ಕನ್ನಡ ಚಿತ್ರರಂಗದಲ್ಲಿ ಸ್ಟಾರ್ ಹೀರೋಗಳು ವರ್ಷಕ್ಕೆ ಅಥವಾ ಎರಡು ವರ್ಷಕ್ಕೊಮ್ಮೆ ಸಿನಿಮಾ ಮಾಡುವುದರಿಂದ ಚಿತ್ರಮಂದಿರಗಳಿಗೆ ಸಿನಿಮಾ ಪ್ರೇಕ್ಷಕರು ಬರ್ತಿಲ್ಲ. ಹಾಗಾಗಿ ಚಿತ್ರರಂಗ ಸಾಕಷ್ಟು ಸಮಸ್ಯೆ ಎದುರಿಸುತ್ತಿದೆ. ಈ ಕುರಿತು ಕರ್ನಾಟಕ ಚಲನಚಿತ್ರ ವಾಣಿಜ್ಯ ಮಂಡಳಿಯಲ್ಲಿ ಸಭೆಗಳಾಗುತ್ತಿವೆ. ಸ್ಟಾರ್ ನಟರು ವರ್ಷಕ್ಕೆ ಒಂದು ಅಥವಾ ಎರಡು ಸಿನಿಮಾಗಳನ್ನು ಮಾಡುವಂತೆ ಕಲಾವಿದರ ಮನವೊಲಿಸಲು ವಾಣಿಜ್ಯ ಮಂಡಳಿ ಮುಂದಾಗುತ್ತಿದೆ.
ಈ ವಿಚಾರವಾಗಿ ಇತ್ತೀಚೆಗೆ ಪ್ರತಿಕ್ರಿಯಿಸಿರುವ ಕ್ರೇಜಿಸ್ಟಾರ್ ರವಿಚಂದ್ರನ್, ಕಲಾವಿದರ ಮೇಲೆ ಒತ್ತಡ ಹಾಕಬೇಡಿ. ಕಲಾವಿದರಿಗೆ ಅವರದ್ದೇ ಆದ ಬ್ರಾಂಡ್‍ ಇರುತ್ತದೆ. ಹೀಗಾಗಿ, ಯಾರನ್ನೂ ದೂಷಿಸಬೇಡಿ ಅಂತಾ ಹೇಳಿದ್ದಾರೆ. ದಿ ಜಡ್ಜ್ಮೆಂಟ್‍ ಚಿತ್ರದ ಸುದ್ದಿಗೋಷ್ಠಿಯ ನಂತರ ರವಿಚಂದ್ರನ್, ಚಿತ್ರರಂಗಕ್ಕೆ ಸಂಬಂಧಪಟ್ಟ ಹಲವು ವಿಷಯಗಳ ಬಗ್ಗೆ ಮಾತನಾಡಿದರು.
ಚಿತ್ರಮಂದಿರದವರಿಗೆ ಒಳ್ಳೆಯ ಸಿನಿಮಾಗಳು ಬೇಕು. ಮಾತೆತ್ತಿದರೆ ಮಲಯಾಳಂ ಸಿನಿಮಾ ನೋಡಿ ಅಂತಾರೆ. ಹೋಗಿ ಮಲಯಾಳಂ ಬರಹಗಾರರ ಹತ್ತಿರ, ಕಥೆ ಬರೆಸಿಕೊಂಡು ಬನ್ನಿ. ಯಾರು ಬೇಡ ಎನ್ನುತ್ತಾರೆ?. ಕಥೆ ಮುಖ್ಯ. ಎಲ್ಲಿ ಸಿಕ್ಕರೆ ಏನು? ಅಲ್ಲಿಂದ ಕಥೆ ಮಾಡಿಸಿಕೊಂಡು ಬಂದು ಇಲ್ಲಿ ಚಿತ್ರ ಮಾಡಿ. ಜನ ಸಿನಿಮಾಗೆ ಬರುತ್ತಿಲ್ಲ ಎನ್ನುವುದು ತಪ್ಪು. ಮೊದಲು ಕಂಟೆಂಟ್ ಇರುವ ಸಿನಿಮಾ ಮಾಡಿ. ಸಿನಿಮಾ ಮಾಡದೇ ಬನ್ನಿ ಬನ್ನಿ ಎಂದರೆ ಏನು ಪ್ರಯೋಜನ?. ಜನ ಚೆನ್ನಾಗಿರುವ ಸಿನಿಮಾಗೆ ಯಾವತ್ತೂ ಕೈ ಬಿಟ್ಟಿಲ್ಲ ಎಂದು ರವಿಚಂದ್ರನ್ ಹೇಳಿದರು.