ಅಕ್ಷಯ್ ಕುಮಾರ್, ಬಾಲಿವುಡ್ನ ಬಹುಬೇಡಿಕೆ ನಟ. 'ಸರ್ಫಿರಾ' ಚಿತ್ರದ ನಂತರ 'ಖೇಲ್ ಖೇಲ್ ಮೇ' ಬಿಡುಗಡೆಗೆ ಅವರು ಸಜ್ಜಾಗಿದ್ದಾರೆ. ನಿರ್ಮಾಪಕರಿಂದು ಚಿತ್ರದ ಹೊಸ ಹಾಡು 'ಹೌಲಿ ಹೌಲಿ'ಯನ್ನು ಅನಾವರಣಗೊಳಿಸಲಿದ್ದಾರೆ.
ಹಾಡಿನ ಬಿಡುಗಡೆಗೂ ಮುನ್ನ ಅಕ್ಷಯ್ ಕುಮಾರ್ ಹಾಡಿನ ಚಿತ್ರೀಕರಣದ ಒಂದು ನೋಟವನ್ನು ಹಂಚಿಕೊಂಡಿದ್ದಾರೆ. ವಿಡಿಯೋ ಸಾಕಷ್ಟು ಮನರಂಜನಾತ್ಮಕವಾಗಿದ್ದು, ಸೋಷಿಯಲ್ ಮೀಡಿಯಾದಲ್ಲಿ ವ್ಯಾಪಕವಾಗಿ ವೈರಲ್ ಆಗಿದೆ.
ಅಕ್ಷಯ್ ಕುಮಾರ್ ಅತ್ಯುತ್ತಮ ಅಭಿನಯದ ಹೊರತಾಗಿ ಸ್ಟಂಟ್, ಫಿಟ್ನೆಸ್ ಜೊತೆಗೆ ತಮ್ಮ ಮೋಜು ಮಸ್ತಿಗೂ ಹೆಸರುವಾಸಿಯಾಗಿದ್ದಾರೆ. ಇಂದು 'ಹೌಲಿ ಹೌಲಿ'ಗೆ ಸಂಬಂಧಿಸಿದ ವಿಡಿಯೋವೊಂದನ್ನು ಪೋಸ್ಟ್ ಮಾಡಿದ್ದಾರೆ. ಅಕ್ಷಯ್ ಕುಮಾರ್ ಜೊತೆಗೆ ವಾಣಿ ಕಪೂರ್, ತಾಪ್ಸಿ ಪನ್ನು ಸೇರಿದಂತೆ ಇತರ ಪಾತ್ರವರ್ಗದ ಸದಸ್ಯರು ಕಾಣಿಸಿಕೊಂಡಿದ್ದಾರೆ. ಎಲ್ಲರೂ ಹಾಡಿನ ಬೀಟ್ಸ್ಗೆ ಹೆಜ್ಜೆ ಹಾಕುತ್ತಿರುವುದನ್ನು ಕಾಣಬಹುದು. ಆದರೆ, ಅಕ್ಷಯ್ ಇದ್ದಕ್ಕಿದ್ದಂತೆ ಬಿದ್ದಂತೆ ವರ್ತಿಸಿದ್ದಾರೆ. ನೆಲದ ಮೇಲೆ ಮಲಗಿ ನಾಗಿನ್ ಸ್ಟೆಪ್ ಹಾಕಿದ್ದಾರೆ. ನಟನ ಮೋಜು ಕಂಡು ಎಲ್ಲರೂ ನಗೆಗಡಲಿನಲ್ಲಿ ತೇಲಿದ್ದಾರೆ.
ತಮ್ಮ ಅಧಿಕೃತ ಇನ್ಸ್ಟಾಗ್ರಾಮ್ನಲ್ಲಿ ವಿಡಿಯೋ ಹಂಚಿಕೊಂಡ ಅಕ್ಷಯ್ ಕುಮಾರ್, ''ಪರಿಶ್ರಮ, ನಗು ಮತ್ತು ಇಡೀ ಚಿತ್ರತಂಡದ ಪ್ರೀತಿ. ಇದೆಲ್ಲವನ್ನು ಸಂಗ್ರಹಿಸಿ ನಿಮಗೆ ಒಪ್ಪಿಸುತ್ತಿದ್ದೇನೆ. ಇಂದು! ಶೀಘ್ರದಲ್ಲೇ ಬರಲಿದೆ. ಟ್ರೇಲರ್ಗೂ ಮೊದಲು ಗಾನಾ ಬಜಾವೋ. ಸಂಜೆ ಹೌಲಿ ಹೌಲಿ ಹಾಡು ಬಿಡುಗಡೆ'' ಎಂದು ಬರೆದುಕೊಂಡಿದ್ದಾರೆ.
