ખેડામાં ચાંદીપુરાના નવા ત્રણ કેસ નોંધાયા, મહેમદાવાદના 5 વર્ષિય બાળક બાદ તંત્રએ વધારી સતર્કતા - Chandipura virus case in kheda

રાજ્યભરમાં ચાંદીપુરા વાયરસે તરખાટ મચાવ્યો છે અને હવે આ વાયરસ ધીરેધીરે પગ પેસારો કરતો હોય તેવી સ્થિતિ પેદા થઈ રહી છે. ત્યારે હવે ખેડા જિલ્લામાં ચાંદીપુરા વાયરસના વધુ ત્રણ શંકાસ્પદ કેસ મળી આવ્યા છે. Chandipura virus case in kheda

ખેડા:ખેડા જિલ્લામાં ચાંદીપુરા વાયરસના વધુ ત્રણ શંકાસ્પદ કેસ મળી આવ્યા છે. જેમાં એક બાળકનું સારવાર દરમ્યાન મોત નિપજ્યુ છે. જ્યારે અન્ય બે બાળકો હાલ સારવાર હેઠળ છે.જ્યારે અગાઉ નોંધાયેલ એક કેસમાં સારવાર હેઠળ રહેલા બાળકની તબિયત હાલ સુધારા પર છે.આરોગ્ય વિભાગ દ્વારા સેમ્પલ લેવા સહિતની કાર્યવાહી હાથ ધરવામાં આવી રહી છે.

ચાંદીપુરાથી મોતનો પ્રથમ કેસ:ખેડા જીલ્લાના મહેમદાવાદના પથાવત, ગળતેશ્વર તાલુકાના અંગાડી અને મહુધા તાલુકાના સણાલી ખાતે શંકાસ્પદ ચાંદીપુરા વાયરસના કેસ નોંધાવા પામ્યા છે. જેમાં જીલ્લામાં શંકાસ્પદ ચાંદીપુરાથી મોતનો પ્રથમ કેસ નોંધાયો છે. જીલ્લામાં નોંધાયેલા ત્રણ નવા કેસોમાં એકનું મોત નિપજ્યુ છે.જ્યારે બે હાલ સારવાર હેઠળ છે.જેમાં મહેમદાવાદના પથાવતના 5 વર્ષિય બાળક ચાંદીપુરાના શંકાસ્પદ લક્ષણો જણાતા અમદાવાદ સિવિલ હોસ્પિટલ ખાતે સારવાર હેઠળ હતો.જ્યાં સારવાર દરમિયાન તેનું મોત થવા પામ્યું હતું.જ્યારે ગળતેશ્વર તાલુકાના અંગાડીમાં 10 વર્ષિય બાળકને ચાંદીપુરાના શંકાસ્પદ લક્ષણો જોવા મળ્યા હતા.જે હાલ વડોદરાની એસ.એસ.જી હોસ્પિટલમાં સારવાર હેઠળ છે.જ્યારે મહુધા તાલુકાના સણાલી ગામમાં 6 માસના બાળકને ચાંદીપુરા વાયરસના લક્ષણો જણાતા તેને હાલ નડિયાદની એક ખાનગી હોસ્પિટલમાં સારવાર હેઠળ રાખવામાં આવ્યુ છે.

આરોગ્ય વિભાગ દ્વારા કામગીરી:જીલ્લામાં નોંધાયેલા આ કેસને પગલે જીલ્લા આરોગ્ય વિભાગની ટીમ દ્વારા વિવિધ કામગીરી હાથ ધરવામાં આવી છે. ફોગિંગ,ડસ્ટીંગની કામગીરી હાથ ધરી હતી.તેમજ ડોર ટુ ડોર સર્વેની કામગીરી કરવામાં આવી હતી.સેમ્પલ લઈ તેને તપાસ માટે લેબોરેટરીમાં મોકલી આપવામાં આવ્યા છે.તકેદારીના ભાગરૂપે આરોગ્ય વિભાગ દ્વારા સમગ્ર જીલ્લામાં પણ વિવિધ કામગીરી હાથ ધરવામાં આવી રહી છે.

મુખ્ય જિલ્લા આરોગ્ય અધિકારી ડો.વી.એ.ધ્રુવે એ જણાવ્યું હતુ કે,આ નવા નોંધાયેલા કેસોના સેમ્પલ લઈને તપાસ માટે લેબોરેટરીમાં મોકલવામાં આવ્યા છે.આ ત્રણ કેસમાંથી એકનું મોત થયું છે.આરોગ્ય વિભાગની ટીમ દ્વારા મૃતક બાળકના વિસ્તારમાં આવેલા 17 ઘરો અને 69 લોકોના સેમ્પલ લેવામાં આવ્યા હોવાનું તેમણે જણાવ્યું હતું.તેમજ આરોગ્ય વિભાગ દ્વારા હાલ જરૂરી તમામ કામગીરી કરવામાં આવી રહી હોવાનું જણાવ્યુ હતું.