IPL મેગા ઓક્શન માટે 42 વર્ષીય ખેલાડીનું નામ, જેણે 15 વર્ષથી એક પણ આંતરરાષ્ટ્રીય T20 મેચ રમી નથી

IPL 2025 મેગા ઓક્શન માટે 1574 ક્રિકેટરોએ રજીસ્ટ્રેશન કરાવ્યું છે. તેમાં એવા ખેલાડીનું નામ છે જેણે 15 વર્ષથી એક પણ T20 મેચ રમી નથી.

મુંબઈ: ભારતની T20 ક્રિકેટ લીગ એટલે કે IPL એ વિશ્વની સૌથી પ્રખ્યાત ક્રિકેટ લીગ છે. દુનિયાના દરેક ક્રિકેટરનું IPLમાં રમવાનું સપનું હોય છે પરંતુ માત્ર થોડા જ ખેલાડીઓ તેને પૂરા કરી શકે છે. આઈપીએલમાં રમવાની ઈચ્છા ખેલાડીઓમાં એટલી પ્રબળ છે કે તેઓ નિવૃત્તિ બાદ પણ આ લીગનો ભાગ બનવા ઈચ્છે છે.

ક્યાં થશે હરાજીઃ

ખરેખર, 5 નવેમ્બરે BCCIએ IPL 2025ની મેગા ઓક્શનને લઈને મોટી જાહેરાત કરી હતી. 18મી સીઝન પહેલા એવા સમાચાર હતા કે IPL 2025ની મેગા ઓક્શન 24 અને 25 નવેમ્બરે સાઉદી અરેબિયાના જેદ્દાહમાં યોજાશે. રસપ્રદ વાત એ છે કે, IPLની હરાજી સતત બીજા વર્ષે વિદેશમાં થશે. IPL 2024 પહેલા છેલ્લી હરાજી દુબઈ શહેરમાં યોજાઈ હતી.

1574 ખેલાડીઓની નોંધણી:

1165 ભારતીય ખેલાડીઓ સહિત કુલ 1574 ક્રિકેટરોએ IPL મેગા ઓક્શન માટે તેમના નામ નોંધાવ્યા છે. તેમાં 320 કેપ્ડ અને 1224 અનકેપ્ડ ખેલાડીઓ અને 30 IPL સંલગ્ન દેશોના ખેલાડીઓનો સમાવેશ થાય છે. આ આંકડાઓ પરથી અંદાજ લગાવી શકાય છે કે દુનિયાભરમાં IPL માટે કેટલો ક્રેઝ છે. સૌથી આશ્ચર્યજનક વાત એ છે કે, એક અનુભવી બોલરે પણ આ હરાજી માટે પોતાનું નામ આપ્યું છે, તે 42 વર્ષનો છે અને તેણે આંતરરાષ્ટ્રીય ક્રિકેટને અલવિદા કહી દીધું છે. અમે જે ખેલાડી વિશે વાત કરી રહ્યા છીએ તેણે આંતરરાષ્ટ્રીય ક્રિકેટમાં 991 વિકેટ લીધી છે. આ ખેલાડીનું નામ છે 'જેમ્સ એન્ડરસન' અને તેણે આઈપીએલની હરાજીમાં પોતાનું નામ નોંધાવ્યું છે.

છેલ્લી T20I મેચ 15 વર્ષ પહેલા રમાઈ હતી:

ટેસ્ટ ક્રિકેટમાં 700 થી વધુ વિકેટ લેનાર એન્ડરસને આ વર્ષે જુલાઈમાં ક્રિકેટમાંથી નિવૃત્તિ લીધી હતી. નિવૃત્તિની જાહેરાત કર્યાના થોડા દિવસો બાદ એન્ડરસને T20 ક્રિકેટમાં રમવાની ઈચ્છા વ્યક્ત કરી હતી. તેણે કહ્યું હતું કે તે હજુ પણ ક્રિકેટ રમવા માંગે છે અને T20 ક્રિકેટમાં હાથ અજમાવવાનું વિચારી રહ્યો છે. તેણે કહ્યું કે તે ફ્રેન્ચાઈઝી ક્રિકેટનો આનંદ માણવા માંગે છે. પરંતુ કોઈએ વિચાર્યું ન હતું કે તે IPLની મેગા ઓક્શનમાં જોવા મળશે.

2009માં રમાયેલી છેલ્લી T20I મેચ:

ઉલ્લેખનીય છે કે, જેમ્સ એન્ડરસને મેગા ઓક્શન માટે તેની બેઝ પ્રાઈસ 1.25 કરોડ રૂપિયા રાખી હતી. એન્ડરસને 15 વર્ષ પહેલા 2009માં ઈંગ્લેન્ડ માટે છેલ્લી ટી20 મેચ રમી હતી જ્યારે ટી20 ક્રિકેટમાં તેની છેલ્લી મેચ 2014માં રમી હતી. હવે જોવાનું રસપ્રદ રહેશે કે આઈપીએલની હરાજીમાં કઈ ટીમ તેને ખરીદે છે.

આ પણ વાંચો: