ಕನ್ನಡ ಚಿತ್ರರಂಗದಲ್ಲಿ ಕಂಟೆಂಟ್ ಆಧಾರಿತ ಚಿತ್ರಗಳ ಜೊತೆಗೆ ನವ ಪ್ರತಿಭಾನ್ವಿತರ ಸಿನಿಮಾಗಳು ಈ ವಾರ ಬಿಡುಗಡೆ ಆಗುವ ಮೂಲಕ ಪ್ರೇಕ್ಷಕರಿಗೆ ಮನರಂಜನೆಯ ರಸದೌತಣ ಉಣಬಡಿಸುತ್ತಿದೆ. ಸ್ಯಾಂಡಲ್ವುಡ್ನಲ್ಲಿ ಈ ವಾರ ವಿಭಿನ್ನ ಕಥೆಗಳನ್ನೊಳಗೊಂಡಿರುವ 7 ಸಿನಿಮಾಗಳು ತೆರೆಗಪ್ಪಳಿಸಿವೆ.
ತೆರೆಕಂಡ ಸಿನಿಮಾಗಳಿವು: ನಟರಾಕ್ಷಸ ಖ್ಯಾತಿಯ ಧನಂಜಯ್ ಅಭಿನಯದ ಪ್ಯಾನ್ ಇಂಡಿಯಾ ಸಿನಿಮಾ ಜೀಬ್ರಾ, ಅನೀಶ್ ತೇಜಶ್ವರ್ ನಟನೆಯ ಆರಾಮ್ ಅರವಿಂದಸ್ವಾಮಿ, ಸುನೀಲ್ ಹಾಗೂ ರಾಕೇಶ್ ಅಡಿಗ ಅವರ ಮರ್ಯಾದೆ ಪ್ರಶ್ನೆ, ಧರ್ಮಕೀರ್ತಿ ರಾಜ್, ತಿಲಕ್ ಸೇರಿ ಬಹುತಾರಾಗಣದ ಟೆನಂಟ್, ಚೇತನ್ ಚಂದ್ರ ನಟಿಸಿರುವ ಪ್ರಭುತ್ವ, ಗಟ್ಟಿಮೇಳ ಧಾರಾವಾಹಿ ಖ್ಯಾತಿಯ ನಿಶಾ ಅಭಿನಯದ ಚೊಚ್ಚಲ ಚಿತ್ರ ಅಂಶು ಹಾಗೂ ತೆಲುಗಿನ ಲವ್ ರೆಡ್ಡಿ ಸಿನಿಮಾ ಸೇರಿದಂತೆ ಒಟ್ಟು 7 ಹೊಸ ಚಿತ್ರಗಳಿಂದು ರಾಜ್ಯಾದ್ಯಂತ ಬಿಡುಗಡೆ ಆಗಿವೆ.
ಹೀಗೆ ಒಂದೇ ದಿನ ಏಳು ಚಿತ್ರಗಳು ಬಿಡುಗಡೆ ಆದಾಗ ಯಾವ ಸಿನಿಮಾ ನೋಡೋದು, ಯಾವ ಸಿನಿಮಾ ಬಿಡೋದು ಎಂಬ ಗೊಂದಲ ಆಗೋದು ಸಹಜ. ಆದರೆ ಆಯಾ ಚಿತ್ರಗಳ ನಿರ್ದೇಶಕರು, ನಿರ್ಮಾಪಕರು ಹೇಳೋದೇನಂದ್ರೆ ಎಲ್ಲಾ ಚಿತ್ರಕ್ಕೂ ಅದರದ್ದೇ ಆದ ಪ್ರೇಕ್ಷಕ ವರ್ಗ ಇರುತ್ತದೆ. ಹಾಗಾಗಿ, ಎಲ್ಲಾ ಸಿನಿಮಾಗಳಿಗೂ ನಿರೀಕ್ಷಿತ ಪ್ರಮಾಣದಲ್ಲಿ ಪ್ರೇಕ್ಷಕರು ಬರುತ್ತಾರೆಂಬ ನಂಬಿಕೆಯಲ್ಲಿಂದು ಏಳು ಚಿತ್ರಗಳು ತೆರೆಕಂಡಿವೆ.
