ನವದೆಹಲಿ:78ನೇ ಸ್ವಾತಂತ್ರ್ಯೋತ್ಸವ ಸಂಭ್ರಮದಲ್ಲಿ ಪ್ರಧಾನಮಂತ್ರಿ ನರೇಂದ್ರ ಮೋದಿ ಅವರು ಗುರುವಾರ ದೆಹಲಿಯ ಐತಿಹಾಸಿಕ ಕೆಂಪು ಕೋಟೆಯಿಂದ ದೇಶವನ್ನು ಉದ್ದೇಶಿಸಿ ಭಾಷಣ ಮಾಡಿದರು. ಇದು ಸ್ವಾತಂತ್ರ್ಯೋತ್ಸವದ ಇತಿಹಾಸದಲ್ಲೇ ಅತಿ ದೀರ್ಘ ಭಾಷಣ ಎಂದು ದಾಖಲಾಯಿತು.
ಇಂದು ಅವರು 98 ನಿಮಿಷಗಳ ಕಾಲ ಸತತವಾಗಿ ಮಾತನಾಡಿದರು. ಇದು ಯಾವುದೇ ಪ್ರಧಾನಿಗಳು ಮಾಡಿದ ಸ್ವಾತಂತ್ರ್ಯ ಭಾಷಣಗಳಿಗಿಂತ ಸುದೀರ್ಘವಾಗಿದೆ. ಪ್ರಧಾನಿ ಮೋದಿ ಸತತ ಮೂರನೇ ಬಾರಿಗೆ ಅಧಿಕಾರಕ್ಕೆ ಬಂದ ಬಳಿಕದ ಮೊದಲ ಸ್ವಾತಂತ್ರ್ಯೋತ್ಸವ ಭಾಷಣ ಇದಾಗಿದೆ.
ಸ್ವಾತಂತ್ರೋತ್ಸವದ ವೇಳೆ ಮೋದಿ ಮಾಡಿದ ಸರಾಸರಿ ಭಾಷಣದ ಅವಧಿ 82 ನಿಮಿಷ. ಇದೂ ಕೂಡ ಯಾವುದೇ ಪ್ರಧಾನಿಗಿಂತ ದೊಡ್ಡ ಭಾಷಣವಾಗಿದೆ. ಇದಕ್ಕೂ ಮೊದಲು 2016ರ ಸ್ವಾತಂತ್ರ್ಯೋತ್ಸವದಲ್ಲಿ 96 ನಿಮಿಷಗಳ ಕಾಲ ಭಾಷಣ ಮಾಡಿದ್ದು ಈವರೆಗಿನ ದಾಖಲೆಯಾಗಿತ್ತು. ಈ ದಾಖಲೆಯನ್ನು ಅವರೇ ಮುರಿದಿದ್ದಾರೆ. ಮೋದಿ ಅವರು ಮಾಡಿದ ಅತಿ ಕಡಿಮೆ ಅವಧಿಯ ಭಾಷಣವೆಂದರೆ, 2017ರಲ್ಲಿ 56 ನಿಮಿಷ ಮಾತನಾಡಿರುವುದು.
ಯಾವ ವರ್ಷ, ಎಷ್ಟು ನಿಮಿಷ ಮಾತು:ಪ್ರಧಾನಿ ಮೋದಿ 2014ರಲ್ಲಿ ತಮ್ಮ ಮೊದಲ ಸ್ವಾತಂತ್ರ್ಯ ದಿನದ ಭಾಷಣ ಮಾಡಿದರು. ಅಂದು 65 ನಿಮಿಷಗಳ ಕಾಲ ಮಾತನಾಡಿದ್ದರು. 2015ರಲ್ಲಿ 88 ನಿಮಿಷ, 2016ರಲ್ಲಿ 96, 2017ರಲ್ಲಿ 56 ನಿಮಿಷ, 2018ರಲ್ಲಿ 83 ನಿಮಿಷ, 2019ರಲ್ಲಿ 92, 2020ರಲ್ಲಿ 90 ನಿಮಿಷ, 2021ರಲ್ಲಿ 88 ನಿಮಿಷ, 2022ರಲ್ಲಿ 74 ನಿಮಿಷ, 2023ರಲ್ಲಿ 90 ನಿಮಿಷಗಳ ಕಾಲ ಮಾತನಾಡಿದ್ದರು.