ನವದೆಹಲಿ: ಜನವರಿ-ಮಾರ್ಚ್ ತ್ರೈಮಾಸಿಕದಲ್ಲಿ ಭಾರತದ ಸ್ಮಾರ್ಟ್ಫೋನ್ ಮಾರುಕಟ್ಟೆಯು ಸಂಖ್ಯಾ ದೃಷ್ಟಿಯಿಂದ ದಾಖಲೆಯ ಶೇಕಡಾ 8 ರಷ್ಟು (ವರ್ಷದಿಂದ ವರ್ಷಕ್ಕೆ) ಮತ್ತು ಮೌಲ್ಯದ ದೃಷ್ಟಿಯಿಂದ ಶೇಕಡಾ 18 ರಷ್ಟು ಬೆಳವಣಿಗೆ ಸಾಧಿಸಿದೆ ಎಂದು ವರದಿಯೊಂದು ಗುರುವಾರ ತಿಳಿಸಿದೆ. ಎಲ್ಲಾ ಶ್ರೇಣಿಯ ಗ್ರಾಹಕರು ಪ್ರಸ್ತುತ ಬಳಸುತ್ತಿರುವುದಕ್ಕಿಂತರ ಹೆಚ್ಚಿನ ಬೆಲೆಯ ಸ್ಮಾರ್ಟ್ಪೋನ್ಗಳನ್ನು ಖರೀದಿಸುತ್ತಿರುವುದು ಈ ಬೆಳವಣಿಗೆಗೆ ಪ್ರಮುಖ ಕಾರಣವಾಗಿದೆ.
ಕೌಂಟರ್ ಪಾಯಿಂಟ್ ರಿಸರ್ಚ್ ಪ್ರಕಾರ, ಸ್ಮಾರ್ಟ್ಪೋನ್ ಮಾರುಕಟ್ಟೆಯಲ್ಲಿ 5ಜಿ ಸ್ಮಾರ್ಟ್ಪೋನ್ಗಳ ಪಾಲು ಗರಿಷ್ಠ ಶೇಕಡಾ 71 ರಷ್ಟಿದೆ. ಪ್ರೀಮಿಯಂ ವಿಭಾಗದ ಪೋನ್ಗಳು ಸಂಖ್ಯಾದೃಷ್ಟಿಯಿಂದ ಶೇಕಡಾ 20 ರಷ್ಟು ಪಾಲು ಹೊಂದಿದ್ದು, ಹಿಂದೆಂದಿಗಿಂತಲೂ ಅತ್ಯಧಿಕವಾಗಿದೆ ಮತ್ತು ಮೌಲ್ಯದ ದೃಷ್ಟಿಯಿಂದ ದೇಶದ ಒಟ್ಟಾರೆ ಸ್ಮಾರ್ಟ್ಫೋನ್ ಮಾರುಕಟ್ಟೆಯಲ್ಲಿ ಶೇಕಡಾ 51 ರಷ್ಟು ಪಾಲು ಪಡೆದುಕೊಂಡಿವೆ.
ಸದ್ಯ ಮಧ್ಯಮ ಶ್ರೇಣಿಯ ಮೂರನೇ ಒಂದು ಭಾಗದಷ್ಟು ಸ್ಮಾರ್ಟ್ಫೋನ್ ಬಳಕೆದಾರರು ತಾವು ಮುಂದಿನ ಬಾರಿ ಪ್ರೀಮಿಯಂ ಸ್ಮಾರ್ಟ್ಫೋನ್ ಕೊಳ್ಳಲು ಸಿದ್ಧರಾಗಿದ್ದಾರೆ ಎಂದು ವರದಿ ಹೇಳಿದೆ.
