ಹೈದರಾಬಾದ್: 'ಕೌನ್ ಬನೇಗಾ ಕರೋಡ್ಪತಿ' ಭಾರತೀಯ ಕಿರುತೆರೆಯ ಅತ್ಯಂತ ಜನಪ್ರಿಯ ಕಾರ್ಯಕ್ರಮ. ಕಳೆದ ವರ್ಷ ಕಾರ್ಯಕ್ರಮದ ನಿರೂಪಕ, ಬಾಲಿವುಡ್ ಐಕಾನ್ ಅಮಿತಾಭ್ ಬಚ್ಚನ್ ಅವರು ಈ ರಸಪ್ರಶ್ನೆ ಕಾರ್ಯಕ್ರಮಕ್ಕೆ ಭಾವನಾತ್ಮಕ ವಿದಾಯ ಹೇಳಿದ್ದರು. ಆದಾಗ್ಯೂ, ಅಪಾರ ಬೇಡಿಕೆಗೆ ಅನುಗುಣವಾಗಿ ಭಾರತೀಯ ಚಿತ್ರರಂಗದ ಬಹುಬೇಡಿಕೆ ತಾರೆ ಕಾರ್ಯಕ್ರಮದ ಹೊಸ ಸೀಸನ್ ಹೋಸ್ಟ್ ಮಾಡಲು ಮರಳಿದ್ದಾರೆ. 16ನೇ ಸೀಸನ್ ಸೋಮವಾರ ರಾತ್ರಿ 9 ಗಂಟೆಗೆ ಸೋನಿ ಎಂಟರ್‌ಟೈನ್‌ಮೆಂಟ್ ಟೆಲಿವಿಷನ್‌ನಲ್ಲಿ ಹಿರಿಯ ನಟನ ಭಾವುಕ ಭಾಷಣದೊಂದಿಗೆ ಆರಂಭವಾಯಿತು. ಈವರೆಗೆ ಸ್ವೀಕರಿಸಿದ ಅಭಿಮಾನಿಗಳ ಅಚಲ ಬೆಂಬಲಕ್ಕೆ ಅವರು ಧನ್ಯವಾದ ಅರ್ಪಿಸಿದರು.
ಅಮಿತಾಭ್ ಬಚ್ಚನ್ ಕೆಬಿಸಿ ಸೆಟ್‌ಗೆ ಎಂಟ್ರಿಯಾಗುತ್ತಿದ್ದಂತೆ ಅಲ್ಲಿದ್ದ ಪ್ರೇಕ್ಷಕರು ನಿರೂಪಕರಿಗೆ ಭರ್ಜರಿ ಚಪ್ಪಾಳೆ ತಟ್ಟಿದರು. ಸಿನಿಮಾ ಇಂಡಸ್ಟ್ರಿಯ ಐಕಾನ್ನನ್ನು ಆತ್ಮೀಯವಾಗಿ ಸ್ವಾಗತಿಸಿದರು. ನಂತರ ನಟ ತಮ್ಮ ಆಸನದಲ್ಲಿ ಕುಳಿತು ಕ್ಯಾಮರಾ ನೋಡುತ್ತಾ ಹಿಂದಿಯಲ್ಲಿ ಮಾತು ಪ್ರಾರಂಭಿಸಿದರು. "ಇಂದು ಹೊಸ ಸೀಸನ್ ಆರಂಭ. ಆದ್ರೆ ಇಂದು ಮಾತನಾಡಲು ಪದಗಳು ಸಿಗುತ್ತಿಲ್ಲ. ನಿಮ್ಮ ಪ್ರೀತಿ ವಿಶ್ವಾಸಕ್ಕೆ ಧನ್ಯವಾದಗಳನ್ನು ಅರ್ಪಿಸಲು ಪದಗಳಿಲ್ಲ" ಎಂದು ತಿಳಿಸಿದರು.
"ಕೌನ್ ಬನೇಗಾ ಕರೋಡ್ಪತಿ ಪುನರಾರಂಭವಾಗಿದ್ದು, ಈ ವೇದಿಕೆಯನ್ನು ಮತ್ತೊಮ್ಮೆ ಬೆಳಗಿಸಿದ, ಕುಟುಂಬವನ್ನು ಮತ್ತೆ ಒಂದುಗೂಡಿಸಿದ, ನಿಮ್ಮ ನಡುವೆ ಇರಲು ನನಗೆ ಅವಕಾಶ ಮಾಡಿಕೊಟ್ಟ ನಿಮ್ಮ ಆ ಪ್ರಾರ್ಥನೆಗಳಿಗೆ ನನ್ನ ಕೃತಜ್ಞತೆ ವ್ಯಕ್ತಪಡಿಸಲು ನನಗೆ ಪದಗಳ ಕೊರತೆಯಾಗಿದೆ. ಕೌನ್ ಬನೇಗಾ ಕರೋಡ್ಪತಿ ಕಾರ್ಯಕ್ರಮದ ಪುನರುತ್ಥಾನ, ಪುನರ್ ನಿರ್ಮಾಣ ಮತ್ತು ಪುನರ್ಜನ್ಮಕ್ಕಾಗಿ ನಾನು ಈ ದೇಶದ ಜನರಿಗೆ ವಂದಿಸುತ್ತೇನೆ'' ಎಂದು ಕ್ಯಾಮರಾ ಕಡೆಗೆ ತಿರುಗಿ ಕೈ ಜೋಡಿಸಿದರು.