દુબઈ: ઓસ્ટ્રેલિયા મહિલા ક્રિકેટ ટીમ અને પાકિસ્તાન મહિલા ક્રિકેટ ટીમ વચ્ચે ICC મહિલા T20 વર્લ્ડ કપની 14મી મેચ આજે એટલે કે 11મી ઓક્ટોબરે દુબઈ ઈન્ટરનેશનલ ક્રિકેટ સ્ટેડિયમ, દુબઈ ખાતે રમાશે. એલિસા હીલી આ મેચમાં ઓસ્ટ્રેલિયાની કેપ્ટનશીપ કરશે. PCB ના રિપોર્ટ મુજબ પાકિસ્તાનની કેપ્ટન સના ફાતિમા તેના પિતાના મૃત્યુ બાદ સ્વદેશ પરત ફરી છે. તેની ગેરહાજરીમાં મુનીબા અલી ટીમનું નેતૃત્વ કરશે. ઓસ્ટ્રેલિયા આ મેચમાં પાકિસ્તાનને હરાવીને અજેય રહેવા ઈચ્છશે તો બીજી તરફ પાકિસ્તાન કટ્ટર હરીફ ભારત સામે તેની છેલ્લી મેચ હાર્યા બાદ આ મેચ જીતવા ઈચ્છશે. પાકિસ્તાન અત્યારે ગ્રુપ Aમાં ત્રીજા સ્થાને છે જ્યારે ઓસ્ટ્રેલિયાએ પોતાનું સ્થાન જાળવી રાખ્યું છે.
પાકિસ્તાન માટે 'કરો અથવા મરો' સ્થિત:
ઓસ્ટ્રેલિયા તેમની છેલ્લી ગ્રુપ મેચમાં ન્યુઝીલેન્ડ સામેની પ્રભાવશાળી જીત બાદ આત્મવિશ્વાસથી ભરપૂર છે. પાંચ વખતની ચેમ્પિયન ટીમે બેથ મૂની અને એલિસ પેરીના મહત્વપૂર્ણ યોગદાનથી 149 રનનો લક્ષ્યાંક આપ્યો હતો. બોલરોમાં મેગન શુટે ઓસ્ટ્રેલિયા માટે શ્રેષ્ઠ પ્રદર્શન કર્યું હતું. એનાબેલ સધરલેન્ડે પણ ત્રણ વિકેટ ઝડપી હતી અને ન્યુઝીલેન્ડને 88 રનમાં આઉટ કરી દીધું હતું. દરમિયાન, ભારત સામે સાત વિકેટની હારનું મુખ્ય કારણ પાકિસ્તાનની બેટિંગનું વહેલું પતન હતું. પ્રથમ બેટિંગ કરતા પાકિસ્તાન 105 રન જ બનાવી શક્યું, જવાબમાં ભારતે 19મી ઓવરમાં આસાનીથી લક્ષ્ય હાંસલ કરી લીધું.
હેડ-ટુ-હેડ રેકોર્ડઃ
ઓસ્ટ્રેલિયા મહિલા ક્રિકેટ ટીમ અને પાકિસ્તાન મહિલા ક્રિકેટ ટીમ વચ્ચે કુલ 13 T20 આંતરરાષ્ટ્રીય મેચ રમાઈ છે. ઓસ્ટ્રેલિયાની ટીમે આમાં તમામ મેચ જીતી છે. જ્યારે પાકિસ્તાનની ટીમને નિરાશાનો સામનો કરવો પડ્યો છે. આંકડાઓ પરથી સ્પષ્ટ થાય છે કે ઓસ્ટ્રેલિયન ટીમનો દબદબો રહેશે.
પિચ રિપોર્ટ: અત્યાર સુધી આ મેદાન પર 5.48 રન પ્રતિ ઓવરના દરે રન બન્યા છે અને 100થી વધુ વિકેટો પડી છે. આનો અર્થ એ છે કે, આ મેદાન પર મોટા સ્કોરની અપેક્ષા નથી. આ મેદાન પર પ્રથમ દાવનો સરેરાશ સ્કોર 90 રન છે. અહીં બંને ઇનિંગ્સમાં સૌથી વધુ રન 262 છે. આ પીચ પર ઝડપી બોલરોને નવા બોલની મદદ મળે છે. મધ્ય ઓવરોમાં સ્પિનરોને મદદ મળી શકે છે.
હવામાન કેવું રહેશેઃ
દુબઈના હવામાન વિશે વાત કરીએ તો, મહિલા T20 વર્લ્ડ કપમાં પાકિસ્તાન અને ઓસ્ટ્રેલિયાની મેચના દિવસે ખૂબ જ ગરમ અને તડકો રહેશે. વરસાદની કોઈ શક્યતા નથી. દિવસભર હવામાન સ્વચ્છ રહેશે અને ચાહકો આખી મેચ નિહાળી શકશે. મેચ દરમિયાન 24 કિમી પ્રતિ કલાકની ઝડપે પવન ફૂંકાવાની ધારણા છે.