ಗಡ್ಚಿರೋಲಿ (ಮಹಾರಾಷ್ಟ್ರ):ನಕ್ಸಲ್ಪೀಡಿತ ರಾಜ್ಯವಾದ ಛತ್ತೀಸ್ಗಢಕ್ಕೆ ಹೊಂದಿಕೊಂಡಿರುವ ಮಹಾರಾಷ್ಟ್ರದ ಗಡ್ಚಿರೋಲಿಯಲ್ಲಿ ಮಾವೋವಾದಿಗಳು ಮತ್ತು ಪೊಲೀಸರ ನಡುವೆ ಭಾರೀ ಗುಂಡಿನ ಕಾಳಗ ನಡೆದಿದೆ. ಇದರಿಂದ 12 ನಕ್ಸಲರು ಹತರಾಗಿದ್ದು, ಭಾರೀ ಪ್ರಮಾಣದ ಶಸ್ತ್ರಾಸ್ತ್ರಗಳು ಸಿಕ್ಕಿವೆ.
ಬುಧವಾರ ಬೆಳಗ್ಗೆ 10 ಗಂಟೆ ಸುಮಾರಿಗೆ ಗಡ್ಚಿರೋಲಿಯಲ್ಲಿ ನಕ್ಸಲ್ ದಮನ ಕಾರ್ಯಾಚರಣೆ ಆರಂಭಿಸಲಾಗಿತ್ತು. ಛತ್ತೀಸ್ಗಢ ಗಡಿಯ ಬಳಿ ಇರುವ ವಂಡೋಲಿ ಗ್ರಾಮದಲ್ಲಿ ಮಾವೋವಾದಿಗಳು ಅಡಗಿದ್ದನ್ನು ಪೊಲೀಸರು ಪತ್ತೆ ಮಾಡಿದ್ದರು. 12 ರಿಂದ 15 ನಕ್ಸಲರು ಬೀಡು ಬಿಟ್ಟಿದ್ದಾರೆ ಎಂದು ಮಾಹಿತಿ ಲಭಿಸಿದ ಹಿನ್ನೆಲೆಯಲ್ಲಿ ಪೊಲೀಸ್ ತಂಡಗಳು ಅರಣ್ಯಕ್ಕೆ ನುಗ್ಗಿದ್ದವು.
ಮಧ್ಯಾಹ್ನ ಆರಂಭವಾದ ಗುಂಡಿನ ಚಕಮಕಿ ಸಂಜೆ 6 ಗಂಟೆವರೆಗೂ ಮುಂದುವರಿದಿತ್ತು. ಬಳಿಕ ಕೆಲ ನಕ್ಸಲರು ಅಲ್ಲಿಂದ ಪರಾರಿಯಾದ ಬಳಿಕ ಈ ಪ್ರದೇಶದಲ್ಲಿ ಶೋಧ ನಡೆಸಲಾಗಿದೆ. ಈವರೆಗೆ 12 ನಕ್ಸಲರ ಮೃತದೇಹಗಳು ಪತ್ತೆಯಾಗಿವೆ. ಜೊತೆಗೆ ಸ್ಥಳದಲ್ಲಿ ಮೂರು ಎಕೆ 47, ಎರಡು ಐಎನ್‌ಎಸ್‌ಎಎಸ್, 1 ಕಾರ್ಬೈನ್, 1 ಎಸ್‌ಎಲ್‌ಆರ್ ಸೇರಿದಂತೆ 7 ಆಧುನಿಕ ಶಸ್ತ್ರಾಸ್ತ್ರಗಳು ಸಿಕ್ಕಿವೆ. ಇದರಲ್ಲಿ ಪೊಲೀಸ್ ಪಡೆಗಳಿಗೆ ಬೇಕಾಗಿದ್ದ, ತಲೆಗೆ ಬಹುಮಾನ ಘೋಷಿಸಲಾಗಿದ್ದ ನಕ್ಸಲರೂ ಹತರಾಗಿದ್ದಾರೆ ಎಂದು ಹೇಳಲಾಗಿದೆ.