"ಭಾರತದ ಸ್ಮಾರ್ಟ್ಪೋನ್ ಮಾರುಕಟ್ಟೆಯು ಈ ತ್ರೈಮಾಸಿಕದಲ್ಲಿ ಅತ್ಯಧಿಕ ಬೆಳವಣಿಗೆ ಕಂಡಿದೆ. ಮುಖ್ಯವಾಗಿ ಪ್ರೀಮಿಯಂ ಫೋನ್ಗಳ ಮಾರಾಟ ಹೆಚ್ಚಳದಿಂದ ಈ ಬೆಳವಣಿಗೆ ಸಾಧ್ಯವಾಗಿದೆ. ಕೈಗೆಟುಕುವ ಹಣಕಾಸು ಸಾಲ ಯೋಜನೆಗಳು, ಹಳೆಯ ಫೋನಿಗೆ ಉತ್ತಮ ಬೆಲೆ ಮತ್ತು ಆಫರ್ಗಳು, ಜೊತೆಗೆ ಎಐ, ಗೇಮಿಂಗ್ ಮತ್ತು ಇಮೇಜಿಂಗ್ ಸುಧಾರಣೆಯಂಥ ಉನ್ನತ ಶ್ರೇಣಿಯ ವೈಶಿಷ್ಟ್ಯಗಳಿಗೆ ಬೇಡಿಕೆ ಉಂಟಾಗಿರುವುದು ಕೂಡ ಸ್ಮಾರ್ಟ್ಪೋನ್ ಮಾರುಕಟ್ಟೆಯ ಬೆಳವಣಿಗೆಗೆ ಕಾರಣವಾಗಿವೆ" ಎಂದು ಹಿರಿಯ ಸಂಶೋಧನಾ ವಿಶ್ಲೇಷಕಿ ಶಿಲ್ಪಿ ಜೈನ್ ಹೇಳಿದ್ದಾರೆ.
ಸಂಖ್ಯಾದೃಷ್ಟಿಯಿಂದ ಇದೇ ಮೊದಲ ಬಾರಿಗೆ ವಿವೋ ಯಾವುದೇ ಒಂದು ತ್ರೈಮಾಸಿಕದಲ್ಲಿ ಅತ್ಯಧಿಕ ಮಾರುಕಟ್ಟೆ ಪಾಲು ಪಡೆದುಕೊಂಡಿದೆ. ಒಟ್ಟು ಮಾರುಕಟ್ಟೆ ಮೌಲ್ಯದ ದೃಷ್ಟಿಯಿಂದ ನಾಲ್ಕನೇ ಒಂದು ಭಾಗದಷ್ಟು ಪಾಲು ಪಡೆದ ಸ್ಯಾಮ್ಸಂಗ್ ಈ ವಿಭಾಗದಲ್ಲಿ ಅಗ್ರಸ್ಥಾನದಲ್ಲಿದೆ. ಸ್ಯಾಮ್ ಸಂಗ್ನ ಸರಾಸರಿ ಮಾರಾಟ ಬೆಲೆ (ಎಎಸ್ಪಿ) ಭಾರತದಲ್ಲಿ ಇದುವರೆಗಿನ ಗರಿಷ್ಠ ಮಟ್ಟವನ್ನು ತಲುಪಿದೆ.
ಪ್ರೀಮಿಯಂ ಫೋನ್ಗಳ ಮಾರಾಟದಲ್ಲಿ ಹೆಚ್ಚಳ, 5ಜಿ ನೆಟ್ವರ್ಕ್ನ ಬಳಕೆ ಹೆಚ್ಚಳ ಮತ್ತು ಕೋವಿಡ್ ನಂತರ ಹೊಸ ಫೋನ್ಗಳ ಕೊಲ್ಳುವಿಕೆಗಳ ಕಾರಣದಿಂದ 2024 ರಲ್ಲಿ ಭಾರತದ ಸ್ಮಾರ್ಟ್ಪೋನ್ ಮಾರುಕಟ್ಟೆ ಏಕ ಅಂಕಿಯಲ್ಲಿ ಬೆಳೆಯುತ್ತದೆ ಎಂದು ನಾವು ನಿರೀಕ್ಷಿಸುತ್ತೇವೆ ಎಂದು ವರದಿ ಹೇಳಿದೆ.
ಇದನ್ನೂ ಓದಿ : 2022ರಲ್ಲಿ ಭಾರತಕ್ಕೆ ವಿದೇಶಗಳಿಂದ 111 ಶತಕೋಟಿ ಡಾಲರ್ ಹಣ ವರ್ಗಾವಣೆ: ವಿಶ್ವದಲ್ಲೇ ಇದು ಅತ್ಯಧಿಕ - Foreign Remittances
