ಮೈಗ್ರೇನ್​​ಗೆ ಕಾರಣವಾಗುವ​ ಪ್ರಚೋದನಾ ಅಂಶಗಳನ್ನು ಪತ್ತೆ ಮಾಡಿದ ಸಂಶೋಧಕರು

ಮೈಗ್ರೇನ್​ ಸಮಸ್ಯೆಗೆ ನಿಖರ ಚಿಕಿತ್ಸೆ ಲಭ್ಯವಿಲ್ಲ. ಆದ್ರೆ ಕಳಪೆ ನಿದ್ರೆ ಮತ್ತು ಒತ್ತಡದ ದೈಹಿಕ ಚಟುವಟಿಕೆ ಇದಕ್ಕೆ ಕಾರಣ ಎಂಬ ಅಂಶಗಳನ್ನು ಸಂಶೋಧಕರು ಪತ್ತೆ ಮಾಡಿದ್ದಾರೆ.

ಹೈದರಾಬಾದ್​​: ಪ್ರತಿವರ್ಷ ಜಾಗತಿಕವಾಗಿ 1 ಬಿಲಿಯನ್​ಗೂ ಹೆಚ್ಚು ಮಂದಿ ಮೈಗ್ರೇನ್​ ತಲೆನೋವಿನಿಂದ ಬಾಧಿತರಾಗುತ್ತಿದ್ದಾರೆ. ಅತಿ ಹೆಚ್ಚಿನ ಪ್ರಸರಣವನ್ನು ಇದು ಹೊಂದಿದ್ದರೂ, ಈ ಸಮಸ್ಯೆಗೆ ನಿಖರ ಕಾರಣ ಪತ್ತೆಯಾಗಿಲ್ಲ. ಅಲ್ಲದೇ ಇದಕ್ಕೆ ನಿಖರ ಚಿಕಿತ್ಸೆಯೂ ಇಲ್ಲ. ಆದಾಗ್ಯೂ, ಈ ಮೈಗ್ರೇನ್​ ಸಮಸ್ಯೆ ಉಂಟುಮಾಡುವ ಅಂಶಗಳನ್ನು ಊಹೆ ಮಾಡಬಹುದಾಗಿದೆ. ಇದರಿಂದ ಅದರ ಚಿಕಿತ್ಸೆಗೆ ಸಹಾಯ ಆಗಲಿದೆ ಎಂದು ಸಂಶೋಧನೆ ತಿಳಿಸಿದೆ.

ಮೈಗ್ರೇನ್​ ದಾಳಿಯನ್ನು ನಿದ್ರೆ, ಶಕ್ತಿ, ಭಾವನೆ ಮತ್ತು ಒತ್ತಡಗಳಂತಹ ಪ್ರಚೋದನಾ ಅಂಶದ ಮೂಲಕ ಅದನ್ನು ಊಹೆ ಮಾಡಬಹುದಾಗಿದೆ ಎಂದು ಅಮೆರಿಕದ ನ್ಯಾಷನಲ್​ ಇನ್ಸಿಟಿಟ್ಯೂಟ್​​ ಆಫ್​ ಮೆಂಟಲ್​ ಹೆಲ್ತ್​​ ಸಂಶೋಧಕರು ತಿಳಿಸಿದ್ದಾರೆ.

ಕಳಪೆ ಮತ್ತು ಕಡಿಮೆ ನಿದ್ರೆಯ ಗುಣಮಟ್ಟವೂ ಮರುದಿನ ಶೇ 22ರಿಂದ ಶೇ 18ರಷ್ಟು ಮೈಗ್ರೇನ್​ ಅಪಾಯವನ್ನು ಹೆಚ್ಚಿಸುತ್ತದೆ. ಅದೇ ರೀತಿ ಕಡಿಮೆ ಶಕ್ತಿ ಮಟ್ಟವೂ ಕೂಡ ಶೇ 17ರಷ್ಟು ಮೈಗ್ರೇನ್​ ತಲೆನೋವಿಗೆ ಕಾರಣವಾಗುತ್ತದೆ ಎಂದು ಅಧ್ಯಯನ ತಿಳಿಸಿದೆ. ಅಷ್ಟೇ ಅಲ್ಲದೇ, ಒತ್ತಡ, ಮತ್ತು ಗಣನೀಯ ಹೆಚ್ಚಿನ ಶಕ್ತಿ ಕೂಡ ಶೇ 17ರಷ್ಟು ಮೈಗ್ರೇನ್​ ತಲೆನೋವಿಗೆ ಕಾರಣವಾಗಬಹುದು ಎಂದಿದ್ದಾರೆ.

