સાત્વિક-ચિરાગનું મેડલ જીતવાનું સપનું અધૂરું, ક્વાર્ટર ફાઈનલમાં મળી હાર - PARIS OLYMPICS 2024

પેરિસ ઓલિમ્પિક્સ 2024માં ભારતના સ્ટાર શટલર્સ સાત્વિકસાઈરાજ રેન્કીરેડ્ડી અને ચિરાગ શેટ્ટીનું અભિયાન સમાપ્ત થઈ ગયું છે. ભારતીય જોડીને મેન્સ ડબલ્સ બેડમિન્ટનની ક્વાર્ટર ફાઇનલમાં મલેશિયાએ હાર આપી હતી.

પેરિસ (ફ્રાન્સ): સાત્વિકસાઈરાજ રેન્કીરેડ્ડી અને ચિરાગ શેટ્ટીનું પેરિસ ઓલિમ્પિક અભિયાન સમાપ્ત થઈ ગયું છે. ભારતની આ સ્ટાર શટલર જોડીને ગુરુવારે રમાયેલી બેડમિન્ટન મેન્સ ડબલ્સની ક્વાર્ટર ફાઈનલ મેચમાં મલેશિયા સામે હારનો સામનો કરવો પડ્યો હતો. એરોન ચિયા અને સોહ વુઇ યીકની મલેશિયાની જોડીએ ભારતીય જોડીને 21-13, 14-21, 21-16થી પરાજય આપ્યો હતો. આ જીત સાથે મલેશિયાની જોડીએ સેમીફાઈનલમાં જગ્યા બનાવી લીધી છે.

પ્રથમ ગેમમાં સાત્વિક-ચિરાગની શાનદાર શરૂઆતઃ ભારતીય જોડીએ મેચમાં આક્રમણની શરૂઆત કરી હતી અને પ્રથમ સેટની શરૂઆતમાં ઘણા જબરદસ્ત સ્મેશ કર્યા હતા. મલેશિયાની જોડીએ પણ જોરદાર લડત આપી અને પ્રથમ ગેમમાં મધ્ય-વિરામ સુધી સાત્વિક-ચિરાગ 11-10ના સ્કોર સાથે નાના માર્જિનથી આગળ હતા. જોકે, વિરામ બાદ ભારતે શાનદાર પ્રદર્શન કર્યું અને પ્રતિસ્પર્ધીઓને વધુ તક આપ્યા વિના પ્રથમ ગેમ 21-13થી જીતી લીધી.

બીજા સેટમાંચિયા-સોહે શાનદાર વાપસી:પહેલો સેટ આસાનીથી જીત્યા બાદ ભારતીય જોડીએ બીજી ગેમમાં જોરદાર સ્પર્ધાનો સામનો કરવો પડ્યો હતો. ટોક્યો 2020 બ્રોન્ઝ મેડલ વિજેતા મલેશિયાની ચિયા-સોહે બીજા સેટમાં શાનદાર વાપસી કરી હતી. મલેશિયાની જોડીએ પ્રથમ વખત મેચમાં 5-4ની સરસાઈ મેળવી હતી. આ ગેમમાં મલેશિયાની જોડીએ કોઈ ભૂલ કરી ન હતી અને આક્રમક અભિગમ અપનાવ્યો હતો અને ભારતીય જોડીને 21-14થી હરાવી હતી.

ત્રીજા સેટમાં ટક્કર રહી: ભારત અને મલેશિયા વચ્ચે ત્રીજો સેટ ચુસ્ત રહ્યો. ભારતીય જોડીએ 5-2થી પાછળ રહ્યા બાદ શાનદાર રમત રમી અને સ્કોર 5-5ની બરાબરી પર લાવી દીધો. બંનેમાંથી કોઈ પણ જોડી હાર સ્વીકારવા તૈયાર ન હતી અને બંને વચ્ચેની ત્રીજી ગેમ ઘણી રોમાંચક રહી હતી. સાત્વિક-ચિરાગે તેમના હુમલા ચાલુ રાખ્યા હતા અને મધ્ય બ્રેક સુધી 11-9થી આગળ હતા.

સાત્વિક ચિરાગે તેના વિરોધીને ઘણી વખત નેટમાં શટલ મારવા માટે દબાણ કર્યું, બંનેએ ઘણા જબરદસ્ત સ્મેશ ફટકાર્યા. પરંતુ, મલેશિયાની જોડીએ પણ ઘણા શાનદાર શોટ લગાવીને મેચને કપરી બનાવી દીધી અને સ્કોર 14-14થી બરાબર કરી દીધો. બ્રેક બાદ ભારતીય જોડીએ તેની ગતિ ગુમાવી દીધી હતી અને તે માત્ર 3 પોઈન્ટ બનાવી શકી હતી. અંતે આ જોડીને 21-16થી હારનો સામનો કરવો પડ્યો હતો.