ಶರ್ಮಿಳಾ ಪುತ್ರನ ಮದುವೆ ಆರತಕ್ಷತೆ: ಹೈದರಾಬಾದ್​ಗೆ ಬರಲಿದ್ದಾರೆ ಮಲ್ಲಿಕಾರ್ಜುನ ಖರ್ಗೆ, ಕೆಸಿ ವೇಣುಗೋಪಾಲ್

ಶರ್ಮಿಳಾ ಪುತ್ರನ ಮದುವೆ ಆರತಕ್ಷತೆಗಾಗಿ ಇಂದು ಹೈದರಾಬಾದ್‌ಗೆ ಮಲ್ಲಿಕಾರ್ಜುನ ಖರ್ಗೆ ಮತ್ತು ಕೆಸಿ ವೇಣುಗೋಪಾಲ್ ಅವರು ಪ್ರಯಾಣ ಬೆಳೆಸಲಿದ್ದಾರೆ.

ಹೈದರಾಬಾದ್, ತೆಲಂಗಾಣ:ಸಂಸತ್ ಚುನಾವಣೆಯಲ್ಲಿ ಗೆಲ್ಲಲು ಪ್ರಬಲ ಅಭ್ಯರ್ಥಿಗಳನ್ನು ಆಯ್ಕೆ ಮಾಡಲು ಕಾಂಗ್ರೆಸ್ ತನ್ನ ಪ್ರಯತ್ನವನ್ನು ತೀವ್ರಗೊಳಿಸಿದೆ. ಕಾಂಗ್ರೆಸ್ ರಾಷ್ಟ್ರೀಯ ಅಧ್ಯಕ್ಷ ಮಲ್ಲಿಕಾರ್ಜುನ ಖರ್ಗೆ ಮತ್ತು ಪ್ರಧಾನ ಕಾರ್ಯದರ್ಶಿ ಕೆ.ಸಿ.ವೇಣುಗೋಪಾಲ್ ಇಂದು ಸಂಜೆ ಹೈದರಾಬಾದ್‌ಗೆ ಪ್ರಯಾಣ ಬೆಳೆಸಲಿದ್ದಾರೆ. ಆಂಧ್ರಪ್ರದೇಶದ ಪಿಸಿಸಿ ಅಧ್ಯಕ್ಷೆ ಶರ್ಮಿಳಾ ಅವರ ಪುತ್ರನ ವಿವಾಹ ಆರತಕ್ಷತೆ ಸಮಾರಂಭದಲ್ಲಿ ಭಾಗವಹಿಸಲು ಆಗಮಿಸುತ್ತಿದ್ದಾರೆ ಎಂದು ಪಕ್ಷದ ಮುಖಂಡರು ತಿಳಿಸಿದ್ದಾರೆ.

ಈ ಸಂದರ್ಭದಲ್ಲಿ ತೆಲಂಗಾಣ ಲೋಕಸಭೆ ಚುನಾವಣೆಗೆ ಅಭ್ಯರ್ಥಿಗಳ ಆಯ್ಕೆ ಕುರಿತು ಪಿಸಿಸಿ ಅಧ್ಯಕ್ಷ ರೇವಂತ್ ರೆಡ್ಡಿ, ಪಕ್ಷದ ರಾಜ್ಯ ಉಸ್ತುವಾರಿ ದೀಪಾ ದಾಸ್ಮುನ್ಶಿ ಮತ್ತಿತರರ ಜತೆ ಚರ್ಚೆ ನಡೆಸುವ ಅವಕಾಶಗಳಿವೆಯಂತೆ. ವಂಶಚಂದ್ ರೆಡ್ಡಿ ಅವರನ್ನು ಮಹಬೂಬ್‌ನಗರ ಕ್ಷೇತ್ರದ ಅಭ್ಯರ್ಥಿ ಎಂದು ಸಿಎಂ ರೇವಂತ್‌ರೆಡ್ಡಿ ಈಗಾಗಲೇ ಘೋಷಿಸಿದ್ದು, ಉಳಿದ 16 ಸ್ಥಾನಗಳಿಗೆ ಆಯ್ಕೆಯಾಗಬೇಕಿದೆ.

