ತಮಿಳಿನ ಬಹುಬೇಡಿಕೆ ನಟ ಚಿಯಾನ್ ವಿಕ್ರಮ್ ಮುಖ್ಯಭೂಮಿಕೆಯ ಮುಂದಿನ ಬಹುನಿರೀಕ್ಷಿತ ಚಿತ್ರ 'ತಂಗಲಾನ್'. ಆ್ಯಕ್ಷನ್ ಡ್ರಾಮಾದ ಟ್ರೇಲರ್ ರಿಲೀಸ್ ಡೇಟ್ ಘೋಷಣೆಯಾಗಿದೆ. ಪಾ ರಂಜಿತ್ ಆ್ಯಕ್ಷನ್ ಕಟ್ ಹೇಳಿರುವ ಈ ಚಿತ್ರದ ಟ್ರೇಲರ್ ಅನ್ನು ಇದೇ ಜುಲೈ 10ರಂದು ಅಂದರೆ ನಾಳೆ ಬಿಡುಗಡೆಗೊಳಿಸಲು ನಿರ್ಧರಿಸಲಾಗಿದೆ. ಅಧಿಕೃತ ಘೋಷಣೆಯಾಗದಿದ್ದರೂ 'ತಂಗಲಾನ್' ಆಗಸ್ಟ್‌ನಲ್ಲಿ ಚಿತ್ರಮಂದಿರ ಪ್ರವೇಶಿಸಲು ಸಜ್ಜಾಗುತ್ತಿದೆ ಎಂದು ವರದಿಗಳು ಸೂಚಿಸಿವೆ.
ಚಿತ್ರನಿರ್ಮಾಪಕರು ಅಧಿಕೃತ ಎಕ್ಸ್ ಖಾತೆಯಲ್ಲಿ 'ತಂಗಲಾನ್'ನ ಹೊಸ ಪೋಸ್ಟರ್ ಅನಾವರಣಗೊಳಿಸಿ ಟ್ರೇಲರ್ ಬಿಡುಗಡೆ ದಿನಾಂಕವನ್ನು ಘೋಷಿಸಿದ್ದಾರೆ. ಪೋಸ್ಟರ್‌ನಲ್ಲಿ, ಕೋಲಾರ ಚಿನ್ನದ ಗಣಿ (ಕೆಜಿಎಫ್) ಬಳಿ ಸಹ ಕಾರ್ಮಿಕರ ನಡುವೆ ಚಿಯಾನ್ ವಿಕ್ರಮ್ ಅವರನ್ನು ಕಾಣಬಹುದು. ಪೋಸ್ಟ್‌ಗೆ "ದಬ್ಬಾಳಿಕೆ, ಶೌರ್ಯ ಮತ್ತು ವಿಜಯಗಳ ಯುಗ. ತಂಗಲಾನ್ ಟ್ರೇಲರ್ ಜುಲೈ 10ರಂದು ಬಿಡುಗಡೆ" ಎಂದು ಕ್ಯಾಪ್ಷನ್ ಕೊಡಲಾಗಿದೆ.
ಆರಂಭದಲ್ಲಿ ಈ ಚಿತ್ರವನ್ನು 2024ರ ಜನವರಿಗೆ ಬಿಡುಗಡೆ ಮಾಡಲು ಚಿತ್ರತಂಡ ಪ್ಲ್ಯಾನ್ ಹಾಕಿಕೊಂಡಿತ್ತು. ಆದರೆ ಕಾರಣಾಂತರಗಳಿಂದ ಸಿನಿಮಾ ಕೆಲವು ಬಾರಿ ವಿಳಂಬ ಎದುರಿಸಿದ್ದು, ಸದ್ಯ ಆಗಸ್ಟ್ 15ಕ್ಕೆ ಬಿಡುಗಡೆಗೊಳ್ಳಲು ಎದುರು ನೋಡುತ್ತಿದೆ. ಟ್ರೇಲರ್ ರಿಲೀಸ್ ಜೊತೆಗೆ ಸಿನಿಮಾದ ಬಿಡುಗಡೆ ದಿನಾಂಕವನ್ನು ಅಧಿಕೃತವಾಗಿ ಘೋಷಿಸುವ ನಿರೀಕ್ಷೆಯಿದೆ.
ಜಿಯೋ ಸ್ಟುಡಿಯೋಸ್, ಸ್ಟುಡಿಯೋ ಗ್ರೀನ್ ಮತ್ತು ನೀಲಂ ಪ್ರೊಡಕ್ಷನ್ಸ್ ಸೇರಿ ನಿರ್ಮಾಣ ಮಾಡಿರುವ ತಂಗಲಾನ್ನಲ್ಲಿ ಚಿಯಾನ್ ವಿಕ್ರಮ್ ಜೊತೆ ಮಾಳವಿಕಾ ಮೋಹನನ್, ಪಾರ್ವತಿ, ಪಶುಪತಿ, ಡೇನಿಯಲ್ ಕಾಲ್ಟಗಿರೋನ್, ಅರ್ಜುನ್ ಅನ್ಬುದನ್, ಸಂಪತ್ ರಾಮ್ ಪೋಷಕ ಪಾತ್ರಗಳನ್ನು ನಿರ್ವಹಿಸಿದ್ದಾರೆ.