ಮುಂಬೈ, ಮಹಾರಾಷ್ಟ್ರ: ಸಂವತ್ 2081ರ ಶುಭ ಸಂದರ್ಭದಲ್ಲಿ ಶುಕ್ರವಾರ ಮುಂಬೈ ಷೇರುಪೇಟೆಯಲ್ಲಿ ಮುಹೂರ್ತದ ವಹಿವಾಟು ನಡೆಯಿತು. ಈ ಮುಂಚೆ ಸತತ ಎರಡು ದಿನಗಳ ನಷ್ಟದಲ್ಲಿದ್ದ ಷೇರು ಮಾರುಕಟ್ಟೆಗಳು ಶುಕ್ರವಾರದ ಶುಭ ಮುಹೂರ್ತದಲ್ಲಿ ಭಾರಿ ಏರಿಕೆ ಕಾಣುವ ಮೂಲಕ ಷೇರುದಾರರಲ್ಲಿ ದೀಪಾವಳಿಯ ಭರವಸೆಯ ಬೆಳಕು ಮೂಡಿಸಿತು. ಸತತ ಕುಸಿತದ ಬಳಿಕ ಸೆನ್ಸೆಕ್ಸ್ 355 ಅಂಕಗಳ ಏರಿಕೆ ಮೂಲಕ ಹೂಡಿಕೆದಾರರು ಪಟಾಕಿ ಸಿಡಿಸಿ ಸಂಭ್ರಮಿಸುವಂತೆ ಮಾಡಿತು.
ಒಂದು ಗಂಟೆಯ ಮುಹೂರ್ತದ ಷೇರು ವ್ಯವಹಾರದ ಮುಕ್ತಾಯದ ವೇಳೆಗೆ, ಸೆನ್ಸೆಕ್ಸ್ 335 ಪಾಯಿಂಟ್ ಅಥವಾ ಶೇಕಡಾ 0.42 ರಷ್ಟು ಏರಿಕೆಯಾಗಿ 79,724 ಕ್ಕೆ ಮತ್ತು ನಿಫ್ಟಿ 99 ಪಾಯಿಂಟ್ ಅಥವಾ 0.41 ರಷ್ಟು ಏರಿಕೆಯಾಗಿ 24,304 ಕ್ಕೆ ತಲುಪಿದೆ.
ಮಿಡ್‌ಕ್ಯಾಪ್ ಮತ್ತು ಸ್ಮಾಲ್‌ಕ್ಯಾಪ್ ಷೇರುಗಳಲ್ಲಿ ಶುಕ್ರವಾರ ಭರ್ಜರಿ ರ್ಯಾಲಿ ಕಂಡು ಬಂತು. ನಿಫ್ಟಿ ಮಿಡ್‌ಕ್ಯಾಪ್ 100 ಸೂಚ್ಯಂಕ 383 ಪಾಯಿಂಟ್‌ಗಳು ಅಥವಾ ಶೇಕಡಾ 0.68 ರಷ್ಟು ಏರಿಕೆಯಾಗಿ 56,496 ಕ್ಕೆ ಸ್ಥಿರವಾಯಿತು ಮತ್ತು ನಿಫ್ಟಿ ಸ್ಮಾಲ್‌ಕ್ಯಾಪ್ 100 ಸೂಚ್ಯಂಕ 192 ಪಾಯಿಂಟ್ ಅಥವಾ 1.03 ರಷ್ಟು ಏರಿಕೆಯಾಗಿ 18,794 ಕ್ಕೆ ಕೊನೆಗೊಂಡಿತು.
ಮುಹೂರ್ತದ ವಹಿವಾಟಿನ ಸಮಯದಲ್ಲಿ ವಿಶಾಲ ಮಾರುಕಟ್ಟೆಯ ಪ್ರವೃತ್ತಿಯು ಸಹ ಧನಾತ್ಮಕವಾಗಿತ್ತು ಎಂಬುದು ವಿಶೇಷ. 2024ರ ಅಕ್ಟೋಬರ್ ತಿಂಗಳು ಹೂಡಿಕೆದಾರರಿಗೆ ದೊಡ್ಡ ಕರಾಳ ತಿಂಗಳಾಗಿ ಮಾರ್ಪಟ್ಟಿತ್ತು. ಷೇರುಪೇಟೆ ಸುಮಾರು ಈ ತಿಂಗಳಲ್ಲಿ 4ಸಾವಿರಕ್ಕೂ ಹೆಚ್ಚು ಅಂಕಗಳನ್ನು ಕಳೆದುಕೊಂಡು ಕಳೆಗುಂದುವಂತೆ ಮಾಡಿತ್ತು. ಆದರೆ, ದೀಪಾವಳಿ ಶುಭಮುಹೂರ್ತದ ಟ್ರೇಡಿಂಗ್ ಇವೆಲ್ಲವನ್ನು ಮರೆಸಿ ಏರಿಕೆ ದಾಖಲಿಸುವ ಮೂಲಕ ಸಂವತ್ 2081 ರ ಕ್ಕೆ ಶುಭ ಗಳಿಗೆ ತಂದು ಕೊಟ್ಟಿದೆ.
ಬಾಂಬೆ ಸ್ಟಾಕ್ ಎಕ್ಸ್‌ಚೇಂಜ್‌ ಬಿಎಸ್ಸಿಯಲ್ಲಿ 3,017 ಷೇರುಗಳು ಹಸಿರು ಬಣ್ಣದಲ್ಲಿ, 558 ಕೆಂಪು ಬಣ್ಣದಲ್ಲಿ ಮತ್ತು 73 ಷೇರುಗಳು ಬದಲಾಗದೇ ದಿನದ ವ್ಯವಹಾರವನ್ನು ಮುಗಿಸಿದವು. ಸೆನ್ಸೆಕ್ಸ್ ಪ್ಯಾಕ್‌ನಲ್ಲಿನ 30 ಷೇರುಗಳಲ್ಲಿ ಇಪ್ಪತ್ತೈದು ಹಸಿರು ಬಣ್ಣದಲ್ಲಿ ವಹಿವಾಟು ಕೊನೆಗೊಳಿಸಿದವು.