ಪಿಸಿಸಿ ಉಪಾಧ್ಯಕ್ಷ ಮಲ್ಲು ರವಿ ಅವರನ್ನು ಇತ್ತೀಚೆಗೆ ದೆಹಲಿಯಲ್ಲಿ ರಾಜ್ಯ ಸರ್ಕಾರದ ಪ್ರತಿನಿಧಿಯಾಗಿ ಸರ್ಕಾರ ನೇಮಿಸಿತ್ತು. ಈ ಸ್ಥಾನಕ್ಕೆ ರಾಜೀನಾಮೆ ನೀಡಿ ನಾಗರಕರ್ನೂಲ್ ಟಿಕೆಟ್ ನೀಡುವಂತೆ ಸಿಎಂಗೆ ಪತ್ರ ಬರೆದಿರುವುದಾಗಿ ಶುಕ್ರವಾರ ಪ್ರಕಟಿಸಿದ್ದರು. ಈ ಸ್ಥಾನಕ್ಕಾಗಿ ಆಲಂಪುರದ ಮಾಜಿ ಶಾಸಕ ಸಂಪತ್‌ಕುಮಾರ್ ಹಾಗೂ ಇತರ ಕೆಲವು ಮುಖಂಡರು ತೀವ್ರ ಪ್ರಯತ್ನ ನಡೆಸುತ್ತಿದ್ದಾರೆ. ಪಕ್ಷದ ಬಿಸಿ (ಹಿಂದುಳಿದ ವರ್ಗ) ಮುಖಂಡರು ಮೂರ್ನಾಲ್ಕು ಸ್ಥಾನಗಳ ನಿರೀಕ್ಷೆಯಲ್ಲಿದ್ದಾರೆ. ವಿಶೇಷವಾಗಿ ಜಹೀರಾಬಾದ್, ಮೇದಕ್ ಮತ್ತು ಸಿಕಂದರಾಬಾದ್ ಟಿಕೆಟ್‌ಗಳ ಮೇಲೆ ನಿಗಾ ಇಟ್ಟಿದ್ದಾರೆ.

ಸಿಕಂದರಾಬಾದ್‌ ಕ್ಷೇತ್ರವನ್ನು ಬಿಸಿಗಳಿಗೆ ನೀಡಿದರೆ ನಗರದಲ್ಲಿ ಕಾಂಗ್ರೆಸ್‌ಗೆ ಬೆಂಬಲ ಸಿಗಲಿದೆ ಎಂದು ಪಕ್ಷದ ವಲಯದಿಂದ ನಿರೀಕ್ಷಿಸಲಾಗಿದೆ. ಪ್ರತಿಸ್ಪರ್ಧಿ ಬಿಆರ್‌ಎಸ್ ಕೂಡ ಸಿಕಂದರಾಬಾದ್ ಟಿಕೆಟ್ ಅನ್ನು ಬಿಸಿಗಳಿಗೆ ನೀಡುವ ಸಾಧ್ಯತೆಯಿದೆ ಎಂದು ಕಾಂಗ್ರೆಸ್ ನಾಯಕರು ಲೆಕ್ಕ ಹಾಕಿದ್ದಾರೆ.

