'ಗೆಲುವು ನಿನ್ನದು, ಖುಷಿ ನನ್ನದು, ಇದು ದೋಸ್ತಿ ಗೆಲುವು': ಹನುಮಂತು ವಿಜಯವನ್ನು ಸಂಭ್ರಮಿಸಿದ ಧನರಾಜ್​​

''ದೋಸ್ತಾ ನೀ ಮಸ್ತಾ. ಗೆಲುವು ನಿನ್ನದು, ಖುಷಿ ನನ್ನದು, ಇದು ದೋಸ್ತಿ ಗೆಲುವು ದೋಸ್ತಾ. ಇರು ನೀ ಜೊತೆಗಿರು ಎಂದೆಂದಿಗೂ'' - ಧನರಾಜ್ ಆಚಾರ್​.

ಬಿಗ್​ ಬಾಸ್​. ಇದು ವ್ಯಕ್ತಿತ್ವಗಳ ಅನಾವರಣ. ಬಿಗ್​ ಬಾಸ್​​ ಅನ್ನೋದೇ ಒಂದು ಎಮೋಷನ್​​. ಒಂದೊಳ್ಳೆ ವ್ಯಕ್ತಿತ್ವದ ಗೆಲುವು ನಿರ್ಧರಿಸೋದು ಪ್ರೇಕ್ಷಕರು. ಅದರಂತೆ ಅಪಾರ ಸಂಖ್ಯೆಯ ಅಭಿಮಾನಿಗಳನ್ನು ಸಂಪಾದಿಸಿರೋ ಕನ್ನಡ ಕಿರುತೆರೆಯ ಅತ್ಯಂತ ಜನಪ್ರಿಯ ಕಾರ್ಯಕ್ರಮ 'ಬಿಗ್​ ಬಾಸ್ ಸೀಸನ್​​ 11'ನ್ನು ಗ್ರಾಮೀಣ ಪ್ರತಿಭೆ ಹನುಮಂತು ಗೆದ್ದುಕೊಂಡಿದ್ದಾರೆ. ಅಭಿನಯ ಚಕ್ರವರ್ತಿ ಸುದೀಪ್​ ನಿರೂಪಣೆಯ ಕೊನೆ ಸೀಸನ್​ನಲ್ಲಿ ಹೈಳ್ಳಿ ಹೈದ ಗೆಲುವಿನ ನಗೆ ಬೀರಿದ್ದು, ತಾನೇ ಗೆದ್ದಂತೆ ಸಂಭ್ರಮಾಚರಣೆ ಮಾಡಿದ್ದಾರೆ ಅಪ್ಪಟ ದೋಸ್ತ್​.

ಬಿಗ್​ ಬಾಸ್​​ ವಿವಿಧ ಭಾಷೆಗಳಲ್ಲಿ ಪ್ರಸಾರ ಕಾಣುತ್ತದೆ. ಈ ರಿಯಾಲಿಟಿ ಶೋನಲ್ಲಿ ಸ್ನೇಹ, ಪ್ರೀತಿ ಸಹಜ. ಅದರಂತೆ ಕನ್ನಡದ ಬಿಗ್​ ಬಾಸ್​ 11ರಲ್ಲೂ ಗಮನ ಸೆಳೆದಿದ್ದು ಹನುಮಂತು ಮತ್ತು ಧನರಾಜ್​ ಆಚಾರ್​ ಅವರ ನಿಷ್ಕಲ್ಮಶ ಸ್ನೇಹ. ಇಡೀ ಸೀಸನ್​​ನಲ್ಲಿ ಈ ಫ್ರೆಂಡ್​ಶಿಪ್​​ ಹೈಲೆಟ್​ ಆಗಿತ್ತು. ನಿರೂಪಕ ಕಿಚ್ಚ ಸುದೀಪ್​ ಅವರ ಮೆಚ್ಚುಗೆಯನ್ನೂ ಸ್ವೀಕರಿಸಿತ್ತು. ಇದೀಗ ತನ್ನ ಗೆಳೆಯನ ಗೆಲುವನ್ನು ತಾನೇ ಗೆದ್ದಷ್ಟು ಸಂಭ್ರಮಿಸಿದ್ದಾರೆ ಧನರಾಜ್​ ಆಚಾರ್​.

