ಬಾಲಿವುಡ್ ನಟಿ ಸೋನಾಕ್ಷಿ ಸಿನ್ಹಾ ಮತ್ತು ಜಹೀರ್ ಇಕ್ಬಾಲ್ ಮುಂಬೈನಲ್ಲಿ ಭಾನುವಾರ ದಾಂಪತ್ಯ ಜೀವನಕ್ಕೆ ಕಾಲಿಟ್ಟರು. ಏಳು ವರ್ಷಗಳಿಗೂ ಹೆಚ್ಚು ಕಾಲ ಡೇಟಿಂಗ್ ಮಾಡಿದ ನಂತರ ಮುಂಬೈನಲ್ಲಿ ಈ ಜೋಡಿ ತಮ್ಮ ಹತ್ತಿರದ ಸ್ನೇಹಿತರು ಮತ್ತು ಕುಟುಂಬದವರ ಸಮ್ಮುಖದಲ್ಲಿ ವಿವಾಹವಾದರು. ಇದೀಗ ಅವರ ಮದುವೆ ಮತ್ತು ಆರತಕ್ಷತೆಯ ವಿಡಿಯೋಗಳು ಮತ್ತು ಚಿತ್ರಗಳು ಅಂತರ್ಜಾಲದಲ್ಲಿ ವೈರಲ್ ಆಗಿದೆ. ಮೊದಲ ಡ್ಯಾನ್ಸ್ನ ವಿಡಿಯೋ ಭಾರಿ ಸದ್ದು ಮಾಡುತ್ತಿದೆ. ಬಾಲಿವುಡ್ ಸೆಲೆಬ್ರಿಟಿಗಳು ಮದುವೆ ಕಾರ್ಯಕ್ರಮದ ಮೆರಗನ್ನು ಮತ್ತಷ್ಟು ಹೆಚ್ಚಿಸಿದ್ದಾರೆ.
ದಬಾಂಗ್ ನಟಿ ತನ್ನ ಮದುವೆಯ ನಂತರ ಕಡುಗೆಂಪು ಬಣ್ಣದ ರೇಷ್ಮೆ ಸೀರೆಯನ್ನು ಧರಿಸಿ ಸಾರ್ವಜನಿಕವಾಗಿ ಕಾಣಿಸಿಕೊಂಡರು. ವರನು ಕೆನೆ ಬಣ್ಣದ ಶೇರ್ವಾನಿಯಲ್ಲಿ ಮಿಂಚಿದರು. ಮದುವೆಯ ಆರತಕ್ಷತೆಯಲ್ಲಿ, ಈ ಜೋಡಿ ಉತ್ಸಾಹದಿಂದ ಪತಿ, ಪತ್ನಿಯಾಗಿ ಫೋಟೋಗಳಿಗೆ ಪೋಸ್ ನೀಡಿದರು. ನಟಿ ತನ್ನ ಸೀರೆಯನ್ನು ಚೋಕರ್ - ಶೈಲಿಯ ಹಸಿರು ಮತ್ತು ಚಿನ್ನದ ನೆಕ್ಲೇಸ್, ಮ್ಯಾಚಿಂಗ್ ಡ್ರಾಪ್ ಕಿವಿಯೋಲೆಗಳು ಮತ್ತು ಕೆಂಪು ಬಳೆಗಳನ್ನು ಧರಿಸಿ ಗಮನ ಸೆಳೆದರು.
ಮತ್ತೊಂದೆಡೆ, ಜಹೀರ್ ಬಿಳಿ ಶೆರ್ವಾನಿಯಲ್ಲಿ ಕಾಣಿಕೊಂಡಿರುವುದು ವಿಶೇಷವಾಗಿತ್ತು. ಪತಿ ಜಹೀರ್ ಮತ್ತು ಪತ್ನಿ ಸೋನಾಕ್ಷಿ ಪಕ್ಕದಲ್ಲಿ ಬಂದು ನಿಂತಾಗ ಆರತಕ್ಷತೆಯ ವೇದಿಕೆಗೆ ಮತ್ತಷ್ಟು ಕಳೆ ಬಂದಿತು. ಔಪಚಾರಿಕ ಫೋಟೋ ಶೂಟ್ ನಂತರ, ನವವಿವಾಹಿತರು ಗ್ರೂಪ್ ಫೋಟೋಕ್ಕೆ ಪೋಸ್ ನೀಡಿದರು.