ಆರಾಮ್ ಅರವಿಂದ ಸ್ವಾಮಿ: ಈ ಏಳು ಚಿತ್ರಗಳ ಪೈಕಿ ಕನ್ನಡದಲ್ಲಿ ಸಖತ್ ಸದ್ದು ಮಾಡುತ್ತಿರುವ ಸಿನಿಮಾ ಎಂದರೆ ಅದು ಅನೀಶ್ ತೇಜಶ್ವರ್ ಹಾಗೂ ಮಿಲನ ನಾಗರಾಜ್ ಅಭಿನಯದ 'ಆರಾಮ್ ಅರವಿಂದ ಸ್ವಾಮಿ'. ವಿಭಿನ್ನ ಪ್ರಮೋಷನ್‌ ಮಾಡಿರುವ ತಂಡ ಈ ಬಾರಿ ಪ್ರೇಕ್ಷಕರ ಮನ ಗೆಲ್ಲುವ ವಿಶ್ವಾಸದಲ್ಲಿದೆ. ಟ್ರೇಲರ್, ಹಾಡುಗಳಿಂದಲೇ ಭರವಸೆ ಹುಟ್ಟಿಸಿರೋ ಆರಾಮ್ ಅರವಿಂದ್ ಸ್ವಾಮಿ ನಿರೀಕ್ಷೆಯಂತೆ ಸಿನಿಪ್ರೇಮಿಗಳ ಮನ ಗೆಲ್ಲುತ್ತಾನಾ ಎಂಬುದು ಶೀಘ್ರವೇ ಗೊತ್ತಾಗಲಿದೆ.
ಮರ್ಯಾದೆ ಪ್ರಶ್ನೆ: ಶೀರ್ಷಿಕೆಯಿಂದ‌ಲೇ ಕನ್ನಡದಲ್ಲಿ ಕ್ರೇಜ್ ಹುಟ್ಟಿಸಿರೋ ಚಿತ್ರ 'ಮರ್ಯಾದೆ ಪ್ರಶ್ನೆ'. ರಾಕೇಶ್ ಅಡಿಗ, ಸುನೀಲ್ ರಾವ್, ಪೂರ್ಣಚಂದ್ರ ಮೈಸೂರು, ತೇಜು ಬೆಳವಾಡಿ, ಶೈನ್ ಶೆಟ್ಟಿ, ಪ್ರಭು ಮುಂಡ್ಕೂರ್ ಮುಖ್ಯಭೂಮಿಕೆಯಲ್ಲಿರೋ ಈ ಚಿತ್ರ ಟ್ರೇಲರ್ ಮೂಲಕ ಸದ್ದು ಮಾಡಿದೆ. ಹಾಡುಗಳು ಸಹ ಗಮನ ಸೆಳೆದಿವೆ. ನಾಗರಾಜ್ ಸೋಮಯಾಜಿ ನಿರ್ದೇಶನ ಮಾಡಿದ್ದು, ಶ್ವೇತಾ ಪ್ರಸಾದ್, ಆರ್ಜೆ ಪ್ರದೀಪ ನಿರ್ಮಾಣ ಮಾಡಿರುವ ಈ ಚಿತ್ರ ಮಧ್ಯಮ ವರ್ಗದ ರಿಯಲ್ ಕಹಾನಿಯನ್ನು ಒಳಗೊಂಡಿದೆ.
ಜೀಬ್ರಾ: ಈ ಮಧ್ಯೆ ನಟರಾಕ್ಷಸ ಖ್ಯಾತಿಯ ಡಾಲಿ ಧನಂಜಯ್ ಅಭಿನಯದ ಪ್ಯಾನ್ ಇಂಡಿಯಾ ಸಿನಿಮಾ 'ಜೀಬ್ರಾ' ಕೂಡಾ ಇಂದೇ ರಿಲೀಸ್ ಆಗಿದೆ. ತೆಲುಗು ನಟ ಸತ್ಯದೇವ್ ಜೊತೆ ಧನಂಜಯ್ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಇವರ ಜೊತೆ ಅಮೃತಾ ಅಯ್ಯಂಗಾರ್ ಒಂದು ವಿಶೇಷ ಪಾತ್ರದಲ್ಲಿ ನಟಿಸಿದ್ದಾರೆ. ಸಸ್ಪೆನ್ಸ್ ಥ್ರಿಲ್ಲರ್ ಜೊತೆ ಮಾಸ್ ಕಥೆ ಹೊಂದಿರುವ ಜೀಬ್ರಾ ಕನ್ನಡ, ತೆಲುಗು, ತಮಿಳು, ಹಿಂದಿ ಭಾಷೆಗಳಲ್ಲಿ ಬಿಡುಗಡೆ ಆಗಿದೆ.