ಇದನ್ನೂ ಓದಿ:ಬುಡಕಟ್ಟು ಜನಾಂಗದವರೊಂದಿಗೆ ಕುಣಿದು ಸಂಭ್ರಮಿಸಿದ ದುನಿಯಾ ವಿಜಯ್: ವಿಡಿಯೋ - Bheema Promotion
'ಖೇಲ್ ಖೇಲ್ ಮೇ' ಒಂದು ಕಾಮಿಡಿ ಡ್ರಾಮಾವಾಗಿದ್ದು, ಮುದಸ್ಸರ್ ಅಝೀಝ್ ನಿರ್ದೇಶಿಸಿದ್ದಾರೆ. ಭೂಷಣ್ ಕುಮಾರ್, ಕೃಷ್ಣ ಕುಮಾರ್, ವಿಪುಲ್ ಡಿ ಶಾ, ಅಶ್ವಿನ್ ವರ್ದೆ, ರಾಜೇಶ್ ಬಹ್ಲ್, ಶಶಿಕಾಂತ್ ಸಿನ್ಹಾ ಮತ್ತು ಅಜಯ್ ರೈ ಸೇರಿ ಈ ಚಿತ್ರವನ್ನು ನಿರ್ಮಿಸಿದ್ದಾರೆ. ಅಕ್ಷಯ್ ಕುಮಾರ್, ವಾಣಿ ಕಪೂರ್, ತಾಪ್ಸಿ ಪನ್ನು, ಆ್ಯಮಿ ವಿರ್ಕ್, ಆದಿತ್ಯ ಸೀಲ್ ಮತ್ತು ಪ್ರಜ್ಞಾ ಜೈಸ್ವಾಲ್ ಈ ಚಿತ್ರದಲ್ಲಿ ಪ್ರಮುಖ ಪಾತ್ರಗಳನ್ನು ನಿರ್ವಹಿಸಿದ್ದಾರೆ. ಸಿನಿಮಾ ಆಗಸ್ಟ್ 15, ಸ್ವಾತಂತ್ರ್ಯ ದಿನಾಚರಣೆಯಂದು ಚಿತ್ರಮಂದಿರ ಪ್ರವೇಶಿಸಲಿದೆ.
ಇದನ್ನೂ ಓದಿ:ಲಂಡನ್ನಿಂದ ವಾಪಸ್ ಆದ ಶಾರುಖ್ ಖಾನ್ ಕುಟುಂಬ: ವಿಡಿಯೋ ನೋಡಿ - SRK Family
ಜುಲೈ 12ರಂದು ಅಕ್ಷಯ್ ಕುಮಾರ್ ಮುಖ್ಯಭೂಮಿಕೆಯ 'ಸರ್ಫಿರಾ' ಸಿನಿಮಾ, ಸೌತ್ ಸೂಪರ್ ಸ್ಟಾರ್ ಕಮಲ್ ಹಾಸನ್ ನಟನೆಯ 'ಇಂಡಿಯನ್ 2' ಜೊತೆಗೇ ಬಿಡುಗಡೆ ಆಯಿತು. ಬಹುನಿರೀಕ್ಷೆಗಳ ನಡುವೆ ತೆರೆಕಂಡ 'ಸರ್ಫಿರಾ' ಮಿಶ್ರ ಪ್ರತಿಕ್ರಿಯೆ ಜೊತೆಗೆ, ಬಾಕ್ಸ್ ಆಫೀಸ್ನಲ್ಲೂ ತೀವ್ರ ಪೈಪೋಟಿ ಎದುರಿಸಿತು. ಒಂದು ಕಾಲದಲ್ಲಿ ಸೂಪರ್ ಹಿಟ್ ಚಿತ್ರಗಳನ್ನೇ ಕೊಟ್ಟ ಅಕ್ಷಯ್, ಸಿನಿಮಾ ಯಶಸ್ಸಿನ ವಿಚಾರದಲ್ಲಿ ಇತ್ತೀಚಿನ ದಿನಗಳಲ್ಲಿ ಕೊಂಚ ಏರಿಳಿತಗಳನ್ನು ಕಾಣುತ್ತಿದ್ದಾರೆ. ಇದೀಗ ಬಿಡುಗಡೆಗೆ ಎದುರು ನೋಡುತ್ತಿರುವ 'ಖೇಲ್ ಖೇಲ್ ಮೇ' ಮೇಲೆ ಸಾಕಷ್ಟು ನಿರೀಕ್ಷೆಗಳಿದ್ದು, ಸಿನಿಮಾ ಎಷ್ಟರ ಮಟ್ಟಿಗೆ ಗೆಲ್ಲಲಿದೆ ಅನ್ನೋದನ್ನು ಕಾದು ನೋಡಬೇಕಿದೆ.
