Weekly Insulin for Type 2 Diabetes:ಕೆಲವು ಶುಗರ್ ಪೇಷೆಂಟ್ಗಳು ರಕ್ತದಲ್ಲಿನ ಶುಗರ್ ಲೆವಲ್ ನಿಯಂತ್ರಿಸಲು ಔಷಧಿಗಳ ಜೊತೆಗೆ ಇನ್ಸುಲಿನ್ ಇಂಜೆಕ್ಷನ್‌ಗಳನ್ನು ತೆಗೆದುಕೊಳ್ಳುತ್ತಾರೆ. ಈ ಔಷಧಗಳನ್ನು ತೆಗೆದುಕೊಳ್ಳುವ ಮೂಲಕ ಡಯಾಬಿಟಿಸ್ ನಿಯಂತ್ರಿಸಲು ನಿರಂತರವಾಗಿ ಹೋರಾಡಬೇಕಾಗುತ್ತದೆ. ಈ ಪರಿಸ್ಥಿತಿಯನ್ನು ಬದಲಾಯಿಸುವ ನಿಟ್ಟಿನಲ್ಲಿ ಕೆಲವು ಸಂಶೋಧಕರು ನಡೆಸಿದ ಸತತ ಪ್ರಯತ್ನಗಳಿಂದ ಸಕಾರಾತ್ಮಕ ಫಲಿತಾಂಶ ಬಂದಿದೆ. ಇದರಿಂದ ಮಧುಮೇಹಿಗಳು ಇನ್ಸುಲಿನ್ ಇಂಜೆಕ್ಷನ್ ಅನ್ನು ಪ್ರತಿದಿನ ತೆಗೆದುಕೊಳ್ಳುವ ಬದಲು ವಾರಕ್ಕೊಮ್ಮೆ ಮಾತ್ರ ತೆಗೆದುಕೊಳ್ಳಬಹುದು ಎಂದು ಅವರು ಕಂಡುಹಿಡಿದಿದ್ದಾರೆ. ಈ ಸಂಶೋಧನೆಯ ಸಂಪೂರ್ಣ ವಿವರಗಳನ್ನು ತಿಳಿದುಕೊಳ್ಳೋಣ.
ನಿರಂತರವಾಗಿ ಇನ್ಸುಲಿನ್ ಚುಚ್ಚುಮದ್ದು ತೆಗೆದುಕೊಳ್ಳುತ್ತಿರುವ ಮಧುಮೇಹಪೀಡಿತರು ಎದುರಿಸುತ್ತಿರುವ ಕಷ್ಟಗಳನ್ನು ಗಮನಿಸಿ, ಈ ಕುರಿತು ಹೆಚ್ಚು ಸಂಶೋಧನೆ ಆರಂಭಿಸಲಾಗಿದೆ. ಇದೀಗ ಸಂಶೋಧಕರ ಶ್ರಮಕ್ಕೆ ಫಲ ದೊರೆತಿದ್ದು, ಕೊನೆಗೂ ಅವರು ಯಶಸ್ವಿಯಾಗಿದ್ದಾರೆ. 'ಎಫ್ಸಿಟೋರಾ' ಎಂಬ ಹೊಸ ರೀತಿಯ ಇನ್ಸುಲಿನ್ ಇಂಜೆಕ್ಷನ್ ಆವಿಷ್ಕಾರ ಮಾಡಿದ್ದಾರೆ. ಈ ಇಂಜೆಕ್ಷನ್ ಅನ್ನು ಪ್ರತಿದಿನ ತೆಗೆದುಕೊಳ್ಳುವ ಬದಲಾಗಿ ವಾರಕ್ಕೊಮ್ಮೆ ಮಾತ್ರ ತೆಗೆದುಕೊಳ್ಳಬಹುದು. ಮಧುಮೇಹಿಗಳು ಪ್ರತಿದಿನ ತೆಗೆದುಕೊಳ್ಳುವ 'ಡೆಗ್ಲುಡೆಕ್' ಇನ್ಸುಲಿನ್ ಇಂಜೆಕ್ಷನ್‌ನಷ್ಟೇ ಸುರಕ್ಷಿತವಾಗಿದೆ. ಮೂರು ಪ್ರಾಯೋಗಿಕ ಪರೀಕ್ಷೆಗಳ ಬಳಿಕ ಸುರಕ್ಷಿತವೆನ್ನುವುದು ದೃಢಪಟ್ಟಿದೆ ಎಂದು ಸಂಶೋಧಕರು ತಿಳಿಸಿದ್ದಾರೆ.
