ಚೆನ್ನೈ(ತಮಿಳುನಾಡು): ನಟಿ ನಯನತಾರಾ ವಿರುದ್ಧ ತಮಿಳು ಸೂಪರ್ ಸ್ಟಾರ್ ಧನುಷ್ ಸಲ್ಲಿಸಿದ್ದ ಕೃತಿಸ್ವಾಮ್ಯ ಉಲ್ಲಂಘನೆ ಮೊಕದ್ದಮೆಯನ್ನು ತಿರಸ್ಕರಿಸುವಂತೆ ಕೋರಿ ಒಟಿಟಿ ಪ್ಲಾಟ್‌ಫಾರ್ಮ್ ನೆಟ್ಫ್ಲಿಕ್ಸ್ ಸಲ್ಲಿಸಿದ್ದ ಅರ್ಜಿಯನ್ನು ಮದ್ರಾಸ್ ಹೈಕೋರ್ಟ್ ಮಂಗಳವಾರ ವಜಾಗೊಳಿಸಿದೆ. ನೆಟ್ ಫ್ಲಿಕ್ಸ್ ಡಾಕ್ಯು-ಡ್ರಾಮಾ 'ನಯನತಾರಾ: ಬಿಯಾಂಡ್ ದಿ ಫೇರಿಟೇಲ್'ನಲ್ಲಿ ತಮಿಳು ಚಲನಚಿತ್ರ 'ನಾನುಮ್ ರೌಡಿ ಧಾನ್'ನ ದೃಶ್ಯಗಳನ್ನು ಅನಧಿಕೃತವಾಗಿ ಬಳಸಲಾಗಿದೆ ಎಂದು ಆರೋಪಿಸಿ ಧನುಷ್ ಮೊಕದ್ದಮೆ ಹೂಡಿದ್ದಾರೆ.
ಮದ್ರಾಸ್ ಹೈಕೋರ್ಟ್ನಲ್ಲಿ ದಾವೆ ಹೂಡಲು ಧನುಷ್ ಒಡೆತನದ ವಂಡರ್ ಬಾರ್ ಫಿಲಂಸ್ಗೆ ನ್ಯಾಯಾಲಯವು ಈ ಹಿಂದೆ ನೀಡಿದ್ದ ಅನುಮತಿಯನ್ನು ಹಿಂಪಡೆಯುವಂತೆ ಲಾಸ್ ಗ್ಯಾಟೋಸ್ ಪ್ರೊಡಕ್ಷನ್ ಸರ್ವೀಸಸ್ ಇಂಡಿಯಾ ಎಲ್ಎಲ್ಪಿ ಸಲ್ಲಿಸಿದ್ದ ಮತ್ತೊಂದು ಅರ್ಜಿಯನ್ನು ಕೂಡ ನ್ಯಾಯಮೂರ್ತಿ ಅಬ್ದುಲ್ ಖುದ್ದೋಸ್ ವಜಾಗೊಳಿಸಿದರು. ಲಾಸ್ ಗ್ಯಾಟೋಸ್ ಪ್ರೊಡಕ್ಷನ್ ಸರ್ವೀಸಸ್ ಇಂಡಿಯಾ ಇದು ಭಾರತದಲ್ಲಿ ನೆಟ್ಫ್ಲಿಕ್ಸ್ನ ಕಂಟೆಂಟ್ ನಿರ್ವಹಣೆ ಮಾಡುತ್ತದೆ.
ಅರ್ಜಿದಾರರ ಕಂಪನಿಯು ಮುಂಬೈ ಮೂಲದವರಾಗಿರುವುದರಿಂದ ಮೊಕದ್ದಮೆಯ ವಿಚಾರಣೆ ಚೆನ್ನೈನಲ್ಲಿ ಮುಂದುವರಿಯಕೂಡದು ಎಂದು ಲಾಸ್ ಗ್ಯಾಟೋಸ್ ವಾದಿಸಿತ್ತು. ಆದರೆ, ಲಾಸ್ ಗಾಟೋಸ್ ಸಲ್ಲಿಸಿದ ಅರ್ಜಿಗಳಲ್ಲಿ ಯಾವುದೇ ಹುರುಳಿಲ್ಲ ಎಂದು ಗೌತಮ್ ಎಸ್.ರಾಮನ್ ಮತ್ತು ಹಿರಿಯ ವಕೀಲ ಪಿ.ಎಸ್.ರಾಮನ್ ಪರವಾಗಿ ನ್ಯಾಯಾಧೀಶರು ತೀರ್ಪು ನೀಡಿದರು. ವಂಡರ್ ಬಾರ್ ಫಿಲಂಸ್ ಕೋರಿರುವ ಮಧ್ಯಂತರ ಆದೇಶಕ್ಕೆ ಸಂಬಂಧಿಸಿದಂತೆ ಫೆಬ್ರವರಿ 5ರಂದು ಹೆಚ್ಚಿನ ವಿಚಾರಣೆ ನಡೆಯಲಿದೆ.
