶ್ರಣವನ್ನು ಹೊರತೆಗೆದಿದ್ದೇವೆ ಮತ್ತು ಸೋರಿಕೆಯಾಗದ ಬಾರ್ಜ್​ನ ಮೇಲ್ಭಾಗದಲ್ಲಿದ್ದ 5,640 ಗ್ಯಾಲನ್ ತೈಲವನ್ನು ಸುರಕ್ಷಿತವಾಗಿ ಹೊರತೆಗೆದಿದ್ದೇವೆ" ಎಂದು ಡೊನೊಹ್ಯೂ ಹೇಳಿದರು.

ಈ ಬಾರ್ಜ್​ ಬುಧವಾರ ಪೆಲಿಕನ್ ಐಲ್ಯಾಂಡ್ ಕಾಸ್ವೇ ಸೇತುವೆಯ ಕಂಬಕ್ಕೆ ಡಿಕ್ಕಿ ಹೊಡೆದಿದೆ ಎಂದು ಬಾರ್ಜ್ ಆಪರೇಟರ್ ಕಂಪನಿಯಾಗಿರುವ ಮಾರ್ಟಿನ್ ಮರೀನ್​​ನ ಉಪಾಧ್ಯಕ್ಷ ರಿಕ್ ಫ್ರೀಡ್ ಪತ್ರಿಕಾಗೋಷ್ಠಿಯಲ್ಲಿ ತಿಳಿಸಿದ್ದಾರೆ.

30,000 ಬ್ಯಾರೆಲ್ ತೈಲವನ್ನು ಹಿಡಿದಿಡುವ ಸಾಮರ್ಥ್ಯವನ್ನು ಹೊಂದಿರುವ 321 ಅಡಿ ಉದ್ದದ ಬಾರ್ಜ್ 23,000 ಬ್ಯಾರೆಲ್​ಗಳನ್ನು ಹೊತ್ತೊಯ್ಯುತ್ತಿತ್ತು. ಈ ಬ್ಯಾರೆಲ್​ಗಳಲ್ಲಿ ಸುಮಾರು 9,66,000 ಗ್ಯಾಲನ್​ಗಳಷ್ಟು ತೈಲವಿತ್ತು. ಬಾರ್ಜ್​ನಲ್ಲಿದ್ದ ಅಷ್ಟೂ ತೈಲ ಸಮುದ್ರ ಸೇರಿದ್ದರೆ ಊಹಿಸಲಾಗದಷ್ಟು ಮಾಲಿನ್ಯವಾಗುವ ಸಾಧ್ಯತೆಯಿತ್ತು.

ಅಪಘಾತದಿಂದಾಗಿ ಸೇತುವೆ ಭಾಗಶಃ ಕುಸಿದು ಬಿದ್ದಿದೆ. ಇದರಿಂದಾಗಿ ಗಾಲ್ವೆಸ್ಟನ್ ನಿಂದ ಪೆಲಿಕಾನ್ ದ್ವೀಪಕ್ಕೆ ಸಂಪರ್ಕಿಸುವ ಏಕೈಕ ಮಾರ್ಗವನ್ನು ಕೂಡ ಮುಚ್ಚಬೇಕಾಯಿತು. ಘಟನೆಯಲ್ಲಿ ಯಾವುದೇ ಪ್ರಾಣಹಾನಿ ಸಂಭವಿಸಿಲ್ಲ. ಮಾರ್ಚ್ 26 ರಂದು ಬಾಲ್ಟಿಮೋರ್​ನ ಫ್ರಾನ್ಸಿಸ್ ಕೀ ಸೇತುವೆಯ ಸ್ತಂಭಕ್ಕೆ ಸರಕು ಹಡಗು ಡಿಕ್ಕಿ ಹೊಡೆದು ಆರು ಜನರು ಸಾವನ್ನಪ್ಪಿದ ಘಟನೆಯ ನೆನಪು ಮಾಸುವ ಮುನ್ನವೇ ಅಂಥ ಮತ್ತೊಂದು ಘಟನೆ ನಡೆದಂತಾಗಿದೆ.

ಇದನ್ನೂ ಓದಿ : 'ಯುದ್ಧದ ನಂತರ ಪ್ಯಾಲೆಸ್ಟೈನ್​ನಲ್ಲಿ ಇಸ್ರೇಲ್ ಆಡಳಿತ ಬೇಡ': ರಕ್ಷಣಾ ಸಚಿವ ಗ್ಯಾಲಂಟ್​ - Israel Rule In Gaza