ಹೌದು, ಇಂದು ತಮ್ಮ ಅಧಿಕೃತ ಇನ್​​ಸ್ಟಾಗ್ರಾಮ್​ನಲ್ಲಿ ಧನರಾಜ್​ ಆಚಾರ್​ ಪೋಸ್ಟ್ ಒಂದನ್ನು ಹಂಚಿಕೊಂಡಿದ್ದಾರೆ. ವಿನ್ನರ್​ ಹನುಮಂತು ಅವರೊಂದಿಗೆ ಇರೋ ಫೋಟೋ ಹಂಚಿಕೊಂಡ ಅವರು, ''ದೋಸ್ತಾ ನೀ ಮಸ್ತಾ. ಗೆಲುವು ನಿನ್ನದು, ಖುಷಿ ನನ್ನದು, ಇದು ದೋಸ್ತಿ ಗೆಲುವು ದೋಸ್ತಾ. ಇರು ನೀ ಜೊತೆಗಿರು ಎಂದೆಂದಿಗೂ'' ಎಂದು ಬರೆದುಕೊಂಡಿದ್ದಾರೆ.

ಇದನ್ನೂ ಓದಿ:'ಸುದೀಪ್​ ವಿಶೇಷ ಉಡುಗೊರೆಗೆ ಬೆಲೆ ಕಟ್ಟೋಕ್ಕಾಗಲ್ಲ' - ಬಾಲ ಕಲಾವಿದನ ಮನದಾಳ

ಈ ಪೋಸ್ಟ್​ಗೆ ನೆಟ್ಟಿಗರು ತಮ್ಮ ಅಭಿಪ್ರಾಯ ವ್ಯಕ್ತಪಡಿಸುತ್ತಿದ್ದಾರೆ. ಸಾಮಾಜಿಕ ಜಾಲತಾಣ ಬಳಕೆದಾರರೊಬ್ಬರು 'ದೋಸ್ತ ನೀನು ನನ್ನ ಪ್ರಾಣ ಕಣೋ' ಎಂದು ಬರೆದುಕೊಂಡಿದ್ದಾರೆ. ಇದು ಕಾರ್ಯಕ್ರಮದಲ್ಲಿ ಸ್ವತಃ ಧನರಾಜ್​ ಅವರೇ ಹೇಳಿದ್ದಾಗಿದೆ. ಮತ್ತೋರ್ವರು ಪ್ರತಿಕ್ರಿಯಿಸಿ, 'ಹನುಮಂತನಿಗಿಂತ ನೀನೇ ಜಾಸ್ತಿ ಖುಷಿ ಆಗಿದೀಯಲೋ ದೋಸ್ತಾ' ಎಂದು ತಿಳಿಸಿದ್ದಾರೆ. ಸೂಪರ್​ ಜೋಡಿ, ದೋಸ್ತ, ಧನು ಹನು ಎಂದೆಲ್ಲಾ ಕಾಮೆಂಟ್​ಗಳು (ಹಾರ್ಟ್, ಲವ್​ ಎಮೋಜಿಯೊಂದಿಗೆ) ಹರಿದು ಬರುತ್ತಿವೆ.

ಇದನ್ನೂ ಓದಿ:ಪ್ರೀತಿ ಖಚಿತಪಡಿಸಿದ ರಶ್ಮಿಕಾ ಮಂದಣ್ಣ : ತಾವು ಆಕರ್ಷಿತರಾಗುವ ಗುಣ ಬಹಿರಂಗಪಡಿಸಿದ ನಟಿ

ಸೀಸನ್​ 11 ಆರಂಭವಾದಾಗಲೇ ಯೂಟ್ಯೂಬರ್​ ಧನರಾಜ್​ ಆಚಾರ್​ ಬಿಗ್​ ಬಾಸ್ ಮನೆ ಪ್ರವೇಶಿಸಿದ್ದರು. ​​ನಾಲ್ಕನೇ ವಾರದ ಹೊತ್ತಿಗೆ ಹನುಮಂತು ಅವರು ವೈಲ್ಡ್​ ಕಾರ್ಡ್ ಮೂಲಕ ಬಿಗ್​ ಹೌಸ್​ಗೆ ಎಂಟ್ರಿ ಕೊಟ್ರು. ಈ ಇಬ್ಬರ ಸ್ನೇಹ ದಿನದಿಂದ ದಿನಕ್ಕೆ ಗಟ್ಟಿಯಾಗುತ್ತಾ ಹೋಯ್ತು. ಸದ್ಯ ಪ್ರಾಣಕ್ಕೆ ಪ್ರಾಣ ಕೊಡೋ ಸ್ನೇಹಿತರಾಗಿ ಗುರುತಿಸಿಕೊಂಡಿದ್ದಾರೆ. ಇದೀಗ ಹನುಮಂತುವಿನ ಗೆಲುವನ್ನು ಧನರಾಜ್​ ಸಂಭ್ರಮಿಸಿರೋದು ಅಭಿಮಾನಿಗಳಿಂದ ಮತ್ತಷ್ಟು ಪ್ರೀತಿ ಸಂಪಾದಿಸಿದೆ.