ಬಿಡುಗಡೆಗೆ ಸಜ್ಜಾಗಿರುವ ಭಾರತೀಯ ಚಿತ್ರರಂಗದ ಬಹುನಿರೀಕ್ಷಿತ ಚಿತ್ರ 'ಕಲ್ಕಿ 2898 ಎಡಿ'ಯ ಪ್ರಚಾರ ಜೋರಾಗೇ ನಡೆಯುತ್ತಿದೆ. ಜೂನ್ 27ರಂದು ಚಿತ್ರಮಂದಿರ ಪ್ರವೇಶಿಸಲಿರುವ ಬಹುತಾರಾಗಣದ ಚಿತ್ರದ ಪ್ರಚಾರಕ್ಕಾಗಿ ಚಿತ್ರತಂಡ ಸರ್ವಪ್ರಯತ್ನ ಮಾಡುತ್ತಿದೆ. ಪ್ರಭಾಸ್ 'ಬುಜ್ಜಿ'ಯೊಂದಿಗೆ ಈಗಾಗಲೇ ಚಿತ್ರದ ಪ್ರಚಾರವನ್ನು ಆಕರ್ಷಕ ಟೀಸರ್‌ಗಳ ಮೂಲಕ ಶುರು ಮಾಡಿದ್ದಾರೆ. ಚಿತ್ರದ ಸುತ್ತಲಿನ ಹೈಪ್ ಹೆಚ್ಚಿಸಿದ್ದಾರೆ.
ಈ ಮಧ್ಯೆ, ಬುಜ್ಜಿಯು ತನ್ನ ವಿನ್ಯಾಸ ಮತ್ತು ಗಾತ್ರದಿಂದ ಈಗಾಗಲೇ ಸಾಕಷ್ಟು ಖ್ಯಾತಿ ಗಳಿಸಿದೆ. ನಿರ್ದೇಶಕ ನಾಗ್ ಅಶ್ವಿನ್ ಅವರೀಗ ಈ ವಾಹನದ ಟೆಸ್ಟ್ ಡ್ರೈವ್ಗೆ ಎಕ್ಸ್ ಮತ್ತು ಟೆಸ್ಲಾ ಸಿಇಒ ಎಲೋನ್ ಮಸ್ಕ್ ಅವರನ್ನು ಆಹ್ವಾನಿಸಿದ್ದಾರೆ.
ನಾಗ್ ಅಶ್ವಿನ್ ತಮ್ಮ ಎಕ್ಸ್ ಖಾತೆಯಲ್ಲಿ, ''ಡಿಯರ್ ಎಲೋನ್ ಮಸ್ಕ್ ಸರ್, ನಮ್ಮ ಬುಜ್ಜಿ ನೋಡಲು ಮತ್ತು ಓಡಿಸಲು ನಾವು ನಿಮ್ಮನ್ನು ಆಹ್ವಾನಿಸಲು ಇಷ್ಟಪಡುತ್ತೇವೆ. ಇದು 6 ಟನ್ ಬೀಸ್ಟ್. ಮೇಡ್ ಇನ್ ಇಂಡಿಯಾ. ಸಂಪೂರ್ಣ ಎಲೆಕ್ಟ್ರಿಕ್ ಆಗಿದ್ದು, ಎಂಜಿನಿಯರಿಂಗ್ ಸಾಧನೆ. ಬುಜ್ಜಿ ನಿಮ್ಮ ಸೈಬರ್ ಟ್ರಕ್‌ನೊಂದಿಗೆ ಉತ್ತಮ ಫೋಟೋ ಆಗಬಹು. (ಒಟ್ಟಿಗೆ ಸಂಚರಿಸುವುದನ್ನು ನೋಡುವುದು ಒಂದು ಉತ್ತಮ ದೃಶ್ಯ)" ಎಂದು ಬರೆದುಕೊಂಡಿದ್ದಾರೆ.
ಕಲ್ಕಿ 2898 ಎಡಿ ಚಿತ್ರವೀಗ ಹೊಚ್ಚ-ಹೊಸ ಪಾತ್ರ (ಬುಜ್ಜಿ)ದಿಂದ ಗಮನ ಸೆಳೆಯುತ್ತಿದೆ. ರೋಬೋಟ್ ಆಟೋಮೊಬೈಲ್ ಬುಜ್ಜಿ ಪಾತ್ರದ ಬಗ್ಗೆ ಪ್ರೇಕ್ಷಕರು ತಮ್ಮ ಕುತೂಹಲ ವ್ಯಕ್ತಪಡಿಸುತ್ತಿದ್ದಾರೆ. ಚಿತ್ರ ತಯಾರಕರು ಇತ್ತೀಚೆಗೆ ಹೈದರಾಬಾದ್‌ನ ರಾಮೋಜಿ ಫಿಲ್ಮ್ ಸಿಟಿಯಲ್ಲಿ ನಡೆದ ಅದ್ಧೂರಿ ಸಮಾರಂಭದಲ್ಲಿ 'ಬುಜ್ಜಿ'ಯನ್ನು ಪರಿಚಯಿಸಿದರು. ನಾಯಕ ನಟ ಪ್ರಭಾಸ್ ಇದೇ ಕಾರ್ನಲ್ಲಿ ಪ್ರವೇಶಿಸಿ ಪ್ರೇಕ್ಷಕರನ್ನು ಆಕರ್ಷಿಸಿದರು. ಬ್ರೈನ್ ಕಂಟ್ರೋಲ್ಡ್ ಕ್ಯಾರೆಕ್ಟರ್ 'ಬುಜ್ಜಿ'ಗೆ ಕೀರ್ತಿ ಸುರೇಶ್ ಧ್ವನಿ ನೀಡಿದ್ದಾರೆ. ಕಥಾವಸ್ತುವಿಗೆ ಹೊಸ ದೃಷ್ಟಿಕೋನ ನೀಡಲಿದೆ ಎಂಬ ವಿಶ್ವಾಸ ನೋಡುಗರದ್ದು. ಸಿನಿಮಾಗಿದು ಬುದ್ಧಿವಂತ ಮತ್ತು ಥ್ರಿಲ್ಲಿಂಗ್ ಅಂಶವಾಗಬಹುದು ಎಂದು ನಿರೀಕ್ಷಿಸಲಾಗಿದೆ.