যোৰহাটত জ্বলি ছাই হ'ল লক্ষাধিক টকাৰ সম্পত্তি

যোৰহাট: যোৰহাটৰ মাজমজিয়াত ভয়ংকৰ অগ্নিকাণ্ড । মাছৰহাট বৰনামঘৰৰ সন্মুখত সংঘটিত অগ্নিকাণ্ডত বিস্তৰ ক্ষতিসাধন । এটা বাসগৃহৰ ওপৰ মহলাৰ তিনিটা কোঠা জাহ যোৱাৰ লগতে কাষৰীয়া কেইবাটাও ঘৰ আংশিকভাৱে ক্ষতিগ্ৰস্ত হয় এই অগ্নিকাণ্ডত । জুইৰ সূত্ৰপাত হোৱা দীপা দাস নামৰ মহিলাগৰাকীৰ বাসগৃহৰ বিস্তৰ ক্ষতিসাধন । দীপা দাসে জনোৱা অনুসৰি অগ্নিকাণ্ড সংঘটিত হোৱাৰ সময়ত তেওঁ তলত কাপোৰ ধুই আছিল ।  

কি কাৰণত জুইৰ সূত্ৰপাত হয় সেই কথা বৰ্তমানো জানিব পৰা হোৱা নাই । বাসগৃহটোৰ ওপৰ মহলাটো তৰ্জা বেৰৰ হোৱাৰ বাবে নিমিষতে জুয়ে সমগ্ৰ ভৱনটো আগুৰি ধৰাৰ ফলত প্ৰায় ১০ মিনিটতে আটাইকেইটা কোঠা জাহ যায় । অগ্নিকাণ্ডৰ ফলত লক্ষাধিক টকাৰ সামগ্ৰী জাহ গৈছে বুলি জানিব পৰা গৈছে । অগ্নিকাণ্ড সংঘটিত হোৱাৰ পিছত ঘন জনবসতিপূৰ্ণ অঞ্চলটোত একপ্ৰকাৰ হাহাকাৰ পৰিস্থিতিৰ সৃষ্টি হয় । অগ্নিকাণ্ড সংঘটিত হোৱাৰ খবৰ পোৱা মাত্ৰকে যোৰহাট অগ্নিনিৰ্বাপক বাহিনীৰ তিনিখনকৈ বাহন ঘটনাস্থলীত উপস্থিত হৈ অগ্নি নিৰ্বাপিত কৰিবলৈ সক্ষম হয় ।