ಕಾಯುವಿಕೆ ಕೊನೆಗೊಂಡಿದೆ. ಕನ್ನಡ ಚಿತ್ರರಂಗದ ಅಭಿನಯ ಚಕ್ರವರ್ತಿ ಸುದೀಪ್ ಅವರ ಬಹುನಿರೀಕ್ಷಿತ ಸಿನಿಮಾ 'ಮ್ಯಾಕ್ಸ್' ಇಂದು ತೆರೆಗಪ್ಪಳಿಸಿದೆ. ಎರಡೂವರೆ ವರ್ಷಗಳ ಬಳಿಕ ಚಂದನವದ ಬಹುಬೇಡಿಕೆ ನಟನ ಬಹುನಿರೀಕ್ಷಿತ ಸಿನಿಮಾ ಬಿಡುಗಡೆ ಆಗಿದ್ದು, ಅಪಾರ ಸಂಖ್ಯೆಯ ಅಭಿಮಾನಿಗಳು ಅದ್ಧೂರಿಯಾಗಿ ಸ್ವಾಗತಿಸಿದ್ದಾರೆ. ಆದ್ರೆ ಆರಂಭಿಕವಾಗಿ ಸೋಷಿಯಲ್ ಮೀಡಿಯಾದಲ್ಲಿ ಸಿನಿಮಾ ಮಿಶ್ರ ಪ್ರತಿಕ್ರಿಯೆ ಸ್ವೀಕರಿಸಿದೆ.
ಮಿಶ್ರ ಪ್ರತಿಕ್ರಿಯೆ:ಸಿನಿಮಾ ನೋಡಿ ಹೊರಬಂದವರ ರಿಯಾಕ್ಷನ್ಸ್ ಸೋಷಿಯಲ್ ಮೀಡಿಯಾದಲ್ಲಿ ಸಖತ್ ವೈರಲ್ ಆಗುತ್ತಿದೆ. ಸಿನಿಮಾ ಸೂಪರ್. ಬ್ಲಾಕ್ಬಸ್ಟರ್. ಪರವಾಗಿಲ್ಲ, ನೋಡಬಹುದು. ಚೆನ್ನಾಗಿಲ್ಲ. ಫ್ಲಾಪ್ ಮೂವಿ ಹೀಗೆ ಮಿಶ್ರ ಪ್ರತಿಕ್ರಿಯೆ ಕೊಟ್ಟಿದ್ದಾರೆ. ಈ ಅಭಿಪ್ರಾಯಗಳು ಹೀಗೆ ಮುಂದುವರಿದರೆ ಬಾಕ್ಸ್ ಆಫೀಸ್ ಮೇಲೆ ಪರಿಣಾಮ ಬೀರುವ ಸಾಧ್ಯತೆಗಳಿವೆ.
ಬಾಕ್ಸ್ ಆಫೀಸ್ ಕಲೆಕ್ಷನ್:ಸಿನಿಮಾ ಇಂಡಸ್ಟ್ರಿ ಟ್ಯಾಕರ್ ಸ್ಯಾಕ್ನಿಲ್ಕ್ ವರದಿ ಪ್ರಕಾರ, ಕಿಚ್ಚ ಸುದೀಪ್ ಸಿನಿಮಾ ತನ್ನ ಮೊದಲ ದಿನ ಭಾರತದಲ್ಲಿ 2.67 ಕೋಟಿ ರೂಪಾಯಿ ಕಲೆಕ್ಷನ್ ಮಾಡಲಿದೆ. ಈ ಅಂಕಿ ಅಂಶ ಏರುವ ಸಾಧ್ಯತೆ ಇದೆ. ವಾರದ ನಡುವೆ ಸಿನಿಮಾ ಬಿಡುಗಡೆ ಆಗಿದ್ದು, ಕ್ರಿಸ್ಮಸ್ ಸಂದರ್ಭವನ್ನು ಸದುಪಯೋಗಪಡಿಸಿಕೊಳ್ಳುವ ಭರವಸೆ ಇದೆ. ಸಹಜವಾಗಿ ವಾರಾಂತ್ಯದಲ್ಲಿ ಬಾಕ್ಸ್ ಆಫೀಸ್ ಅಂಕಿ ಅಂಶ ಏರಲಿದ್ದು, ಸದ್ಯ ಪ್ರತಿಕ್ರಿಯೆಗಳು ಪ್ರಮುಖ ಪಾತ್ರ ವಹಿಸಲಿದೆ. ಸುದೀಪ್ ಭಾರತೀಯ ಚಿತ್ರರಂಗದಲ್ಲೇ ಬೇಡಿಕೆ ಹೊಂದಿರುವ ನಟ ಆದ ಹಿನ್ನೆಲೆ, ಅಭಿಮಾನಿಗಳು ಸಾಕಷ್ಟು ನಿರೀಕ್ಷೆಗಳನ್ನಿಟ್ಟುಕೊಂಡಿದ್ದರು. ಆರಂಭಿಕ ವಿಮರ್ಷೆಗಳಲ್ಲಿ ಬಹುತೇಕ ಪ್ರಶಂಸೆಯೇ ಇದೆ.
'ಅಭಿನಯ ಚತ್ರವರ್ತಿ'ಗೆ ಟೀಕೆ: ಆರಂಭಲ್ಲೇ ಅಭಿನಯ ಚಕ್ರವರ್ತಿ ಬದಲಿಗೆ ಅಭಿನಯ ಚತ್ರವರ್ತಿ ಎಂಬ ಹೆಸರು ಬಂದಿದ್ದು, ಭಾರಿ ಟೀಕೆ ವ್ಯಕ್ತವಾಗಿದೆ. ಸೋಷಿಯಲ್ ಮೀಡಿಯಾಗಳಲ್ಲಿ ಥಿಯೇಟರ್ ಸ್ಕ್ರೀನ್ ಫೋಟೋ ವೈರಲ್ ಆಗುತ್ತಿದೆ.
ರಿಯಾಕ್ಷನ್ಸ್ ಹೇಗಿದೆ?ನಿರೂಪ್ ಭಂಡಾರಿ ಟ್ವೀಟ್ ಮಾಡಿ, ಮ್ಯಾಕ್ಸ್ ಸಿನಿಮಾವನ್ನು ಈಗಷ್ಟೇ ವೀಕ್ಷಿಸಿದೆ. ಸೂಪರ್ಬ್ ಆ್ಯಕ್ಷನ್ ಥ್ರಿಲ್ಲರ್. ಭಾವನೆಗಳ ಪರಿಪೂರ್ಣ ಮಿಶ್ರಣದೊಂದಿಗೆ ಅದ್ಭುತ ಸಿನಿಮೀಯ ಅನುಭವ ನೀಡಿದೆ. ಸಿನಿಮಾ ಬಹಳ ಇಷ್ಟವಾಯಿತು. ಕಿಚ್ಚ ಸುದೀಪ್ ಸರ್ ಅವರ ಅಪ್ರತಿಮ ಸ್ಟೈಲ್ ಮತ್ತು ವರ್ಚಸ್ಸು ಎದ್ದು ಕಾಣುತ್ತಿದೆ. ಈ ಅದ್ಭುತ ಪ್ರಯತ್ನಕ್ಕಾಗಿ ಇಡೀ ತಂಡಕ್ಕೆ ಅಭಿನಂದನೆಗಳು ಎಂದು ಪ್ರಶಂಸಿಸಿದ್ದಾರೆ.