ಢಾಕಾ : ಬಾಂಗ್ಲಾದೇಶದ ಬೀದಿಗಳಲ್ಲಿ ನಿಯೋಜಿಸಲಾಗಿರುವ ಸಶಸ್ತ್ರ ಪಡೆಗಳನ್ನು ಹಿಂತೆಗೆದುಕೊಳ್ಳುವಂತೆ ಮತ್ತು ಅವರನ್ನು ಬ್ಯಾರಕ್ಗಳಿಗೆ ವಾಪಸ್ ಕಳುಹಿಸುವಂತೆ ಬಾಂಗ್ಲಾದೇಶದ ಮಾಜಿ ಹಿರಿಯ ಮಿಲಿಟರಿ ಜನರಲ್ಗಳ ಗುಂಪು ರವಿವಾರ ಸರಕಾರವನ್ನು ಆಗ್ರಹಿಸಿದೆ. ಸರಕಾರಿ ಉದ್ಯೋಗಗಳಲ್ಲಿನ ಮೀಸಲಾತಿ ವ್ಯವಸ್ಥೆಯನ್ನು ವಿರೋಧಿಸಿ ದೇಶಾದ್ಯಂತ ಹಿಂಸಾಚಾರಗಳು ಮರುಕಳಿಸುತ್ತಿರುವ ನಡುವೆಯೇ ಈ ಒತ್ತಾಯ ಕೇಳಿ ಬಂದಿರುವುದು ಗಮನಾರ್ಹ.
"ರಾಜಕೀಯ ಕ್ರಮಗಳ ಮೂಲಕ ಪ್ರಸ್ತುತ ಬಿಕ್ಕಟ್ಟನ್ನು ಪರಿಹರಿಸಲು ಪ್ರಯತ್ನಿಸುವಂತೆ ನಾವು ಸರ್ಕಾರವನ್ನು ಒತ್ತಾಯಿಸುತ್ತೇವೆ. ನಮ್ಮ ಸಶಸ್ತ್ರ ಪಡೆಗಳನ್ನು ಇಂಥ ಅವಮಾನಕರ ಅಭಿಯಾನದಲ್ಲಿ ತೊಡಗಿಸುವ ಮೂಲಕ ಅವರ ಗೌರವಯುತ ಸ್ಥಾನಮಾನವನ್ನು ನಾಶಪಡಿಸಬೇಡಿ" ಎಂದು ಮಾಜಿ ಸೇನಾ ಮುಖ್ಯಸ್ಥ ಇಕ್ಬಾಲ್ ಕರೀಮ್ ಭುಯಿಯಾನ್ ಹೇಳಿದ್ದಾರೆ.
ಮಾಧ್ಯಮಗೋಷ್ಠಿಯಲ್ಲಿ ಹೇಳಿಕೆಯನ್ನು ಓದಿದ ಅವರು, "ಬಾಂಗ್ಲಾದೇಶದ ಸಶಸ್ತ್ರ ಪಡೆಗಳು ಎಂದಿಗೂ ಜನಸಾಮಾನ್ಯರೊಂದಿಗೆ ಸಂಘರ್ಷಕ್ಕೆ ಇಳಿದಿಲ್ಲ ಅಥವಾ ತಮ್ಮದೇ ನಾಗರಿಕರ ಎದೆಗೆ ಬಂದೂಕುಗಳನ್ನು ಗುರಿ ಮಾಡುವಂಥ ತರಬೇತಿಯನ್ನೂ ಅವು ಪಡೆದಿಲ್ಲ" ಎಂದು ಹೇಳಿದರು.
ಹಾಲಿ ಪ್ರಧಾನಿ ಶೇಖ್ ಹಸೀನಾ ಅವರ ಸರ್ಕಾರದಲ್ಲಿ ಸೇನಾ ಮುಖ್ಯಸ್ಥರಾಗಿ ಸೇವೆ ಸಲ್ಲಿಸಿದ್ದ ಭುಯಿಯಾನ್, ಢಾಕಾ ಕಂಟೋನ್ಮೆಂಟ್ ಪಕ್ಕದ ನಿವೃತ್ತ ಅಧಿಕಾರಿಗಳ ರಾವ್ವಾ ಕ್ಲಬ್ನಲ್ಲಿ ಹತ್ತಕ್ಕೂ ಹೆಚ್ಚು ಮಾಜಿ ಹಿರಿಯ ಮತ್ತು ಮಧ್ಯಮ ಶ್ರೇಣಿಯ ಮಿಲಿಟರಿ ಅಧಿಕಾರಿಗಳ ಸಮ್ಮುಖದಲ್ಲಿ ಹೇಳಿಕೆಯನ್ನು ಓದಿದರು.