ಬಾಲಿವುಡ್ನ ಉದಯೋನ್ಮುಖ ತಾರೆ ವೀರ್ ಪಹಾರಿಯಾ ತಮ್ಮ ಚೊಚ್ಚಲ ಚಿತ್ರ 'ಸ್ಕೈ ಫೋರ್ಸ್' ಮೂಲಕ ಸಖತ್ ಸುದ್ದಿಯಲ್ಲಿದ್ದಾರೆ. ಬಿಡುಗಡೆ ನಂತರವೂ ತಂಡ ಪ್ರಚಾರದಲ್ಲಿ ನಿರತರಾಗಿದ್ದು, ನೆಟ್ಟಿಗರ ಗಮನ ಸೆಳೆಯುವಲ್ಲಿ ಯಶಸ್ವಿಯಾಗಿದ್ದಾರೆ. ತಮ್ಮ ಚೊಚ್ಚಲ ಚಿತ್ರ 'ಸ್ಕೈ ಫೋರ್ಸ್'ನಲ್ಲಿ ವೀರ್ ವಾಯುಪಡೆ ಅಧಿಕಾರಿ ಪಾತ್ರವನ್ನು ನಿರ್ವಹಿಸಿದ್ದಾರೆ. ಇತ್ತೀಚೆಗೆ ಪ್ರಚಾರ ಸಂದರ್ಭ, ಭಾರತ ತಂಡದ ಶ್ರೇಷ್ಠ ಕ್ರಿಕೆಟ್ ಆಟಗಾರ ವಿರಾಟ್ ಕೊಹ್ಲಿ ಅವರ ಜೀವನ ಚರಿತ್ರೆಯಲ್ಲಿ ಅವರ ಪಾತ್ರವನ್ನು ನಿರ್ವಹಿಸುವ ಬಗ್ಗೆ ನಟನಲ್ಲಿ ಕೇಳಲಾಯಿತು.
ಸವಾಲನ್ನು ಸ್ವೀಕರಿಸಲು ಸಿದ್ಧ :ಈಪ್ರಶ್ನೆಗೆ ಉತ್ತರಿಸಿದ ನಟ, ವಿಶ್ವದ ಪ್ರಸಿದ್ಧ ಕ್ರಿಕೆಟ್ ಆಟಗಾರನನ್ನು ಹೊಗಳಿದರು. ಆ ಪಾತ್ರಕ್ಕೆ ತಾನು ಸೂಕ್ತ ಎಂದು ನಿರ್ದೇಶಕರಿಗೆ ಅನಿಸಿದರೆ, ಕಷ್ಟಪಟ್ಟು ಕೆಲಸ ಮಾಡಲು ಮತ್ತು ಸವಾಲನ್ನು ಸ್ವೀಕರಿಸಲು ಸಿದ್ಧ ಎಂದು ತಿಳಿಸಿದರು.
'ವಿರಾಟ್ ಸರ್ ಗ್ರೇಟ್':ವಿರಾಟ್ ಕೊಹ್ಲಿ ಪಾತ್ರದಲ್ಲಿ ನಟಿಸಲು ಆಸಕ್ತಿ ಇದೆಯೇ ಮತ್ತು ಕ್ರಿಕೆಟಿಗನ ಜೀವನ ಚರಿತ್ರೆಯನ್ನು ನಿರ್ಮಿಸಬಹುದೇ ಎಂದು ವೀರ್ ಅವರಲ್ಲಿ ಕೇಳಲಾಯಿತು. ಅದಕ್ಕೆ ಪ್ರತಿಕ್ರಿಯಿಸಿ, 'ವಿರಾಟ್ ಸರ್ ಬಹಳಾನೇ ಗ್ರೇಟ್'. ಅವರೋರ್ವ ಲೆಜೆಂಡ್. ಕೆಲಸದ ಬಗ್ಗೆ ಉತ್ಸಾಹ ಹೊಂದಿರುವ ವ್ಯಕ್ತಿ. ನೀವು ಹೇಳುತ್ತಿರುವ ವಿಚಾರ ತುಂಬಾನೇ ಎಕ್ಸೈಟಿಂಗ್ ಆಗಿದೆ. ಮುಂಬರುವ ವರ್ಷಗಳಲ್ಲಿ ನಾನು ಅದಕ್ಕೆ ಯೋಗ್ಯ ಎಂದೆನಿಸಿದರೆ, ನಾನು ನನ್ನ ಸಂಪೂರ್ಣ ಶ್ರಮ ಹಾಕುತ್ತೇನೆ. ನಿರ್ಮಾಪಕರು ಎಂದಾದರೂ ಈ ಒಂದು ಚಿತ್ರವನ್ನು ನಿರ್ಮಿಸಿದರೆ, ನಾನದಕ್ಕೆ ಯೋಗ್ಯ ಎಂದು ಅವರಿಗೆ ಅನಿಸಿದರೆ, ನಾನು ಅದರ ಭಾಗವಾಗಲು ಇಷ್ಟಪಡುತ್ತೇನೆ ಎಂದು ತಿಳಿಸಿದರು.