'ಎಫ್ಸಿಟೋರಾ' ಇಂಜೆಕ್ಷನ್:ಈ ಸಂಶೋಧನಾ ಪ್ರಯೋಗದ ಭಾಗವಾಗಿ ಟೈಪ್ 2 ಮಧುಮೇಹದಿಂದ ಬಳಲುತ್ತಿರುವ ಜನರಿಗೆ 'ಎಫ್ಸಿಟೋರಾ' ಇಂಜೆಕ್ಷನ್ ಕೊಡಲಾಯಿತು. ಇದರೊಂದಿಗೆ ಇದನ್ನು ಡೆಗ್ಲುಡೆಕ್ ಇಂಜೆಕ್ಷನ್ ಜೊತೆಗೂ ಹೋಲಿಕೆ ಮಾಡಲಾಯಿತು. 'ಎಫ್ಸಿಟೋರಾ' ಇಂಜೆಕ್ಷನ್ನ ಫಲಿತಾಂಶಗಳು ಹೆಚ್ಚು ಯಶಸ್ವಿಯಾಗಿವೆ ಎಂದು ಸಂಶೋಧಕರು ಸ್ಪಷ್ಟಪಡಿಸಿದ್ದಾರೆ. ಈ ಸಂಶೋಧನೆಯ ವಿವರಗಳನ್ನು "ನ್ಯೂ ಇಂಗ್ಲೆಂಡ್ ಜರ್ನಲ್ ಆಫ್ ಮೆಡಿಸಿನ್"ನಲ್ಲಿ ಪ್ರಕಟಿಸಲಾಗಿದೆ. ಸಂಬಂಧಿತ ಸಂಶೋಧನಾ ವರದಿಗಾಗಿ ಇಲ್ಲಿ ಕ್ಲಿಕ್ ಮಾಡಿ.
ಸಂಶೋಧನೆಯ ಪ್ರಯೋಗದ ಭಾಗವಾಗಿ ಒಟ್ಟು 928 ಜನರನ್ನು 52 ವಾರಗಳವರೆಗೆ ಗಮನಹರಿಸಲಾಯಿತು. ಬಳಿಕ 3 ತಿಂಗಳ ಅವಧಿಯಲ್ಲಿ ಸರಾಸರಿ ಗ್ಲೂಕೋಸ್ ಮಟ್ಟ ಸೂಚಿಸುವ HbA1c ಮಟ್ಟಗಳು, ಡೆಗ್ಲುಡೆಕ್‌ನೊಂದಿಗೆ ಶೇ.8.24 ರಿಂದ ಶೇ.7.05ಕ್ಕೆ ಕಡಿಮೆಯಾಗುವುದು ಕಂಡುಬಂದಿದೆ. ಹೊಸ ಇನ್ಸುಲಿನ್ ಎಸ್ಸಿಟೋರಾದೊಂದಿಗೆ, ಶೇ. 8.21 ರಿಂದ ಶೇ. 6.97ಕ್ಕೆ ಇಳಿಕೆಯಾಗಿರುವುದು ತಿಳಿದುಬಂದಿದೆ. ಹೆಚ್ಚುವರಿಯಾಗಿ, ಡೆಗ್ಲುಡೆಕ್ ತೆಗೆದುಕೊಂಡ ಆರು ಬಾರಿ ಕಡಿಮೆ ಗ್ಲೂಕೋಸ್ ಮಟ್ಟವನ್ನು (ಹೈಪೊಗ್ಲಿಸಿಮಿಯಾ) ಅನುಭವಿಸಿದರು. ಆದ್ರೆ, ಎಫ್ಸಿಟೋರಾದೊಂದಿಗೆ ಅಂತಹ ಯಾವುದೇ ಘಟನೆಗಳು ಕಂಡುಬಂದಿಲ್ಲ. ಆದ್ದರಿಂದ ದಿನನಿತ್ಯ ಇನ್ಸುಲಿನ್ ತೆಗೆದುಕೊಳ್ಳಲು ಕಷ್ಟಪಡುವವರಿಗೆ ಹಾಗೂ ನಿಯಮಿತವಾಗಿ ಇನ್ಸುಲಿನ್ ತೆಗೆದುಕೊಳ್ಳಲು ಸಹಾಯ ಮಾಡುವವರಿಗೆ ಎಫ್ಸಿಟೋರಾ ಉತ್ತಮ ಪರ್ಯಾಯವಾಗಲಿದೆ ಎಂದು ಸಂಶೋಧಕರು ವಿವರಿಸುತ್ತಾರೆ.