477 ಮಂದಿಯನ್ನು ಈ ಅಧ್ಯಯನಕ್ಕೆ ಒಳಪಡಿಸಲಾಗಿದ್ದು, ಅವರ ಮನಸ್ಥಿತಿ (ಮೂಡ್​​), ಶಕ್ತಿ, ಒತ್ತಡ, ಅತಿ ಹೆಚ್ಚಿನ ಮೊಬೈಲ್​ ಬಳಕೆ ಕುರಿತಾದ ಪ್ರಶ್ನೆಗಳನ್ನು ಕೇಳಿದ್ದಾರೆ. ಈ ವೇಳೆ ಭಾಗಿದಾರರು ತಮ್ಮ ಕಳಪೆ ನಿದ್ರೆ ಮತ್ತು ದೈಹಿಕ ಚಟುವಟಿಕೆ ನಿರ್ವಹಣೆ ಕುರಿತು ತಿಳಿಸಿದ್ದಾರೆ.

ಅಧ್ಯಯನದ ಫಲಿತಾಂಶವನ್ನು ಅಮರಿಕನ್​ ಅಕಾಡೆಮಿ ಆಫ್​ ನ್ಯೂರೋಲಾಜಿ ಜರ್ನಲ್​ನಲ್ಲಿ ಪ್ರಕಟಿಸಲಾಗಿದೆ. ಈ ವೇಳೆ ಸಾಮಾನ್ಯ ನಿದ್ರೆಗಿಂತ ಕಡಿಮೆ ನಿದ್ರೆಯ ಗುಣಮಟ್ಟವೂ ಈ ತಲೆನೋವಿನೊಂದಿಗೆ ಸಂಬಂಧವನ್ನು ಹೊಂದಿದೆ ಎಂದು ತೋರಿಸಿದೆ.

ಸಂಶೋಧಕರ ಪ್ರಕಾರ, ದೈಹಿಕ ಮತ್ತು ಭಾವನಾತ್ಮಕ ಮನಸ್ಥಿತಿ ಕೂಡ ಈ ಮೈಗ್ರೇನ್​ಗೆ ಕಾರಣವಾದ ಅಂಶವಾಗಿದೆ. ಆತಂಕ ಇಲ್ಲವೇ ಬೇಸರದ ಮನಸ್ಥಿತಿ ಕೂಡ ಮೈಗ್ರೇನ್​ ಉಲ್ಬಣಕ್ಕೆ ಕಾರಣವಾಗಿದೆ.

ಈ ವಿಭಿನ್ನ ಬಗೆಯ ಮಾದರಿಗಳು ಬೆಳಗ್ಗೆ ಅಥವಾ ದಿನದ ನಂತರದಲ್ಲಿ ತಲೆನೋವಿನ ಸಿರ್ಕಾಡಿಯನ್ ರಿದಂ ಅನ್ನು ತೋರಿಸುತ್ತದೆ ಎಂದು ಅಧ್ಯಯನದ ಲೇಖಕ ಕಥ್ಲೀನ್​ ಆರ್​ ಮೆರಿಕಂಗ್ಸ್​​ ತಿಳಿಸಿದ್ದಾರೆ. ಈ ಅಧ್ಯಯನದ ಫಲಿತಾಂಶವು ಮೈಗ್ರೇನ್​ ಉಲ್ಬಣದ ಪ್ರಕ್ರಿಯೆಗೆ ಕಾರಣವಾಗುವ ಅಂಶದ ಒಳನೋಟವನ್ನು ನೀಡುವ ಜೊತೆಗೆ ಈ ಕುರಿತ ಚಿಕಿತ್ಸೆ ತಡೆಗಟ್ಟುವಿಕೆಗೆ ಸಹಾಯ ಮಾಡುತ್ತದೆ ಎಂದಿದ್ದಾರೆ.

ಮೈಗ್ರೇನ್​ಗೆ ಕಾರಣವಾಗುವ ಅಂಶವನ್ನು ಊಹೆ ಮಾಡುವ ಮೂಲಕ ಜನರು ಇದನ್ನು ತಡೆಗಟ್ಟಬಹುದು. ಪ್ರಚೋದನೆ ಅಂಶಗಳ ವಿರುದ್ಧ ಗಮನಹರಿಸಿ ಜೀವನದ ಗುಣಮಟ್ಟ ಸುಧಾರಣೆಗೆ ಕ್ರಮ ವಹಿಸಬಹುದು ಎಂದಿದ್ದಾರೆ. (ಪಿಟಿಐ)

ಇದನ್ನೂ ಓದಿ: ನಿದ್ರಾಹೀನತೆಗೆ ಕಾರಣವಾಗಲಿದೆ ಎನರ್ಜಿ ಡ್ರಿಂಕ್​; ಸಂಶೋಧನೆ