কাজিৰঙাৰ কাষৰীয়া অঞ্চলত বন্যহস্তীৰ তাণ্ডৱ - Man Elephant Conflict - MAN ELEPHANT CONFLICT

কাজিৰঙা,৭ মে': কাজিৰঙা বা ইয়াৰ দাঁতি-কাষৰীয়া অঞ্চলসমূহত বন্য জীৱ-জন্তুৰ মুক্ত বিচৰণ কোনো নতুন কথা নহয় । বন্যহস্তীৰ উপদ্ৰৱত ত্ৰাহি মধুসূদন সুঁৱৰিছে এটা বিস্তীৰ্ণ অঞ্চলৰ ৰাইজে । পুনৰ বন্যহস্তীৰ উপদ্ৰৱে বিপাঙত পেলাইছে কেইজনমান উদ্যমী যুৱ-কৃষকক । সোমবাৰে নিশা অহা এটা বন্যহস্তীৰ জাকে তহিলং কৰিলে কেইজনমান উদ্যমী যুৱ-কৃষকে ৩২ বিঘা ভূমিত সমবায়ভিত্তিত কৰা ৰঙলাও খেতি । যাৰ পৰিপ্ৰেক্ষিতত মূৰে-কঁপালে হাত দিছে যুৱ-কৃষক কেইগৰাকীয়ে ।  

হাহাকাৰ পৰিস্থিত সন্মুখীন হোৱা ক্ষতিগ্ৰস্ত কৃষক কেইগৰাকীয়ে উপায়ন্তৰ হৈ চৰকাৰ তথা বিভাগীয় কৰ্তৃপক্ষক ক্ষতিপূৰণ দিবলৈ আহ্বান জনায় । উল্লেখ্য যে, কাজিৰঙা ৰাষ্ট্ৰীয় উদ্যানৰ পৰা প্ৰতিবছৰে ওলাই আহে বিভিন্ন বন্যপ্ৰাণী ৷ বনবিভাগে পাৱাৰ ফ্ৰেঞ্চিঙৰ ব্যৱস্থা কৰিছে যদিও বেছিভাগ এলেকাত সেয়া বিকল ৷ ফলত প্ৰায়ে বন্যপ্ৰাণীয়ে উপদ্ৰৱ চলায় ৰাষ্ট্ৰীয় উদ্যানৰ কাষৰীয়া গাঁওসমূহত ৷