ಅಫಿಡವಿಟ್ನಲ್ಲಿ, ವಂಡರ್ಬಾರ್ ಫಿಲಂಸ್ ನ ನಿರ್ದೇಶಕ ಶ್ರೇಯಸ್ ಶ್ರೀನಿವಾಸನ್, ನಯನತಾರಾ ಅಥವಾ ನೆಟ್ಫ್ಲಿಕ್ಸ್ 2015ರಲ್ಲಿ ಬಿಡುಗಡೆಯಾದ ಚಲನಚಿತ್ರ 'ನಾನುಮ್ ರೌಡಿ ಧಾನ್'ನ ತೆರೆಮರೆಯ (ಬಿಟಿಎಸ್) ದೃಶ್ಯಗಳು ಸೇರಿದಂತೆ ಯಾವುದೇ ತುಣುಕನ್ನು ಚಲನಚಿತ್ರವನ್ನು ನಿರ್ಮಿಸಿದ ವಂಡರ್ ಬಾರ್ ಫಿಲಂಸ್ನ ಪೂರ್ವಾನುಮತಿಯಿಲ್ಲದೆ ಬಳಸುವ ಹಕ್ಕನ್ನು ಹೊಂದಿಲ್ಲ ಎಂದು ವಾದಿಸಿದ್ದಾರೆ.
ಆಗಸ್ಟ್ 27, 2014ರಂದು ನಯನತಾರಾ ವಂಡರ್ ಬಾರ್ ಫಿಲಂಸ್ನೊಂದಿಗೆ ಕಲಾವಿದರ ಒಪ್ಪಂದಕ್ಕೆ ಸಹಿ ಹಾಕಿದ್ದರು. ಈ ಒಪ್ಪಂದವು ಚಲನಚಿತ್ರಕ್ಕೆ ಸಂಬಂಧಿಸಿದಂತೆ ಅವರ ಅಭಿನಯ, ಹೋಲಿಕೆ, ಹೆಸರು ಮತ್ತು ಧ್ವನಿಗೆ ಸಂಬಂಧಿಸಿದ ಎಲ್ಲಾ ಹಕ್ಕುಗಳನ್ನು ನಿರ್ಮಾಣ ಕಂಪನಿಗೆ ಶಾಶ್ವತವಾಗಿ ವರ್ಗಾಯಿಸಿದೆ ಎಂದು ಶ್ರೀನಿವಾಸನ್ ವಿವರಿಸಿದರು.
ಡಾಕು-ಡ್ರಾಮಾದ ಟ್ರೈಲರ್ನಲ್ಲಿ ಬಿಟಿಎಸ್ ದೃಶ್ಯಗಳನ್ನು ಅನಧಿಕೃತವಾಗಿ ಬಳಸಿರುವುದು ಕಂಡುಬಂದ ನಂತರ, ನವೆಂಬರ್ 9, 2024 ರಂದು ನೆಟ್ ಫ್ಲಿಕ್ಸ್ಗೆ ನೋಟಿಸ್ ನೀಡಲಾಗಿದೆ ಎಂದು ವಂಡರ್ ಬಾರ್ ಫಿಲಂಸ್ ಹೇಳಿಕೊಂಡಿದೆ.
ಇದನ್ನೂ ಓದಿ: ಕಾಪಿರೈಟ್ ಉಲ್ಲಂಘನೆ: ನಟಿ ನಯನತಾರಾ ವಿರುದ್ಧ ಮೊಕದ್ದಮೆ ದಾಖಲಿಸಿದ ಸೂಪರ್ ಸ್ಟಾರ್ ಧನುಷ್