5 ಮೀಸಲು ಸ್ಥಾನಗಳಿಗೆ 50 ಆಕಾಂಕ್ಷಿಗಳು: ಎಸ್‌ಸಿ ಮತ್ತು ಎಸ್‌ಟಿ ಕೋಟಾದಲ್ಲಿ ಐದು ಮೀಸಲು ಸ್ಥಾನಗಳಿಗೆ ಸುಮಾರು 50 ಜನರು ಟಿಕೆಟ್ ಕೇಳುತ್ತಿದ್ದಾರೆ. ಪಕ್ಷದ ಮೂಲಗಳ ಪ್ರಕಾರ, ಪ್ರಸ್ತುತ ರಾಜಕೀಯದಲ್ಲಿರುವ ನಾಯಕರು, ಉನ್ನತ ಅಧಿಕಾರಿಗಳು, ನಿವೃತ್ತ ಅಧಿಕಾರಿಗಳು, ವೈದ್ಯರು ಮತ್ತು ವಕೀಲರು ಪೈಪೋಟಿಯಲ್ಲಿದ್ದಾರೆ.

ಕಾಂಗ್ರೆಸ್ ಲೋಕಸಭಾ ಚುನಾವಣೆಯ ವಾರ್ ರೂಮ್ ಸಮಿತಿ ರಚನೆ: ಲೋಕಸಭೆ ಚುನಾವಣೆಗೆ ಸಂಬಂಧಿಸಿದಂತೆ ಕಾಂಗ್ರೆಸ್ ಪಕ್ಷವು ಪಿಸಿಸಿ ಪದಾಧಿಕಾರಿಗಳೊಂದಿಗೆ ವಾರ್ ರೂಂ ಸಮಿತಿಯನ್ನು ರಚಿಸಿದೆ. ಅಧ್ಯಕ್ಷರಾಗಿ ಪವನ್ ಮಲ್ಲಾಡಿ ಅವರನ್ನು ನೇಮಕ ಮಾಡಲಾಗಿದೆ. ಸಂದೇಶ ಶಿಂಗಾಳ್ಕರ್, ಸತೀಶ್ ಮನ್ನೆ, ಸಂತೋಷ್ ರುದ್ರ ಮತ್ತು ಜಕ್ಕಣಿ ಅನಿತಾ ಅವರನ್ನು ಸಹ - ಅಧ್ಯಕ್ಷರನ್ನಾಗಿ ನೇಮಿಸಿದೆ. ತರಬೇತಿಗಾರರಾಗಿ ವಾಸಿಂ ಭಾಷಾ ಮತ್ತು ಆರೋನ್ ಮಿರ್ಜಾ, ವಿಶ್ಲೇಷಕರಾಗಿ ಶ್ರೀಕಾಂತ್ ಕುಮ್ಮರಿ, ಸಾಮಾಜಿಕ ಮಾಧ್ಯಮ ಉಸ್ತುವಾರಿಗಳಾಗಿ ಗಿರಿಜಾ ಶೆಟ್ಕರ್ ಮತ್ತು ನವೀನ್ ಪಟ್ಟೆಮ್ ಅವರನ್ನು ನೇಮಿಸಲಾಗಿದೆ. ಪಿಸಿಸಿ ಕಾರ್ಯಾಧ್ಯಕ್ಷ, ಎಂಎಲ್‌ಸಿ ಮಹೇಶ್‌ ಕುಮಾರ್‌ ಗೌಡ್‌ ಮಾತನಾಡಿ, ಕಾಂಗ್ರೆಸ್‌ ರಾಜ್ಯ ಉಸ್ತುವಾರಿ ದೀಪಾ ದಾಸ್‌ಮುಂಶಿ ಅವರ ಅನುಮತಿ ಮೇರೆಗೆ ಈ ನೇಮಕ ಮಾಡಲಾಗಿದೆ ಎಂದು ಹೇಳಿದರು.

ಓದಿ:ಅತಿ ವೇಗ, ಅಜಾಗರೂಕತೆಯೇ ಒಆರ್​ಆರ್​ನಲ್ಲಿ ಅಪಘಾತ ಹೆಚ್ಚಳಕ್ಕೆ ಕಾರಣ: ಈ ಸ್ಪೀಡೇ ಯುವ ಶಾಸಕಿ ಜೀವಕ್ಕೆ ಎರವಾಯ್ತೇ?