ಹೈದರಾಬಾದ್: ದೇಶದಲ್ಲೇ ಮೊದಲ ಬಾರಿಗೆ ರಕ್ತದ ಕೊಲೆಸ್ಟ್ರಾಲ್ ಮಟ್ಟದಲ್ಲಿ ಅಸಹಜ ಏರಿಳಿತವನ್ನು (ಡಿಸ್ಲಿಪಿಡೆಮಿಯಾ) ತಡೆಗಟ್ಟಲು ಕಾರ್ಡಿಯೋಲಾಜಿಕಲ್ ಸೊಸೈಟಿ ಆಫ್ ಇಂಡಿಯಾ (ಸಿಎಸ್ಐ) ಮಾರ್ಗಸೂಚಿಗಳನ್ನು ಬಿಡುಗಡೆ ಮಾಡಿದೆ. ಈ ಮಾರ್ಗಸೂಚಿಗಳು ರಕ್ತದಲ್ಲಿನ ಕೊಲೆಸ್ಟ್ರಾಲ್ ಮಟ್ಟವನ್ನು ನಿಯಂತ್ರಿಸಲು ಸಹಾಯ ಮಾಡುತ್ತವೆ.
ಸಿಎಸ್ಐ ಅಧ್ಯಕ್ಷ ಡಾ.ಪ್ರತಾಪಚಂದ್ರ ರಥ ಮಾತನಾಡಿ, ಇದೊಂದು ಸೈಲೆಂಟ್ ಕಿಲ್ಲರ್ ಇದ್ದಂತೆ. ಡಿಸ್ಲಿಪಿಡೆಮಿಯಾದಲ್ಲಿ ಅಧಿಕ ರಕ್ತದ ಕೊಲೆಸ್ಟ್ರಾಲ್, ಹೆಚ್ಚಿನ ಎಲ್‌ಡಿಎಲ್ - ಕೊಲೆಸ್ಟ್ರಾಲ್ (ಕೆಟ್ಟ ಕೊಲೆಸ್ಟ್ರಾಲ್), ಹೆಚ್ಚಿನ ಟ್ರೈಗ್ಲಿಸರೈಡ್‌ಗಳು ಮತ್ತು ಕಡಿಮೆ ಎಚ್‌ಡಿಎಲ್ - ಕೊಲೆಸ್ಟ್ರಾಲ್ (ಒಳ್ಳೆ ಕೊಲೆಸ್ಟ್ರಾಲ್) ಸೇರಿವೆ. ಇದು ಹೃದಯಾಘಾತ ಮತ್ತು ಪಾರ್ಶ್ವವಾಯುವಿನಂತಹ ಹೃದಯ ಸಂಬಂಧಿತ ಕಾಯಿಲೆಗಳಿಗೆ ಕಾರಣವಾಗುತ್ತದೆ. ಇದರ ರೋಗಲಕ್ಷಣಗಳು ಅಧಿಕ ರಕ್ತದೊತ್ತಡ ಮತ್ತು ಮಧುಮೇಹದಂತಹ ಸಮಸ್ಯೆಗಳಂತೆ ತ್ವರಿತವಾಗಿ ಕಾಣಿಸಿಕೊಳ್ಳುವುದಿಲ್ಲ ಎಂದು ಅವರು ಹೇಳಿದರು.
ಮಾರ್ಗಸೂಚಿಗಳೇನು?:
- ಹೃದ್ರೋಗ ಅಥವಾ ಅಧಿಕ ರಕ್ತದ ಕೊಲೆಸ್ಟ್ರಾಲ್ ಮಟ್ಟಗಳ (ಹೈಪರ್ಕೊಲೆಸ್ಟರಾಲ್ಮಿಯಾ) ರೋಗಗಳನ್ನು ಹೊಂದಿದ್ದ ಕುಟುಂಬ ಹಿನ್ನೆಲೆ ಇರುವ ಜನರು ತಮ್ಮ ಮೊದಲ ಲಿಪಿಡ್ ಪ್ರೊಫೈಲ್ ಅನ್ನು 18 ವರ್ಷ ಅಥವಾ ಅದಕ್ಕಿಂತ ಕಡಿಮೆ ವಯಸ್ಸಿನಲ್ಲಿ ಮಾಡಿಸಿಕೊಳ್ಳಬೇಕು.
- ಕಡಿಮೆ ಅಪಾಯದ ಹೊಂದಿರುವವರು LDL-C ಮಟ್ಟವನ್ನು 100 mg/dL ಗಿಂತ ಕಡಿಮೆ ಮತ್ತು HDL-C ಮಟ್ಟವನ್ನು 130 mg/dL ಗಿಂತ ಕಡಿಮೆ ಇರಿಸಿಕೊಳ್ಳುವ ಗುರಿ ಇಟ್ಟುಕೊಳ್ಳಬೇಕು.
- ಹೆಚ್ಚಿನ ಅಪಾಯದಲ್ಲಿರುವವರು (ಮಧುಮೇಹ, ರಕ್ತದೊತ್ತಡ) LDL-C ಮಟ್ಟವನ್ನು 70 mg/dL ಗಿಂತ ಕಡಿಮೆ ಮತ್ತು HDL-C ಅಲ್ಲದ ಮಟ್ಟವನ್ನು 100 mg/dL ಗಿಂತ ಕಡಿಮೆ ಇರಿಸಿಕೊಳ್ಳಲು ಪ್ರಯತ್ನಿಸಬೇಕು.
- ಹೆಚ್ಚಿನ ಅಪಾಯದಲ್ಲಿರುವವರು (ಪಾರ್ಶ್ವವಾಯು , ಹೃದಯಾಘಾತ, ದೀರ್ಘಕಾಲದ ಮೂತ್ರಪಿಂಡ ಕಾಯಿಲೆಯಿಂದ ಬಳಲುತ್ತಿರುವವರು) LDL-C ಮಟ್ಟವನ್ನು 55 mg/dL ಗಿಂತ ಕಡಿಮೆ ಮತ್ತು HDL-C ಅಲ್ಲದ ಮಟ್ಟವನ್ನು 85 mg/dL ಗಿಂತ ಕಡಿಮೆ ಇರಿಸಿಕೊಳ್ಳಬೇಕು.
- ಇವರು ಆಹಾರದಲ್ಲಿ ಕಡಿಮೆ ಸಕ್ಕರೆ ಮತ್ತು ಕಾರ್ಬೋಹೈಡ್ರೇಟ್ ತೆಗೆದುಕೊಳ್ಳಬೇಕು. ಅಲ್ಲದೆ, ಹೃದಯವನ್ನು ಆರೋಗ್ಯವಾಗಿಟ್ಟುಕೊಳ್ಳಲು ಯೋಗ ಮತ್ತು ವ್ಯಾಯಾಮವನ್ನು ಮಾಡಬೇಕು.
ಇದನ್ನೂ ಓದಿ:ಕ್ಷಣ ಕ್ಷಣಕ್ಕೂ ಮೂಡ್ ಬದಲಾಗುತ್ತಾ ಹೋಗುತ್ತಾ?; ಇದಕ್ಕೆ ವಿಟಮಿನ್ ಬಿ12 ಕೊರತೆಯೇ ಕಾರಣವಾಗಿರಬಹುದು - Vitamin B12 deficiency
