বিধ্বংসী অগ্নিকাণ্ডত জাহ গ'ল কোটি টকাৰ সা-সামগ্ৰী - massive fire breaks out in Dhing

নগাঁও, 28 এপ্ৰিল : নগাঁৱৰ ধিং বজাৰত পুৱতি নিশা সংঘটিত হয় এক বিধ্বংসী অগ্নিকাণ্ড । নিশা তিনিমান বজাত সংঘটিত অগ্নিকাণ্ডত 6 খনকৈ ব্যৱসায়িক প্ৰতিষ্ঠান সম্পূৰ্ণৰূপে জাহ যায় বুলি জানিব পৰা গৈছে । এখন কাপোৰৰ দোকানত বৈদ্যুতিক বিজুতি সংঘটিত হোৱাৰ ফলত জুইৰ সূত্ৰপাত ঘটে বুলি সন্দেহ প্ৰকাশ কৰিছে ধিংস্থিত অগ্নিনিৰ্বাপক বাহিনীৰ লোকে ৷

সম্প্ৰসাৰিত জুইয়ে নিমিষতে ধ্বংস কৰি পেলায় লগতে থকা আন ছয়খনকৈ কাপোৰৰ দোকান । নিশা ধিং বজাৰত টহল দি থকা আৰক্ষীৰ দলে প্ৰথমে অগ্নিকাণ্ড প্ৰত্যক্ষ কৰি খবৰ দিয়ে ধিংস্থিত অগ্নিনিৰ্বাপক বাহিনীক । লগে লগে ধিঙৰ অগ্নিনিৰ্বাপক বাহিনীৰ দুখনকৈ বাহন ঘটনাস্থলীত উপস্থিত হৈ জুই নিৰ্বাপনৰ চেষ্টা কৰে যদিও নিৰ্বাপন কৰিবলৈ সক্ষম নোহোৱাত বটদ্ৰৱা আৰু মৈৰাবাৰীত থকা অগ্নিনিৰ্বাপক বাহিনীকো খবৰ দিয়ে ৷

পৰৱৰ্তী সময়ত মুঠ চাৰিখনকৈ অগ্নিনিৰ্বাপক বাহিনীৰ বাহনৰ সহায়ত জুই নিৰ্বাপিত হয় । অগ্নিকাণ্ডটোৰ ফলত প্ৰায় 1 কোটি 50 লাখ টকাৰ সা-সামগ্ৰীৰ ক্ষয়-ক্ষতি হোৱা বুলি ধাৰণা কৰিছে স্থানীয় লোকে ।

লগতে পঢ়ক: ভয়ংকৰ অগ্নিকাণ্ডত নিমিষতে ছাৰখাৰ বাসগৃহ - fire breaks out at Amolapatty