'ಅನಿಮಲ್' ಸಿನಿಮಾದಲ್ಲಿ ಅಬ್ಬರಿಸಿರುವ ಬಾಲಿವುಡ್ ನಟ ಬಾಬಿ ಡಿಯೋಲ್ ದಕ್ಷಿಣ ಚಿತ್ರದಂಗದ ಸ್ಟಾರ್ ಡೈರೆಕ್ಟರ್ ಶಿವ ನಿರ್ದೇಶನದ ಬಹುನಿರೀಕ್ಷಿತ 'ಕಂಗುವ' ಚಿತ್ರದಲ್ಲಿ ಖಳನಾಯಕನಾಗಿ ಕಾಣಿಸಿಕೊಳ್ಳುವುದು ಖಚಿತವಾಗಿದೆ. ನಾಯಕ ನಟ ಸೂರ್ಯ ಮತ್ತು ಬಾಬಿ ಡಿಯೋಲ್ ಮುಖಾಮುಖಿಯಾಗಲಿದ್ದು, ಅದ್ಭುತ ದೃಶ್ಯಗಳನ್ನು ಪ್ರೇಕ್ಷಕರು ನಿರೀಕ್ಷಿಸಿದ್ದಾರೆ. ಪೋಸ್ಟ್-ಪ್ರೊಡಕ್ಷನ್ ಕೆಲಸ ಭರದಿಂದ ಸಾಗಿದೆ. ಚಿತ್ರದ ತೂಕ ಹೆಚ್ಚಿಸಿರುವ ಉಧಿರನ್ ಪಾತ್ರಧಾರಿ ಬಾಬಿ ಡಿಯೋಲ್ ಅವರಿಗೆ ಚಿತ್ರ ನಿರ್ಮಾಪಕರು ಕೃತಜ್ಞತೆ ಸಲ್ಲಿಸಿದ್ದಾರೆ.
ಕಂಗುವ ಹೆಸರಿನ ಎಕ್ಸ್ ಖಾತೆ, ನಿರ್ಮಾಪಕ ಕೆ.ಇ ಜ್ಞಾನವೆಲ್ ರಾಜ ಅವರು ನಟ ಬಾಬಿ ಡಿಯೋಲ್ಗೆ ಪುಷ್ಪಗುಚ್ಛವನ್ನು ನೀಡುತ್ತಿರುವ ಫೋಟೋವನ್ನು ಹಂಚಿಕೊಂಡಿದೆ. 'ಕಂಗುವ'ವನ್ನು ಭವ್ಯವಾಗಿಸಿದ್ದಕ್ಕಾಗಿ ನಟನಿಗೆ ಪ್ರೊಡಕ್ಷನ್ ಹೌಸ್ ಮೆಚ್ಚುಗೆ ವ್ಯಕ್ತಪಡಿದೆ. ಪೋಸ್ಟ್ನಲ್ಲಿ, "ನಮ್ಮ ಉಧಿರನ್ಗೆ ತುಂಬು ಹೃದಯದ ಧನ್ಯವಾಗಳು. ಬಾಬಿ ಡಿಯೋಲ್ ಸರ್ ಕಂಗುವವನ್ನು ಮತ್ತಷ್ಟು ವಿಶೇಷ ಮತ್ತು ಭವ್ಯವಾಗಿಸಿದ್ದಕ್ಕಾಗಿ ಕೃತಘ್ಞತೆಗಳು'' ಎಂದು ಬರೆದುಕೊಂಡಿದ್ದಾರೆ.
ಈ ಪೀರಿಯಾಡಿಕಲ್ ಡ್ರಾಮಾದಲ್ಲಿ ಸೌತ್ ಸೂಪರ್ ಸ್ಟಾರ್ ಸೂರ್ಯ ಮುಖ್ಯಭೂಮಿಕೆಯಲ್ಲಿದ್ದಾರೆ. ಬಾಲಿವುಡ್ ನಟಿ ದಿಶಾ ಪಟಾನಿ ನಾಯಕಿಯ ಪಾತ್ರ ನಿರ್ವಹಿಸಿದ್ದರೆ, ಬಾಬಿ ಡಿಯೋಲ್ ಖಳನಾಯಕನ ಪಾತ್ರ ವಹಿಸಿದ್ದಾರೆ. 2023ರ ಬ್ಲಾಕ್ಬಸ್ಟರ್ 'ಅನಿಮಲ್' ಸಿನಿಮಾದಲ್ಲೂ ಖಳನಾಯಕನ ಪಾತ್ರದಲ್ಲಿ ಅಬ್ಬರಿಸಿದ್ದರು. ಹೆಸರಾಂತ ನಟ ಸೂರ್ಯ ಅವರು ಈ ಕಥೆಯಲ್ಲಿ 5 ವಿಭಿನ್ನ ಪಾತ್ರಗಳನ್ನು ನಿರ್ವಹಿಸೋ ಮೂಲಕ ತಮ್ಮ ಬಹುಮುಖ ಪ್ರತಿಭೆಯನ್ನು ಮತ್ತೊಮ್ಮೆ ಪ್ರದರ್ಶಿಸಲು ಸಜ್ಜಾಗಿದ್ದಾರೆ. ಮೃಣಾಲ್ ಠಾಕೂರ್, ಯೋಗಿ ಬಾಬು, ಕೊವೈ ಸರಳ ಮತ್ತು ರೆಡಿನ್ ಕಿಂಗ್ಸ್ಲಿ ತಾರಾಗಣದಲ್ಲಿದ್ದಾರೆ.